КIэлэцIыкIоу сэкъатныгъэ зиIэхэм ыкIи илъэс 18-м зыныбжь шIокIыгъэу лъыплъэн зищыкIагъэхэм янэ-ятэхэм я Урысые организацие ишъолъыр къутамэ ПенсиехэмкIэ фондым и Къутамэу АР-м щыIэм иIофышIэхэр рагъэблэгъэгъагъэх.

Пенсиехэм ягъэнэфэнкIэ ыкIи якIэлъытыкIыжьынкIэ отделым ипащэу Браукъо Маринэрэ социальнэ ахъщэ тынхэм афэгъэ­зэгъэ отделым ипащэу ХьацIыкIу Маринэрэ зипсауныгъэ пыч фэхъугъэхэм ящыIакIэ нахьышIу хъуным фытегъэпсыхьагъэу пенсиехэм афэгъэхьыгъэ хэ­бзэгъэуцугъэм къыщыдэлъыта­гъэхэм къатегущыIагъэх.

Специалистхэм къызэраIотагъэмкIэ, кIэлэцIыкIоу сэкъатныгъэ зиIэм ыныбжь илъэс 18-м нэсыфэкIэ социальнэ пенсие къыратынэу къытефэ. Зыныбжь имыкъугъэм е ипсауныгъэ изытеткIэ зиамал къымыхьыщтым ычIыпIэкIэ янэ, ятэ е нэмыкIэу лъыплъэрэм лъэIу тхылъыр ытын ылъэкIыщт.

Къызыхъугъэм къыщыубла­гъэу сэкъатныгъэ зиIэм янэ е ятэ ыныбжь нэмысызэ на­хьы­жьэу пенсием кIонэу амал иI. Бзылъфыгъэм кIэлэцIыкIум ыныбжь илъэси 8 охъуфэкIэ ыпIугъэу, IофшIэгъэ илъэсхэр 15-м къыщымыкIэу иIэхэмэ, ежь ыныбжь илъэс 50 зыхъукIэ пенсиер ыгъэпсын фит. Хъулъфыгъэри илъэс 20-м къыщымыкIэу IофшIэгъэ илъэсхэр ри­гъэкъугъэхэу, ыныбжь илъэс 55-рэ хъугъэмэ, мы фэгъэкIотэным къыхеубытэ. Джащ фэдэу къызыхъугъэм къыщыублагъэу сэкъатныгъэ зиIэр лъыплъэнэу зыштагъэхэми нахьыжьэу пенсием кIон амал яI, ау ахэми мы шапхъэхэр анэсых.

Социальнэ IэпыIэгъухэр сэкъатныгъэ зиIэхэм ямызакъоу ахэм алъыплъэхэрэм апаи законым къыщыдэлъытагъэх.

— Сэкъатныгъэ зиIэ кIэлэцIыкIоу зыныбжь илъэс 18-м нэмысыгъэм е къызыхъугъэм къыщегъэжьагъэу апэрэ купым хахьэрэ сэкъатныгъэ зиIэм лъы­плъэрэ янэу е ятэу Iоф зымышIэрэм мазэ къэс ахъщэ тынэу сомэ мини 10 къыфэ­кIонэу фагъэнафэ. Нымрэ тымрэ анэмыкI лъэплъэмэ, ащ сомэ 1200-рэ къыфэкIо. Ахэм ямызакъоу, а уахътэу зыщылъы­плъэрэр иIофшIэгъу илъэсхэм ахэлъытагъэ мэхъу, — къы­Iуагъ Браукъо Маринэ.

Мазэ къэс къатырэ ахъщэм игъэнэфэн ыкIи социальнэ ­фэIо-фашIэхэм (набор социальных услуг) ахахьэхэрэм къа­тегущыIагъ ХьацIыкIу Маринэ.

— Социальнэ фэIо-фашIэхэм ачIыпIэкIэ ахъщэ къыуатынэу пшIын е ахэм ащыщэу къып­фагъэцакIэмэ пшIоигъор къы­хэпхын плъэкIынэу щыт. Ащ пае УФ-м ПенсиехэмкIэ ифонд лъэIу тхылъкIэ зыфэбгъэзэн фае, — къыIуагъ ащ. — Тхы­лъыр фондым икъулыкъоу цIыф­хэм Iоф адэзышIэрэм щыптымэ хъущт, МФЦ-м уекIуалIэми пIахыщт, ау ахэм пэшIорыгъэшъэу защябгъэтхын фае. Интернетыр къызфэбгъэфедэнышъ, фондым инэкIубгъо е къэра­лыгъо фэIо-фашIэхэм япортал ащыптын амали щыI.

Мыхэм анэмыкIэуи пенсием цIыфхэр зыщыкIорэ ныбжьым, сэкъатныгъэ зиIэхэм е нэжъ­-Iужъхэм алъыплъэхэрэм компенсациеу къафакIорэм, ны мылъкум игъэфедэн, нэмыкIхэм ягугъу ашIыгъ. Пстэумэ ауж ПенсиехэмкIэ фондым и Къута­мэ испециалистхэм упчIэу афа­гъэзагъэхэм джэуапхэр къа­ратыжьыгъэх.

Нэбгырэ 20 фэдиз мы Iоф­тхьабзэм къекIолIэгъагъ.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу