ГушIуагъорэ гукъаорэ къызэмыкIурэ цIыф щыIэп. ГъашIэ зиIэм лIэныгъи иI. Нэбгырэ пэпчъ игъашIэ гъэшIэгъонэу зэхэлъ, ау щыIэны­гъэр зикIасэр дышъэпс егъэшъуагъэу пстэуми къахэщы, имафэ, иилъэс пэпчъ лъэбэкъу пытэхэмкIэ, гугъэ зафэкIэ тхыхьагъэ мэхъу, пкIэн­чъэу зэрэщымыIагъэр, илъэпкъ, ихэку, иунагъо, илIакъо, цIыфхэр гъунэнчъэу зэрикIэсагъэхэр, зэрэхьалэлыгъэр гъогоу къыкIугъэм къытенэх.

Джащ фэдэ цIыфыгъ зигугъу къэс­шIыщт СтIашъу Хьазрэт. Непэ ар къытхэтыжьэп, Тхьэм джэ­нэт лъапIэр къырет.

ЩымыIэжьми, цIыфыр зыгу къи­нэжьырэр игупсэхэм язакъоп, дэгъоу зышIэщтыгъэхэми, Iоф дэзышIагъэхэми ащыгъупшэрэп. Мэзэ заулэ хъугъэ Аскэр дунаим зехы­жьыгъэр. ШIукIэ, дахэкIэ утегущыIэныр къылэжьи идунай ыхъожьыгъ. Хьазрэт ыгу зэIухыгъэу цIыфхэм зэрапэгъокIырэм къыхэкIыкIэ нэIосабэ иIагъ. Илъэсыбэрэ газ Iофхэм ахэтэу Гъобэкъуае Iоф щишIагъ, ау газыпкIэр зымытырэмэ ар аIэкIамыгъэхьанэу, пиупкIынхэу къыраIо зэхъум, «Сэ ар чылэм щыщмэ сфя­шIэщтэп» ыIуи, къыIукIыжьы­гъагъ. Ащ ыуж IофшIэпIэ зэфэ­шъхьафхэм ащылэжьагъ. Зыпылъ Iофыр щытхъу хэлъэу сыдигъуи ыгъэцэкIагъ. Хьазрэт цIыф хьа­лэлыгъ, гукIэгъуныгъэ-гуфэбэныгъэ­шхо хэлъыгъ, чэфыгъ, зэфагъэ, сэ­мэркъэу дахэр икIэсагъ.

Унэгъо дахэ къыщинагъ. Зэдырагъаштэу ишъхьэгъусэрэ ежьыррэ ялъфыгъэхэр зэдапIугъэх, зэдалэ­жьыгъэх.

Нэбгырэ пэпчъ дунаим псапэу щишIагъэр ахърэтым къыщыIокIэжьы аIошъ, Алахьым джэнэт лъапIэр Хьазрэт къырет, ишъхьэгъуси илъфыгъэхэми илъэсыбэ къарарегъэгъашI. Тыпфэраз, Хьазрэт, шIукIэ тыгу уилъыщт!

СтIашъу Нуриет. Гъобэкъуай.