Мыекъуапэ самбэмкIэ, дзю­домкIэ ибэнэпIэ еджапIэ лъа­псэ фэзышIыгъэу, СССР-м иза­служеннэ тренерэу Кобл Якъубэ фэгъэхьыгъэ шIэжь зэнэкъокъу дзюдомкIэ АР-м икъэ­лэ шъхьаIэ щыкIуагъ.

Урысыем ишъолъыр 22-рэ, федеральнэ округи 6, дзюдомкIэ бэнэкIуи 176-рэ хэгъэгу зэнэкъокъум хэлэжьагъ. Башкортостан, Тюмень ыкIи Рязань хэкухэм, Санкт-­Петербург, Къэбэртэе-Бэлъкъарым, Чэчэным, Темыр Осетием — Аланием, Адыгеим, нэмыкIхэм защызгъасэхэрэр алырэгъум щызэIукIагъэх.

ИгъэкIотыгъэу къызэIуахыгъ

Урысыем, Адыгеим язаслуженнэ тренерэу, зэхэщэкIо купым хэтэу Хъот Юныс зэ­хахьэм пэублэ гущыIэ къыщишIыгъ. Урысыем и Къэралыгъо Думэ идепутатэу, дунаим самбэмкIэ гъогогъу 11 дышъэр къыщыдэзыхыгъэ Хьасаныкъо Мурат, Урысыем дзюдомкIэ и Федерацие илIыкIоу Валентин Хабировыр, Коблхэм яунагъо иныбджэгъоу Новочеркасскэ къикIыгъэ Николай Магилинец зэIукIэгъум къыщыгущыIагъэх. Кобл Якъубэ иIофшIагъэ зэрагъэлъапIэрэр, ыгъэ­сагъэхэм зэращымыгъупшэрэр къаIуагъ.

Олимпиадэ джэгунхэм дзюдомкIэ дышъэр къащызыхьыгъэу, Мыекъуапэ щапIугъэу Вла­димир Невзоровым ишIуфэс тхыгъэ къыщеIо Кобл Якъубэ зэригъэсагъэр, тренер цIэ­рыIом ишIушIагъэ осэшхо зэрэфашIырэр.

— Кобл Якъубэ фэгъэхьыгъэ шIэжь зэнэ­къокъухэр тикъалэ щызэхэтэщэх, — къеIуатэ Новочеркасскэ щыпсэурэ Николай Магилинец. — Коблхэм яунагъо дэгъоу сэшIэ. Якъубэ ыгу къытемыожьми, къытхэтэу сэлъытэ.

Кобл Якъубэ ыгъэсагъэхэм ащыщхэу КIуае Хьазрэт, Хъот Юныс, тренерэу Iоф зышIэхэрэр, Адыгэ къэралыгъо универси­тетым физкультурэмрэ дзюдомрэкIэ и Институт ипащэу Бгъуашэ Айдэмыр, фэшъхьаф­хэу зэнэкъокъум икъызэIухыгъо хэлэжьа­гъэхэм къызэраIуагъэу, Кобл Якъубэ кIэща- кIо зыфэхъугъэ Iофхэр ригъэджагъэхэм лъа­гъэкIуатэ.

Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм ипащэу, Адыгеим изаслуженнэ тренерэу Бастэ Сэлымэ хэушъхьафыкIыгъэ Кубокыр Кобл Якъубэ ишъхьэгъусэу Джарэт ритыжьыгъ. Якъубэ ыпхъухэу зэхахьэм хэлэжьагъэхэм гущыIэ фабэхэр афаIуагъэх.

«Абрекхэр» мэуджых

Зэнэкъокъур рагъэжьэным ыпэкIэ адыгэ къэшъокIо ансамблэу «Абрекхэр» зэхахьэм къыщышъуагъэх. Лъэпкъ музыкальнэ Iэмэ­-псымэхэмкIэ орэдышъохэр агъэжъынчыгъэх. Художественнэ пащэу ТхьакIумэщэ Нальбек тренерхэр, бэнакIохэр фэразэхэу «тхьауегъэпсэу» раIожьыгъ, къэшъуакIохэм Iэгу афытеуагъэх.

Зэнэкъокъур

Кобл Якъубэ ыцIэ зыхьырэ спорт Унэ­шхом алырэгъуи 4 къыщызэIуахи, бэнакIохэм яIэпэIэсэныгъэ къагъэлъэгъуагъ. Яон­тэгъугъэхэм ялъытыгъэу апэрэ чIыпIэхэр къыдэзыхыгъэхэм шъуащытэгъэгъуазэ.

Исаев Адам, кг 60, Багаев Байсангур, кг 73-рэ, тIури Чэчэным щыщых. Бэлъкъар Алим, кг 66-рэ, Тюмень фэбэнагъ. Пидуриев Магомедкарин, кг 81-рэ, Дагъыстан щыщ, Датхъужъ Алый, кг 90-рэ, Адыгэ Рес­публикэм щапIугъ, Баркалаев Абдулмуслим, кг 100, Краснодар краим икомандэ хэт, Даурбеков Вахид, кг 100-м къехъу, Баш­кортостан щыщ.

Джэрзыр къахьыгъ

Адыгэ Республикэм щапIугъэхэ бэнакIохэу джэрзыр къыдэзыхыгъэхэр: ЦIыкIу Рэ­мэзан, кг 60, Лъэцэр Дамир, кг 66-рэ, Джа­рымэкъо Долэт, кг 73-рэ, Лафышъэ Джантэмыр, кг 100.

Я 5-рэ чIыпIэхэр къыдэзыхыгъэхэ бэна­кIохэр къахэдгъэщыхэ тшIоигъу. ЦIыкIушъо Асхьад, кг 60, Мерэм Нарт, кг 66-рэ, ­Къуижъ Бислъан, кг 73-рэ, Гъыщ Къэплъан, кг 90-рэ, ТхьакIущынэ Ахьмэд, кг 100-м къехъу.

АР-м физкультурэмкIэ ыкIи спортымкIэ и Комитет кIэщакIо зыфэхъугъэ зэнэкъо­къум хагъэунэфыкIхэрэ чIыпIэхэр къыщыдэзыхыгъэхэ бэнакIохэм, тренерхэм тафэраз. Кобл Якъубэ ишъхьэгъусэу Джарэт, Хъот Юныс, Бгъуашэ Айдэмыр, Бастэ Сэлым зэнэкъо­къум чанэу хэлэжьагъэхэм афэгушIуагъэх, медальхэр ыкIи щытхъу тхылъхэр бэнакIохэм, тренерхэм аратыжьыгъэх.