Мыекъопэ гурыт еджапIэу N 7-м хьисапымкIэ икIэлэегъадж Сергей Левченкэр.Ежьыри ныбжьыкI, Iоф зишIэрэри бэшIагъэп, ау Адыгеим щызэлъашIэрэ цIыф, республикэмкIэ анахь кIэлэегъэджэ дэгъоу икIыгъэ илъэсым ар къыхахи, Все­российскэ зэнэкъокъум иаужырэ уцугъо хэлэжьагъ.

Iоф зишIэрэр илъэситIу нахь мыхъузэ, кIэлэ ныбжьыкIэм ащ фэдэу ыцIэ Iугъэ. Къэралыгъом ипащэу Владимир Путиным Iу­кIагъэхэм, къызыфэгу­шIуагъэхэм ар ащыщ.

Сергей Левченкэр апэрэ категорие зиIэ кIэлэ­егъадж, шIыкIэ-амалыкIэ гъэшIэгъонхэр егъэфедэх. Ащ дакIоу Адыгэ къэра­лыгъо университетым хэт республикэ естественнэ­-хьисап еджапIэм Iоф щешIэ. «Сабыир ебгъэджэным къикIырэр зытегъэ­псыхьагъэр къыгъэлъэгъонымкIэ амалхэр ептынхэр ары», — еIо кIэлэегъэджэ ныбжьыкIэм.

Левченкэр республикэмкIэ апэ вакцинэр зыхязыгъэлъхьагъэхэм ащыщ.

— ИкIыгъэ илъэсым ичъэ­пыогъу мазэ сэ вак­цинацие сшIыгъэ. А лъэхъа­ным Москва сыкIонэу щытыгъ кIэлэегъаджэхэм я Всероссийскэ зэнэкъокъу икIэух уцугъо сыхэлэжьэнэу. СэркIи, сызыхэхьащтхэ цIыфхэмкIи, сисэнэхьатэгъу­хэу сызэнэкъокъущтхэмкIи зэпахырэ узыр щынэгъончъэным мэхьанэшхо иIагъ. Ари зы лъэныкъу, ау хэтрэ цIыфи ежьыри зыкъыухъу­мэжьын, къыпэблэгъэ цIыф­хэми афэсакъын фае. Сэ сшъхьэкIэ унагъо сиIэу щы­тэп, ау ныбжь хэкIотагъэ зиIэ сянэ-сятэхэр щынэ­гъончъэу псэунхэм, езгъа­джэхэрэм сиягъэ ямыкIыным пае къыстефэрэр сшIэн фае. Ар нэбгырэ пэпчъ типшъэрылъ. Обществэм ипсауныгъэ нэбгырэ пэпчъ къытэлъытыгъ, — еIо Левченкэм.

Сихъу Гощнагъу.