КодэшъхьапIэ культурэм и Унэу дэтым пчыхьэзэхахьэхэр, зэIукIэхэр бэрэ щызэхащэх, мэфэкIхэр щыхагъэунэ­фыкIых.

Къоджэдэсхэр ягуапэу ахэм къякIуалIэх. Аужырэ зэIукIэгъур ТIопсэ районым и Мафэ фэгъэхьы­гъагъ.

Къоджэ клубым кIэлэцIыкIу коллективхэр зы­хагъэлэжьэгъэхэ концерт къыщатыгъ. Хореографическэ ансамблэу «Жъо­гъобын» зыфиIорэм изэ­хэщакIор Тхьагъушъэ Мариет. Ансамблэм зэнэкъо­къухэм, фестивальхэм хагъэунэфыкIырэ чIыпIэ­хэр къащехьых. Ансамблэу «Къушъхьэхэм якIэлэцIыкIухэр» зыфиIоу Даур Са­рыет ыгъасэхэрэми апэ­рэхэм къащагъакIэрэп, орэдыIо коллективэу «Тыгъэм инэбзыйхэр» зыцIэми (ипащэр ХъокIон Фатим) якъэгъэлъэгъонхэр цIыфхэм якIасэхэу къызэхэхьагъэх. КIэлэцIыкIу коллетивхэм яконцерт къызаухым ыуж джэгушхо зэхащагъ, фаехэр зэкIэ къэшъуагъэх, чэфыгъэх.

Культурэм иIофышIэхэм районым имэфэкI фэгъэ­хьыгъэ къэгъэлъэгъонхэри зэхащэгъагъэх. Клубым ипащэу Тхьагъушъэ Ма­риет къызэриIуагъэмкIэ, къэгъэлъэгъоныр гъэшIэгъоны хъугъэ. «ИжъыкIэ унагъом щагъэфедэщтыгъэ хьап-щыпхэр илъэсыбэрэ къэтыугъоигъэх. Мы лъэ­хъаным амыгъэфедэжьырэ пкъыгъохэри ахэм ахэ­лъых. Къуаджэм дэсхэми, хьакIэу къытфакIохэрэми ахэр зыфэдагъэхэр агу къагъэкIыжьыгъэх. Тикъуа­джэ ихъишъэ закъоп пкъы­гъохэм къаIуатэрэр, унагъо пэпчъ тапэкIэ зэрэ­псэущтыгъэр ары.