БэмышIэу къалэу Шъачэ имэрэу Алексей Копайго­род­скэр ПсышIопэ районым щыIагъ.

Район гупчэм щыпсэу­хэрэм заIуигъэкIагъ, социальнэ мэхьанэ зиIэ объ­ектхэр къыкIухьагъэх, къушъхьэм хэдзэгъэ къуа­джэхэу Хьаджыкъорэ ­Къэлэжъымрэ къыплъы­хьагъэх.

Чъэпыогъу мазэм нэс Хьаджыкъо врачым иIоф­шIапIэ къызэрэщызэIуахыщтыр ащ къыIуагъ. «Къэлэжъыми испортивнэ площадкэ теубгъогъэ искусственнэ уц шхъуантIэр зэблэтхъущт. ИлъэсыкIэ еджэгъур кIэлэцIыкIухэм зырагъэжьэжьыкIэ гупсэфэу площадкэм къыща­чъыхьащт», джащ фэдэ тхыгъэ А. Копайгородскэм къыригъэхьагъ социальнэ сетым щыриIэ нэкIубгъом.

Ащ «Газпромрегион Краснодар» зыфиIорэм игенеральнэ директорэу Алексей Рудневым дыри­Iэгъэ зэIукIэгъум къалэм хэхьэрэ псэупIэхэм, ана­хьэу къуаджэхэм ыкIи къутырхэм газыр къазэра­нагъэсыщт шIыкIэм щытегущыIагъэх. «Газыр цIыф­хэм агъэфедэным мэхьа­нэшхо иI. Тызхэт илъэ­сым псэупIэу Мамедова Щель зыфиIорэм щыпсэу­хэрэм гъэстыныпхъэ шхъуан­тIэр аIэкIэдгъэхьанэу тэгугъэ. Ащ нэмыкIэу, Ашапэрэ Шъхьафитрэ газыр къанэгъэсыгъэным ищыкIэгъэ проектхэм ягъэхьазырын едгъэжьэгъах, — къыIуагъ мэрым. — ЦIыфхэм яшIоигъоныгъэхэр къыдэт­лъытэзэ IофышIэ купыр дгъэнэфэщт, унагъо пэпчъ газрыкIуапIэхэр къызы­ра­щэлIэщтхэ уахътэри яд­гъэшIэщт».