ТIопсэ районым и Мафэ игъэкIотыгъэу хагъэунэфыкIыгъ. МэфэкIым фэгъэхьыгъэу культурнэ, спортивнэ, музыкаль­нэ Iофтхьабзэхэр бэу зэхащэгъагъэх.

Ахэм ащыщэу культурэмкIэ ТIуапсэ и Унэ щырагъэкIокIыгъэр районым ицIыф цIэрыIохэмрэ IофышIэ коллектив чанхэмрэ афэгъэхьыгъагъ.

«ТIопсэ районым ицIыф гъэшIуагъ» зыфиIорэ цIэ лъапIэр мы илъэсым зыфагъэшъошагъэхэр нэбгырих мэхъух: Урысыем икIэлэцIыкIу гупчэу «Орленок» зыфиIорэм игенеральнэ директорэу, Пшызэ шъолъыр IофшIэнымкIэ и ЛIы­хъужъэу Александр Джеус, муниципальнэ образованиеу ТIопсэ районым и Совет итхьаматэу, ООО-у «РН-Туапсинский НПЗ» зыфиIорэм игенеральнэ директорэу Михаил Ермолиным, кIэлэцIыкIу санаториеу «Морская волна» зыфиIорэм идиректорэу Владимир Молчановым, Ныджэпсыхъу икIэлэцIыкIу тхылъеджапIэ ипащэу, Пшызэ шъо­лъыр культурэмкIэ изаслуженнэ Iо­фы­шIэу Любовь Акимовам, илъэс 25-рэ хъугъэу Урысые Федерацием хэдзынхэмкIэ исистемэ Iоф щызышIагъэу, ТIо­псэ район хэдзэкIо комиссием итхьа­матэу Василий Серопол.

* * *

Мыхэм къакIэлъыкIуагъ Урысыем изаслуженнэ тренерэу, ТIуапсэ иапэрэ кIэлэцIыкIу спортивнэ еджапIэ дзюдомкIэ итренерэу, спортымкIэ мастерэу, спортсмен цIэрыIохэр зыгъэсагъэхэу Нэгъуцу Джанболэти. «ТIопсэ районым ицIыф гъэшIуагъ» зыфиIорэ щытхъуцIэр ифэшъуашэу ащ къыратыгъ.