Модэр зыгъэуцоу, ащ Iоф дэзышIэхэрэ цIыфхэр лъэгэпIэ чыжьэхэм атетхэу къытщэхъу. Ахэр тэ къыддеджагъэхэу тегупшысэрэп. Мы лъэ­ны­къомкIэ анахьэу къахэщырэ модэм иунэу «Chanel» зыфиIорэм Iоф щызышIэрэ Марина Ухарских Адыгэ къэралыгъо университетым щеджагъ. Францием щыIэныгъэ гъогум зэрихьыгъэм тхыгъэмкIэ шъущыдгъэгъозэщт. Маринэ Краснодар краим къыщыхъугъ. Къутырэу Бузиновскэм я 9-рэ классым нэс щеджагъ, нэужым станицэу Выселки я 10 — 11 классхэр къыщиухыгъэх.

— Еджэныр сыдигъуи сикIэсагъ, ны-тыхэм сырагъэзэу къыхэкIыщтыгъэп. Сыдигъуи кIэ горэ зэзгъэшIэным сэр-сэрэу сыфакIощтыгъ, — къеIуатэ Марина Ухарских. — IэкIыб къэралыгъуабзэхэр зэзгъэшIэнхэу сыдэущтэу сыкъыфэкIуагъа? Классикэм хахьэхэрэ тхыгъэхэр зэрамыдзэкIыжьыгъэхэу, ежь тхакIохэм зэратхыгъэм се­джэшъун амал зэрэсиIэщтым гухахъо хэзгъуатэщтыгъэ.

ТигущыIэгъу я 9-рэ классым исэу инджылызыбзэ аригъэ­хьынэу кIэлэегъэджэ ныбжьыкIэ къафагъэкIуагъ. IэкIыб къэралыгъуабзэхэр зыщызэрагъа­шIэрэ факультетыр къыухыгъэ къодыягъ ыкIи ащ ущеджэныр зэрэдэгъур кIэлэеджакIохэм къа­фиIуатэщтыгъ. Маринэ ащ икъэбархэм псынкIэу халъэсагъ. Ау теубытэгъэ пытэ ышIынэу джыри дэгуIэщтыгъэп. НэмыкI факультетхэми яплъыщтыгъ, зэ­ригъафэщтыгъэх. Я 11-рэ классым зэтыгъо къэралыгъо ушэтыным иуахътэ къызэсым, инджылызыбзэр ытынэу, ыгу илъ хъугъэ лъэныкъор къыхихынэу пытэу тыриубытагъ.

Адыгэ къэралыгъо университетым IэкIыб къэралыгъуабзэхэр зыщызэрагъашIэрэ факультетым Маринэ чIэхьагъ. Апэрэ курсыр къызиухыкIэ Краснодар зигъэзэжьын гухэлъхэри иIагъэх, ау шIэныгъэу университетым щигъотыхэрэм агъэразэу, икIэлэ­егъаджэхэм опыт ин зэраIэкIэ­лъым ыумэхъыгъ ыкIи нэмыкI кIонэу фэежьыгъэп.

— Бзэр зиныдэлъфыбзэ кIэлэегъаджэхэри тиIагъэх, ахэм урагъэджэныр насыпыгъэшхокIэ сэлъытэ, — къеIуатэ Маринэ. — Илъэс къэс нахь гъэшIэгъон хъущтыгъэ ыкIи нэмыкI университет згъэзэным сегупшысэжьыщтыгъэп. Факультетым истуденческэ совет ипащэу сагъэнэ­фэ­нэу къысаIуагъ. Ар сфэгъэцэ­кIэщтмэ сымышIэу бэрэ сегу­пшысагъ. Нэужым пшъэрылъэу къыс­фагъэшъошагъэр згъэцэкIэнэу езгъэжьагъ.

Еджэгъу илъэсхэр Маринэ игуапэу ыгу къэкIыжьых. Адыгэ къэралыгъо университетым щызэхащэхэрэ Iофтхьабзэхэм чанэу ахэлажьэщыгъ, ащ дакIоуи шIэныгъэхэр зэрэзэригъэгъотыщтхэм пылъыгъ. Студенческэ купэу зипащэм епхыгъэ гукъэкIыжьэу иIэри макIэп. Илъэситф ­еджэгъур зы нэгъэупIэпIэгъум фэдэу кIуагъэ.

— Джыри университетым сы­щеджэзэ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Волма» зыфи­Iорэм къикIыгъэ куп къэкIо- ­гъагъ. Ахэр зэдзэкIакIо лъыхъу­хэу ти­факультет къеолIэгъагъэх. КIэлэегъаджэхэм къафыхахыгъэ студентхэм сэри сащыщыгъ. Джаущтэу сыстудентэу Iоф сшIэ­нэу езгъэжьэгъагъ, — къытфе­Iуатэ Маринэ.

Зызфигъэзэгъэ лъэныкъор ти­гущыIэгъу лъэшэу шIогъэшIэгъо­ныгъ. IофшIэныр псынкIагъэп, ащ къыдыхэлъытагъэу зэригъэ­шIэ­жьыгъэри бэ, ау къиныгъо­хэм Маринэ къагъэуцуныр ишэнэп.

— СицIыкIугъом къыщегъэ­жьагъэу модэм сылъыплъэу, ар сикIасэу сыщытыгъ. Щыгъын горэ къызысфащэфыкIэ, зэфэшъхьаф­хэм къапыслъхьэзэ сянэ-сятэхэм къязгъэлъэгъущтыгъ, — игу­къэ­кIыжьхэмкIэ къыддэгуащэ Маринэ. — Сыдигъуи щыгъынхэр гъэшIэгъонэу ыкIи къызэкIоу зыщыслъэщтыгъэх. Ар бэрэ сигъусэхэм къыхагъэщыщтыгъэ. Аущтэу уахътэр кIощтыгъэ, сицIыкIугъом сыгу зызфищэищтыгъэ лъэныкъом нахь игъэкIо­тыгъэу сегупшысэщтыгъэ. Апэрэ IофшIапIэм зэзэгъыныгъэу ады­сиIагъэр ыкIэм фэкIуагъ, сэри лъэныкъоу къыхэсхыщтым си­гъэгумэкIыщтыгъэ.

ИщыIэныгъэ гъогу зэрипхыщт сэнэхьатым тигущыIэгъу егупшы­сэщтыгъэ. Программэу «Au-paIr» зыфиIорэмкIэ иныбджэгъухэм ащыщхэр Францием зэрэкIуа­гъэхэр ышIэщтыгъэ. Ащ хахьэщтыгъэ IэкIыб къэралыгъом укIо­­ныр, бзэр зыщызэбгъэшIэрэ курсхэм уащеджэныр ыкIи уахъ­тэу укъызытырэм унагъоу къып­фа­гъэнэфагъэм ухэсэу упсэуныр.

— Сэ унагъом пшъэрылъэу къысфигъэуцугъагъэр ясабыйхэр еджапIэм сщэнхэ, къэсщэжьынхэ, унэмкIэ гъэцэкIэнэу къаратыгъэр ашIыжьынымкIэ IэпыIэгъу сафэхъуныр ары, — къытфеIуатэ Маринэ. — КIэлэцIыкIухэр еджа­пIэм пчыхьэм сыхьатыр 4 — 5-м нэс щыIэщтыгъэх. Сэ сикурсхэр мафэм сиIэщтыгъэх. Ащ къы­хэкIэу пстэури згъэцэкIэнэу игъо сифэщтыгъэ. Унагъоу сызхэсым урысыбзэ ышIэщтыгъэп ыкIи сэ французыбзэр нахь куоу зэзгъэ­шIэн амал сиIагъ. Ащ мэхьанэшхо иIагъ. Ау Париж сыкъыдэнэным сегупшысэщтыгъэп, курс­хэр къызысыуххэкIэ тикъэра­лыгъо къэзгъэзэжьыным сыфэ­хьа­зырыгъ.

ТигущыIэгъу зыхэсыгъэ унагъом къызэрэщытхъурэр къыхэзгъэщы сшIоигъу. Ахэр сыдигъуи къыфэчэфыгъэх, ащымыщэу къы­щыхъунэу зы нэплъэгъуи къыратыгъэп. Зыдисыгъэ бзы­лъфыгъэм Маринэ зэкIужьэу зэ­рэфэпагъэм гу лъитагъ ыкIи упчIэжьэгъу сыдигъуи ышIыщтыгъэ. Щыгъын горэ къыщэфын гухэлъ ышIыгъэми тигущыIэгъу гъусэ ышIыщтыгъэ. Ащ джыри зэ къеушыхьаты Маринэ модэм хэшIыкI ин зэрэфыриIэр.

Зыщеджэрэ курсхэр Маринэ къызеуххэм Сорбоннэ универси­тетым ишIэныгъэхэм ащыхигъэ­хъоным егупшысагъ. Ар Ев­ропэм ит университетхэм анахьыжъхэм ащыщ. Итхылъхэр ыгъэхьыгъэх, ау чIэхьанэу зыщыгугъы­жьыщтыгъэп.

— СыкъэкIожьынэу сищыгъын­хэр къэсыугъоижьхэзэ письмэ къысфэкIуагъ. Ащ итхагъэм сыгу ыгъэлъэпэрэпагъ, — игукъэ­кIыжь­хэмкIэ къыддэгуащэ Маринэ. — Чыжьэ дэдэу, сэ сынэ­сыным сызщымыгугъыщтыгъэ университетым сызэрэчIэхьагъэр ащ итыгъ. Анахь сызкIэ­хъо­псы­щтыгъэ гухэлъхэу сыгу чыжьэу щыз­гъашIохэрэр мэкIэ­макIэу къыздэхъущтыгъэх. Ащ тамэ къызгуигъакIэщтыгъэ.

ТигущыIэгъу зыкIэхъопсырэ Iофым ыгуи, ыпси зэрэхилъхьэ­рэм фэшI щыIэныгъэри къе­тэжьы. Пшысэу къыщыхъущтыгъэ IофшIапIи ыгъотын амал иIэ хъугъэ. Ащ модэм иунэу «Cha­nel» зыфиIорэм Iоф щешIэ. Джырэ уахътэ IэкIыб къэралыгъохэм модэм ылъэныкъокIэ анахь лъэгэпIэ инэу алъытэхэрэ шIэныгъэхэр къызIэкIегъахьэ. «MBA» зыфиIорэм феджэ.

Маринэ модэм иунэу «Chanel» зэриIофышIэм дакIоу сурэт зытезыхырэмэ стилистэу Iоф адешIэ. БэмышIэу француз маркэхэм ащыщ горэм проект афэ­зы­шIыгъэхэм ахэтыгъ. Пшъэшъэ ныбжьыкIэм къыдэхъурэм гуха­хъо хигъуатэзэ ыпэкIэ лъэкIуатэ.

ТигущыIэгъу Адыгэ къэралыгъо университетым иапэрэ лъэ­бэкъухэр щишIынхэу ригъэжьагъ. Апэрэ IофшIэныр къызщигъотыгъэри, программэу Францием зэрэкIуагъэм нэIуасэ зыщыфэ­хъугъэри мы университетыр ары. Адыгеим щигъэкIогъэ еджэгъу илъэсхэр гукъэкIыжь дахэу игъа­шIэ зэрэщыригъусэщтхэр Маринэ къыхегъэщы.

Абрэдж Сэтэнай.