Хьапсым дэсхэу пшъэдэкIыжь зыхьыхэрэм яфи­ты­ныгъэхэр къэухъумэгъэнхэм фэгъэ­хьыгъэ Iэнэ хъурае Адыгэ Республикэм и Про­куратурэ джырэблагъэ зэхищагъ.

Iофтхьабзэм хэлэжьагъэх республикэм ипрокуратурэ, бзэджэшIагъэ зезыхьагъэхэм пшъэдэкIыжь ягъэхьыгъэнымкIэ федеральнэ къулыкъум и ГъэIорышIапIэу Адыгэ Респуб­ликэм щыIэм, цIыфхэм яфи­тыныгъэхэр къэухъумэгъэнхэмкIэ Адыгеим и Уполномоченнэ, АР-м общест­веннэ лъыплъэнымкIэ икомиссие ялIыкIохэр, журналистхэр.

Хабзэр зыукъуагъэу уголовнэ пшъэдэкIыжь зыхьыхэрэм алъы­плъэгъэнымкIэ АР-м ипрокурор иIэпыIэгъоу Уджыхъу Юрэ Iоф­тхьабзэр къызэIуихызэ къызэриIуагъэмкIэ, хьапсым чIэс­хэм яфитыныгъэхэр, япсауныгъэ ыкIи ящынэгъончъагъэ про­кура­турэм икъулыкъу лъэшэу ынаIэ тет.

Федеральнэ хэбзэгъэуцугъэр зыукъуагъэхэм хэукъоныгъэу ашIыгъэр дэгъэзыжьыгъэныр ыкIи хьапсым чIэсхэм яфитыныгъэхэр зэтегъэуцожьыгъэн- хэр прокурорхэм япшъэрылъ шъхьаIэхэм ащыщ.

Прокурорхэм уполномоченнэ къулыкъухэр ыкIи хэбзэухъу­мэкIо организациехэр ягъусэхэу лъыплъэн IофшIэнэу зэра­хьагъэхэм яшIуагъэкIэ хьапсхэм яматериальнэ амалхэр ыкIи ахэм ачIэсхэм медицинэ-са­нитар фэIо-фашIэхэр зэрафа­гъэцакIэхэрэр хэпшIыкIэу на­хьышIу хъугъэ. Ащ нэмыкIэу, хьапсым чIэсхэм IофшIэн ягъэ­гъотыгъэным иIофыгъохэри янэплъэгъу рагъэкIырэп.

Мы лъэныкъомкIэ яIофшIэн зэрэзэхэщагъэм фэгъэхьыгъэу къэгущыIагъэх бзэджэшIагъэ зезыхьагъэхэм пшъэдэкIыжь ягъэхьыгъэнымкIэ федеральнэ къулыкъум и ГъэIорышIапIэу Адыгэ Республикэм щыIэм ­иIофышIэу Нарт Аскэр, цIыфхэм яфитыныгъэхэр къэухъу­мэгъэнхэмкIэ Уполномоченнэм иаппарат испециалистэу Сергей Фомич, АР-м общест­веннэ ­лъы­плъэнымкIэ икомиссие хэтэу Дмитрий Угрехели­дзе.

КъэгущыIагъэхэр яшIошIхэмкIэ зэхъожьыгъэх, хьапсым чIэсхэу пшъэдэкIыжь зыхьы­хэрэм ыужкIэ нэмыкI бзэ­джэшIагъэхэр зэрамыхьанхэм ыкIи ясоциальнэ фэIо-фашIэхэр афа­гъэцэкIэнхэм фэшI яхэбзэ фитыныгъэхэр къэухъумэгъэнхэм мэхьанэшхо зэриIэр къыхагъэщыгъ.

КIэухым журналистхэм яуп­чIэхэм зэхэщакIохэм джэуапхэр къаратыжьыгъэх.

КIАРЭ Фатим.