Непэ сыхьатыр 12-м Урысые Федерацием и Президентэу Владимир Путиныр занкIэу къэралыгъом щыпсэухэрэм адэгущыIэщт.

Телеканалхэу «Апэрэм», «Уры­сыер 1», «Урысыер 24-рэ», «Мир» зыфиIохэрэм, НТВ-м, ОТР-м, радиостанциехэу «Маякым», «Вести FM» ыкIи «Урысыем ирадио» ар занкIэу къатыщт.

Непэрэ уахътэм ехъулIэу къэралыгъом щыпсэурабэмэ Президентым яупчIэхэр фа­гъазэхи арагъэтхыгъахэх, ау зэнкIэ зэдэгущыIэгъур окIофэ шIоигъоныгъэ зиIэ пстэуми ар къызфагъэфедэн алъэкIыщт амал зэфэшъхьафхэмкIэ:

— хэушъхьафыкIыгъэ мо­бильнэ приложениеу «Москва — Путину» зыфиIорэмкIэ. Ащ ишIуагъэкIэ эфирыр кIо пэтзэ видеозэпхыныгъэ студием дэп­шIышъущт зэнкIэ зэдэгущыIэ­гъум илъэхъан;

— программэу moskva-putinu.ru зыфиIорэмкIэ;

— социальнэ хъытыухэу «ВКонтакте» ыкIи «Одноклас­сники»;

— ыпкIэ зыхэмылъ СМС ыкIи ММС зэпхыныгъэхэмкIэ номерэу 0-40-40 зыфиIорэмкIэ,

ау зэпхыныгъэр урысые операторым пышIэгъэн, упчIэр урысыбзэкIэ тхыгъэн, хьарыф 70-м мынахьыбэн фае;

— телефонэу 8 (800)200-40-40 УрысыемкIэ ыкIи +7 (499)550-40-40, +7 (495)539-40-40 IэкIыбым щыIэхэм апае.

Шъугу къэдгъэкIыжьын, апэрэ зэнкIэ зэдэгущыIэгъур зыщыIагъэр 2001-рэ илъэсырт ары, сыхьатитIурэ такъикъ тIо­кIырэ Владимир Путиным цIыф­хэм зэдэгущыIэгъу адыриIагъ. 2013-рэ илъэсым а уахътэр зэкIэми анахьыбагъ — сыхьати 4-рэ такъикъ 47-рэ икIыхьэгъагъ. Пандемием ыпкъ къикIыкIэ икIыгъэ илъэсым зэнкIэ зэдэгущыIэгъур зэха­щагъэп, ау къэралыгъом ипащэ пресс-конференциешхоу тыгъэгъазэм и 17-м къытыгъэм зэнкIэ зэдэгущыIэгъум ишапхъэхэр щыгъэфедэгъагъэх.