Урысые Федерацием и Правительствэ и Тхьаматэ игуадзэу Дмитрий Чернышенкэм Урысые Федерацием зекIоным зыщегъэушъомбгъугъэнымкIэ и Правительственнэ комиссие изэхэсыгъо тыгъуасэ зэрищагъ.

Видеоконференцие шIыкIэм тетэу кIогъэ Iофтхьабзэм ­Адыгэ Республикэм и ЛIышъхьэу Къум­пIыл Мурат хэлэжьагъ.

Зэхэсыгъор къызэIуихызэ Дмитрий Чернышенкэм хигъэу­нэфыкIыгъ лъэпкъ проектэу «Туризм и индустрия госте­приимства» зыфиIорэм игъэ­хьазырынкIэ ыкIи игъэпсынкIэ пшъэрылъым мэхьанэшхо зэриIэр. Мы проектыр щыIэны­гъэм гъэцэкIагъэ зыщыхъукIэ, зекIон лъэныкъом иIофхэм язы­тет зэхъокIыныгъэ ин фэхъун ылъэкIыщт.

Лъэпкъ проектым тегъэпсы­хьагъэу чIыпIэхэм хэхъоныгъэу ашIыщтым иIофыгъо хэушъхьафыкIыгъэу тегущыIагъэх. Адыге­им гъэпсэфыпIэу «Лэгъонакъэ» зэрэщагъэпсыщтым ипроекти ащ хагъэхьагъ. Адыгеим и ЛIы­шъхьэу КъумпIыл Мурат зэхэсыгъом къыщиIуагъ проектыр гъэцэкIагъэ зыхъукIэ амалышIу­хэр къытынхэ зэрилъэкIыщтыр.

Шъугу къэдгъэкIыжьын: дунэе экономическэ форумэу Петербург щыкIуагъэм Адыгэ Рес­пуб­ликэм иминистрэхэм я Кабинетрэ НАО-у «Гъэхъунэ Плъы­жьыр» зыфиIорэмрэ зэзэгъыныгъэ щызэдашIыгъагъ Адыгеим инвестиционнэ проектышхоу «Всесоюзный горный экокурорт «Лагонаки» зыфиIорэр щыгъэпсыгъэным фэгъэхьыгъэу.

Ащ ыпэкIэ УФ-м и Пра­вительствэ и Тхьаматэу Ми-хаил Мишустиным ыIапэ кIи­дзэ­жьыгъ Лэгъонэкъэ биосфернэ полигоным игъэпсын фэ­гъэ­хьыгъэ унашъом. Урысыем и Президентэу Владимир Путиным Федеральнэ Зэ­IукIэм фигъэхьыгъэ Джэпсалъэм къыщыхигъэщыгъагъ чIы­опсым ибаиныгъэхэр къы­далъытэхэзэ, шъолъырхэм зекIоным хэхъоныгъэ щя­гъэшIыгъэным мэхьанэшхо зэриIэр. Къушъхьэлъэ гъэпсэфыпIэу «Лэгъона­къэ» изэхэщэнкIи лъапсэу хъурэр, къызыпкъырыкIыхэрэр а баиныгъэхэр къэухъумэгъэнхэр ары. 2025-рэ илъэсым ыкIэм ехъулIэу проектыр гъэцэ­кIагъэ хъунэу мэгугъэх. Ащ амал къытыщт илъэсым къыкIоцI нэбгырэ мин 500-м нахь мымакIэу, тыкъэзыуцухьэрэ дунаими зэрар фэмыхъухэу, а гъэпсэфыпIэм къекIо­лIэнхэу.

Зэхэсыгъом илъэхъан Адыгеим и ЛIышъхьэ къы­зэриIуагъэмкIэ, лъэпкъ проектэу «Туризм и индустрия гостеприимства» зыфиIорэм республикэр зэрэхэлэжьэщтым стратегическэ мэхьанэшхо иI. Проектэу «Лэгъонакъэ» пхырыщыгъэным иамал а лъэпкъ проектым къы­тыщт. ЗекIоным ыкIи зэ­рэпсаоу экономикэм а про­ектым ифэмэ-бжьы­мэшхо атырихьащт.

ШIуагъэу къытыщтым укъыпкъырыкIызэ къэпIон хъумэ, Адыгеим IофшIэпIэ чIыпIэ мини 2-м фэдиз кIэу иIэ хъущт, шъолъырым зэхэубытэгъэ про­дукциеу къыхьыжьырэр проценти 7-кIэ нахьыбэ хъущт. ЗэкIэмкIи инвестициехэр сомэ миллиард 23-м нэсыщтых. Лъэпкъ проектым ахъщэу пэIухьащтым къыпкъырыкIыхэзэ гъэпсэфыпIэм иинфраст­руктури къыдалъытэщт. Лъэпкъ проектэу «Туризм и индустрия гостеприимства» зыфиIорэм хагъэ­хьащт Iофыгъохэу игъоу алъэгъухэрэр Адыгеим ипащэхэм агъэхьазыры­гъахэх. Ахэм зыкIэ ащыщ къалэу Мыекъуапэ, псэу­пIэу Ханскэм дэжь, аэропорт щыгъэпсыгъэным иIо­фыгъо.

«НепэкIэ илъэсым къы­кIоцI яунэе транспорт ис­хэу е куп гъэнэфагъэхэу экскурсионнэ автобусхэмкIэ республикэм нэбгырэ мин 460-рэ фэдиз къехьэ. Аэропортэу цIыфхэр зезыщэхэрэ самолетхэр къызщытIысыщтхэм зекIо­хэу къяолIэщтхэр фэдитIу хьазыркIэ нахьыбэ хъущт. Ащ автомобиль гъогухэм яинфраструктури зэри­хъокIыщт, ахэм арыкIорэ транспортым хэпшIыкIэу къыщигъэкIэщт. Гъэпсэ­фыпIэ иныр тиIэ зыхъукIэ, цIыфхэу къихьэхэрэри на­хьыбэ хъущтых, арышъ, гъогузекIоныр нахь къэ­хьылъэщт. Джащ пае аэропортыр непэрэ уахътэм къыпкъырыкIырэ Iофыгъоу тэлъытэ», — къыхигъэ­щыгъ КъумпIыл Мурат.

ГъэпсэфыпIэу «Лэгъонакъэ» иинфраструктурэ епхыгъэ Iофыгъохэм язэшIохынкIэ УФ-м и Вице­-премьер IэпыIэгъу къызэрафэхъурэм пае зэрэ­фэ­разэр Адыгеим и ЛIы­шъхьэ къыхигъэщыгъ. Мы лъэныкъомкIэ шIуагъэ хэ­лъэу республикэр адэлажьэ Ростуризмэм, Урысыем и Правительствэ культурэмкIэ, спортымкIэ, зекIонымкIэ ыкIи лъэпкъ политикэмкIэ и Департамент, джащ фэдэу Урысые Федерацием и Корпорациеу «Туризмэм». Лъэпкъ проектэу «Туризм и индустрия гостеприимства» зыфиIорэм тегъэпсыхьагъэу нэмыкI проектхэу республикэм щыгъэцэкIагъэ хъущтхэми атегущыIагъэх.

«ГъэпсэфыпIакIэр Адыге­им иIэ зыхъукIэ, Урысыем джыри цIыфхэр нахь къызфэзыкъудыин зылъэкIыщт чIыпIакIэхэм зэрахэхъощтым тицыхьэ телъ. 2035-рэ илъэсым нэс Урысыем зекIонымкIэ хэ­хъоныгъэу ышIыщтым и Стратегие къыщыгъэнэфэгъэ пшъэрылъхэр зэшIохыгъэнхэмкIи ащ ишIуагъэ къэкIощт. ЛыжэхэмкIэ къу­шъхьэлъэ чIыпIэхэм къащызыкIухьэ зышIоигъо­хэм япчъагъэ фэдитIукIэ нахьыбэ хъуным а пстэури фэIорышIэщт», — къы­Iуагъ Адыгеим и ЛIышъхьэ.

УФ-м и Правительствэ и Тхьаматэ игуадзэ Адыге­им икъушъхьэлъэ чIыпIэ­хэм амалышIу къатын зэралъэкIыщтыр, Лэгъонакъэ къыпэIулъ чIыпIэхэм язэтегъэпсыхьан мэхьанэшхо зэриIэр къыхигъэ­щыгъ ыкIи джащ фэдэу ежь ышъхьэкIи IэпыIэгъу къызэрафэхъущтымкIэ къы­гъэгугъагъэх. Аэропортым ишIын епхыгъэ Iофыгъо­хэм нахь игъэкIотыгъэу ахэплъэщтых, инвестицие­хэр ащкIэ къызфэгъэфе­дэгъэнхэм иамали тегущыIэщтых. УФ-м тыкъэзыу­цухьэрэ дунаим икъэухъу­мэнкIэ и Министерствэ гъэпсэфыпIэхэм ягъэпсын тыкъэзыуцухьэрэ дунаир зэщымыгъэкъогъэнымкIэ, ар къэухъумэгъэнымкIэ Iо­фыгъоу щыIэхэм ынаIэ атыригъэтын фае. Урысыем и Къыблэ иавтомобиль гъогухэм язэтегъэпсы­хьан­кIэ, Темыр Кавказым ыкIи ХышIуцIэ Iушъом ягъэпсэфыпIэхэм транспорт гъогухэр къякIолIэнхэ зэрэфаемкIэ Дмитрий Чер­нышенкэм пшъэрылъхэр къыгъэуцугъэх.

АР-м и ЛIышъхьэ ипресс-къулыкъу