Урысые Федерацием и Президентэу Владимир Путиным цIыфхэм адишIыгъэ «ЗэдэгущыIэгъу занкIэр» рамыгъажьэзэ Iофыгъохэм ащыщ­хэр зэрэзэшIуахыгъэхэр, Адыгеир щысэу мыщ къызэрэщахьыгъэр пстэуми зэхахыгъ.

Илъэс 13 зыныбжь Малика Алиевар Президентым елъэIугъ зипсауныгъэкIэ щыкIагъэ зи­Iэхэм атегъэпсыхьэгъэ пкъы­гъохэу Урысыем къыщыдагъэ­кIыхэрэр ыпкIэ зыхэмылъэу аратырэ, япсауныгъэ зэрэзэ­тырагъэуцожьырэ техническэ пкъыгъохэм яспискэ хагъэхьанхэу. Урысые Федерацием и Президент ащ игъоу ылъэ­гъугъэм къыдыригъэштагъ ыкIи Урысые Федерацием и Правительствэ пшъэрылъ гъэнэфагъэ ащкIэ фишIыгъ.

«Электрон шIыкIэкIэ зафа­гъэзэнэу, цIыфхэм ежь-ежьырэу пкъыгъо гъэнэфагъэр, аппаратыр къыхахынэу, каз­на­чействэмкIэ ахъщэр аратынэу амалхэм алъэхъух. Ащ фэдэу Iофхэр зэпыбгъэфэнхэ плъэкIыщт», — къыIуагъ Владимир Путиным.

Адыгэ Республикэм и ЛIы­шъхьэу КъумпIыл Мурат зэрэхигъэунэфыкIыгъэмкIэ, инклюзивнэ гъэсэныгъэм, зипсауныгъэкIэ щыкIагъэ зиIэ кIэлэцIыкIухэм IэпыIэгъу ягъэгъотыгъэным япхыгъэ Iофыгъохэм рес­публикэм лъэшэу анаIэ щытырагъэты. Лъэпкъ проектхэм, программэу «ЩыIэкIэ Iэрыфэгъу» зыфиIорэм анэмыкIэу волонтерхэри, общественник­хэри ащ фэдэ Iофым къыха­гъэлажьэх.

«Малика Алиевам зызэрафигъэзэгъэ Iофыгъор зэрэзэшIуа­хыгъэм къыгъэлъагъорэр цIыф­хэм, анахьэу кIэлэцIыкIухэм, IэпыIэгъу ягъэгъотыгъэнымкIэ Iофышхо зэрашIэрэр, ведомствэхэм азыфагу зэдэлэжьэныгъэ дэгъу зэрилъыр, волонтер IофшIэныр чанэу зэрэзэхащэрэр ары», — къыIуагъ КъумпIыл Мурат.

Адыгеим и ЛIышъхьэ мызэу, мытIоу Маликэ IукIэнэу хъугъэ, ыIэкIэ ышIыгъэ нэмазщыгъэу пшъэшъэжъыем къы­ритыгъагъэр ащ егъэлъапIэ. Шъугу къэтэгъэкIыжьы дэеу зэ­хэзыхырэ, зылъэгъурэ кIэлэцIыкIухэр зычIэс республикэ коррекционнэ еджэпIэ-интер­натым КъумпIыл Мурат зэрэщыIагъэр, волонтер Iофтхьабзэ ащ зэрэзэрихьагъэр, зигугъу къэтшIыгъэ еджэпIэ-интернатым чIэсхэм ащыщ шым тесынымкIэ IэпыIэгъу зэрэфэ­хъугъэр. Инклюзивнэ гъэсэныгъэм хэхъоныгъэ егъэшIыгъэнымкIэ Iофэу ашIэрэм фэгъэ­хьыгъэу Адыгеим и ЛIышъхьэ еджэпIэ-интернатым зыщэIэм къафиIотэгъагъ.

Адыгеим и ЛIышъхьэ кIэщакIо зэрэфэхъугъэм тетэу инклюзивнэ гъэсэныгъэм зегъэушъом­бгъугъэнымкIэ Гупчэ еджэпIэ­-интернатым щызэхащагъ. Дэеу зэхэзыхырэ кIэлэцIыкIухэм япсауныгъэ зэтегъэуцожьыгъэным фэIорышIэщт Ресурснэ гупчи мыщ къыщызэIуахыгъ.

АР-м и ЛIышъхьэ ипресс-къулыкъу