Адыгеим и ЛIышъхьэу КъумпIыл Мурат Мыекъопэ районым ипсэу­пIэхэу анахьэу ощхышхохэм зэрар зэрахыгъэхэм тыгъуасэ ащыIагъ. Республикэм ипащэ псэупIэхэу Курджипскэмрэ Абдзэхэхьаблэрэ адэт унэхэу псыр зыкIэуагъэхэр зэригъэлъэгъугъэх.

Адыгэ Республикэм и ЛIы­шъхьэ игъусагъэх УФ-м и Президент и Полномочнэ лIыкIоу КъФШъ-м щыIэм иаппарат Адыгэ РеспубликэмкIэ ифе­деральнэ инспектор шъхьаIэу Сергей Дрокиныр, АР-м псэо­лъэшIынымкIэ, транспортымкIэ, унэ-коммунальнэ, гъогу хъыз­мэтыкIэ иминистрэу Валерий Картамышевыр, къоджэ псэу­пIэхэм япащэхэр.

Мыекъопэ районым ипащэ ипшъэрылъхэр зыгъэцакIэу ТIа­тIыжъ Анзоррэ Урысыем и МЧС Адыгэ РеспубликэмкIэ и ГъэIорышIэпIэ шъхьаIэ ипащэу Станислав Илющенкэмрэ къызэ­ратыгъэмкIэ, поселкэу Каменномостскэм, къутырэу Шунтук, псэупIэхэу Курджипскэмрэ Аб­дзэхэхьаблэрэ адэт уни 106-мэ псыр акIэуагъэу комиссием ыгъэунэфыгъ. Псыкъиуным станицэу Курджипскэм дэт унэ 12-мэ, Абдзэхэхьаблэ дэт уни­тIумэ зэрар арихыгъ. НепэкIэ псыр зэкIэкIожьыгъ. Социальнэ мэхьанэ зиIэхэ псэуалъэхэм псыр къакIэуагъэп.

Адыгеим и ЛIышъхьэ псыр къызыкIэогъэ унэхэр зэригъэлъэгъугъэх. КъумпIыл Мурат Мыекъопэ районым щыпсэу­хэрэм адэгущыIэзэ, къоджэ псэу­пIэхэм япащэхэм пшъэрылъ заулэ афишIыгъ ощхым зэрар зэрихыгъэхэм IэпыIэгъу ягъэгъотыгъэным, хъуатэхэр, псэу­пIэхэм япсэуалъэхэу агъэфе­дэгъэ псыр зэрылъадэхэрэр гъэкъэбзэгъэнхэм афэгъэхьыгъэу. Партиеу «Единэ Россием» ишъолъыр къутамэ тхьамыкIагъо къызэхъулIагъэхэм афигъэхьазырыгъэ Iалъмэкъхэу гъомылапхъэхэр зэрылъхэр зэраIэкIагъэхьащтхэр пащэм къыIуагъ.

«ГухэкI нахь мышIэми, мызэу, мытIоу мыщ фэдэ чIыопс тхьамыкIагъохэм тарихьылIэу хъугъэ. Ащ фэдэ лъэхъанхэм тызэ­рэзекIон фаери тэшIэ. Анахь шъхьаIэр цIыфхэр тхьамыкIа­гъом зэрэхэмыкIодагъэхэр ары. Зиунэ фыкъуагъэхэми, зихапIэ псыр къыкIэуагъэхэми ахъщэ IэпыIэгъу аIукIэщт.

Муниципальнэ образованиемрэ къоджэ псэупIэ­хэм­рэ япащэхэм тхьамыкIагъом къызди­хьыгъэхэм ядэгъэзыжьынкIэ Iофхэр зэрэзэшIуахыхэрэм гъунэ лъафын фае», — къыIуагъ КъумпIыл Мурат.

Мыекъопэ рай­оным щыпсэухэу зи­унэ псы къызыкIэхьагъэхэм сомэ мин 50 зырыз, зихатэ псым ыхьыгъэ­хэм сомэ мини 10 зырыз аратыщт.

Республикэм и ЛIышъхьэ культу­рэмкIэ Унэу Абдзэ­хэхьаблэ дэтым щы­Iагъ. Къэралыгъо программэу «Лъэныкъо пстэури къы­далъытэзэ къуа­джэ­хэм хэхъоныгъэ ягъэшIыгъэныр» зы­фиIорэм диштэу культурэмкIэ Унэр агъэцэкIэжьы. НепэкIэ унашъхьэмрэ шъхьангъупчъэхэм­рэ зэблахъугъахэх, унэ гупэм изэтегъэ­псыхьан ыуж итых, унэ кIоцI IофшIэнхэр зэшIуахых, инженер псэуа­лъэхэр зэблахъух.

КъумпIыл Мурат къоджэ псэу­пIэмрэ подряднэ организациемрэ япащэхэм адэгущыIагъ. Республикэм и ЛIышъхьэ псэо­лъэшIын IофшIэнхэмкIэ пIалъэу щыIэхэр къыдалъытэнхэм, культурэмкIэ Унэм къыпэIулъ чIыпIэхэри зэтырагъэпсыхьэхэзэ псэуалъэр атыным мэхьанэшхо зэриIэр къыхигъэщыгъ.

АР-м и ЛIышъхьэ ипресс-къулыкъу

Сурэтыр А. Гусевым тыри­хыгъ.