Сэнэхьат гъэсэныгъэ языгъэгъотырэ еджапIэхэм, апшъэрэ еджапIэхэм тхылъхэр зэраштэрэ шIыкIэр къафызэхафынэу нэбгырэ заулэмэ мы аужырэ тхьамафэхэм шъолъырым игъэIорышIэнкIэ Гупчэм иIофы­шIэ­хэм зафагъэзагъ. Гурыт еджапIэхэр къэзыухыхэрэм документхэр зэраIахыщт, ушэтынхэр зэратыщт шIыкIэм зэхъокIыныгъэ фэхъугъэмэ ахэм ашIэ ашIоигъуагъ. Урысыем наукэмкIэ ыкIи апшъэрэ гъэсэныгъэмкIэ и Министерствэ къызэритыгъэмкIэ, апшъэрэ еджапIэхэми, сэнэхьат гъэсэныгъэ языгъэгъотырэ организациехэми шэпхъа­кIэхэм атетэу гурыт еджапIэхэр къэзыухыгъэхэр мыгъэ аштэщтых.

Колледжхэмрэ апшъэрэ еджа­пIэхэмрэ студентхэр целевой шIыкIэм тетэу зэращырагъа­джэрэм ехьылIэгъэ положе­ниякIэм 2021-рэ илъэсым щылэ мазэм и 1-м къыщегъэжьагъэу кIуачIэ иIэ хъугъэ. Бюджет чIыпIэ пчъагъэу шъолъырым къыхигъэкIыщтымкIэ къэралыгъо хабзэм икъулыкъухэми яупчIыжьыщтых. Гъэсэныгъэ языгъэгъотырэ организацием целевой шIыкIэм тетэу рагъэ­джагъэм IофшIэпIэ чIыпIэ къызыфыхимыгъэкIыкIэ, студентым иегъэджэн ахъщэу пэIухьагъэм фэдиз бюджетым ригъэхьажьын фаеу хъущт.

Бакалавриатым, специалитетым, магистратурэм зэраштэщт­хэ шIыкIэми зэхъокIыныгъэхэр фэхъугъэх. Къэралыгъо ушэтын зыкIхэмкIэ баллэу къахьыгъэм елъытыгъэу апшъэрэ еджапIэм аштэщтых. Атын фэе экзаменхэр апшъэрэ еджапIэ пэпчъ ежь-ежьырэу къыхехы, абитуриентхэр зыхэдэнхэ алъэкIыщт ушэтын заули ащ егъэнафэ. Фи­зикэмкIэ е информатикэмкIэ, химиемкIэ е биологиемкIэ, тарихъымкIэ е обществознаниемкIэ ушэтын зыкIхэм баллэу къащахьыгъэм елъытыгъэу ежь­хэмкIэ нахь федэр абитуриентхэм къыхахы.

ТапэкIэ сэнэхьат пэпчъкIэ эк­заменэу атын фаехэр илъэс къэс апшъэрэ еджапIэхэм агъэ­нафэщтыгъэх. Ау апшъэрэ еджа­пIэхэмкIэ ахэр зэфэдагъэхэп. ГущыIэм пае, информационнэ технологиехэр зыIэ къизыгъахьэ зышIоигъохэм зы уни­верситетым физикэмкIэ, нэмыкIым информатикэмкIэ баллхэр рахьылIэнхэ фэягъэ. Гурыт еджапIэр къэзыухыгъэу апшъэрэ еджэпIэ заулэмэ зидокументхэр аIэкIэзыгъахьэ зышIоигъом предмет пчъагъэмэ зафигъэхьазырын фаеу хъу­щтыгъэ.

ШэпхъакIэхэм атетэу мыгъэ къыщегъэжьагъэу ЕГЭ-мкIэ ушэтынитIумэ якIэуххэр шIокI имыIэу къыдалъытэщтых, ащ нэмыкIэу предмет заулэмэ ахэдэнэуи абитуриентхэм амал яIэщт.

— Абитуриентхэм яштэнкIэ апшъэрэ еджапIэхэр 2021-рэ илъэсым шэпхъакIэхэм ате­хьагъэх. Документхэр зыфатын алъэ­кIыщт сэнэхьат пчъагъэр зыфэдизыр зыгъэнафэрэр ежь апшъэрэ еджапIэр ары. Апшъэрэ еджапIэхэм япчъагъэ зытетыгъэм тетэу къэнэжьыгъ, ахэр 5 зэрэхъурэр. Абитуриентхэм къыхахын алъэкIыщтыр сэнэ­хьати 10-м къехъу хъущтэп, — къыIуагъ Адыгэ Республикэм гъэсэныгъэмрэ шIэныгъэмрэкIэ и Министерствэ испециалист шъхьаIэу, иэкспертэу Штымэ Зарет.

Апшъэрэ еджапIэм сэнэхьат пчъагъэу къаритырэр еджапIэм иофициальнэ сайткIэ е приемнэ комиссиемкIэ абитуриентхэм зэрагъэшIэн алъэкIыщт.

АшъхьэкIэ зэрарахьылIэрэм нэмыкIэу, пэIудзыгъэ шIыкIэм тетэуи документхэр аIэкIагъэ­хьанхэ алъэкIыщт. Очнэу еджэ зышIоигъохэр чэзыуитIумэ апхы­рыкIын фаеу хъущтых. Апшъэрэ еджапIэхэм аштагъэхэм яспискэхэр мафэм къыкIоцI зэ на­хьыбэрэ зэбламыхъущтыгъэмэ, джы гъогогъуитфым нахь мымакIэу ахэр агъэкIэжьыщтых. Апшъэрэ еджапIэхэм зэра­чIа­хьэрэ шIыкIэм ехьылIэгъэ къэбархэр ахэм ясайтхэм арагъо­тэщтых.

Мэкъуогъум и 20-м нахь мыгужъоу мыгъэ документхэр аштэхэу аублэщт. Студентхэм яспискэхэр бэдзэогъум и 27-м къыхаутыщтых. ШышъхьэIум и 5-м нахь мыгужъоу апшъэрэ еджапIэхэм аштагъэхэмкIэ унашъохэр къыдагъэкIыщтых.

Къихьащт илъэсым университетхэм абитуриентхэр зэра­штэщт шIыкIэр шэкIогъум и 1-м нахь мыгужъоу яофициальнэ сайт къырагъэхьан, тыгъэгъа- зэм и 31-м ехъулIэу очнэу, очнэ-заочнэу рагъэджэщтхэм яштэн аухын фае.

ШэпхъакIэхэм зэратехьэ­хэрэмкIэ къэбархэр апшъэрэ еджапIэхэм ясайтхэм арагъо­тэщтых.