Адыгеим икъалэхэмрэ ирайонхэмрэ я 11-рэ классыр къащызыухыгъэхэр зыхэлэжьэгъэхэ республикэ пчыхьэзэхахьэ шэмбэтым къалэу Мыекъуапэ щыкIуагъ. Мы илъэсым республикэм иеджапIэхэр нэбгырэ 1742-мэ къаухыгъ.

Муниципальнэ образование зэфэшъхьафхэм къарыкIыгъэхэр алырэгъу плъыжьым рыкIуа­гъэх. Ащ дакIоу муниципа­ли­тетым фэгъэхьыгъэ ыкIи кIэлэ­еджакIохэм ягъэхъагъэхэр къи­зыIотыкIырэ къэбарым едэ­Iугъэх. Сценэм ыбгъуитIукIэ экранхэм еджапIэр къэзыухыгъэхэм лъэхъэнэ зэфэшъхьаф­хэм атырахыгъэгъэ ясурэтхэр къырадзагъэх. Ащ нэужым ныб­жьыкIэхэр къэшъуагъэх: адыгэ, урыс лъэпкъ ыкIи джырэ къашъохэр къашIыгъэх.

Урысые Федерацием гъэ­сэныгъэмкIэ иминистрэу бэмышIэу Адыгеим къэкIогъэгъэ Сергей Кравцовым ныбжьыкIэхэм закъыфигъэзагъ, видео шIыкIэм тетэу гущыIэ фабэхэр къафиIуагъэх. Адыгеим и ЛIы­шъхьэу КъумпIыл Мурат сценэм къытехьи тыгъосэрэ кIэлэеджакIохэм, ахэр езыгъэджагъэхэм ыкIи янэ-ятэхэм къафэгушIуагъ.

«ЕджапIэм шIэныгъэ къы­шъуитыгъ, ныбджэгъу шъыпкъэ­хэр шъуигъогогъу ышIыгъ. Къи­ныгъохэр щыжъугъэзыехэзэ мурадэу шъушIыгъэм шъунэ­сыным зыфэжъугъэзагъ, сэнаущыгъэу шъухэлъыр къыхэжъугъэщыгъ, еджэнымкIэ, спортымкIэ, творчествэмкIэ апэрэ те­кIоныгъэхэм яIэшIугъэ зэхэ­шъушIэн шъулъэкIыгъ, — къы­Iуагъ республикэм и ЛIышъхьэ. — ЕджапIэм шъуIэ къыщижъугъэхьэгъэ шIэныгъэхэр егъэшIэ­рэу шъуигъогогъущтых. Шъуи­гупсэ еджапIэ зыкIи зыщышъумыгъэгъупш. КIэлэегъаджэхэу шъуезыгъэджагъэхэр, шъузы­пIугъэхэр, сыд фэдэ ублэпIэшIукIи къышъукъоуцуагъэхэр зыщышъумыгъэгъупшэх. Непэрэ гъэхъагъэхэр ыкIи шъуапэкIэ текIоныгъэу шъушIыщтхэр шъуи­кIэлэегъаджэхэм ягъэхъагъэу зэрэщытыр зыщышъумыгъэ­гъупш. Шъуянэ-шъуятэхэм, шъуя­нэжъ-шъуятэжъхэм, шъо шъуи­мызакъоу, еджапIэми ренэу Iэ­пыIэгъу фэхъущтыгъэхэм та­фэраз».

КъумпIыл Мурат къызэрэхигъэщыгъэмкIэ, еджапIэр къэ­зыу­хыгъэхэм ящыIэныгъэкIэ чэзыу­кIэ къапыщылъ, арышъ, сэнэ­хьа­тэу зытыраубытэщтыр ежьхэмкIэ анахь къекIунэу, ры­кIэ­мыгъожьынхэу афиIуагъ. Ти­ныб­жьыкIэхэм яамал нахь икъоу зыкъызэIуихынымкIэ Адыгеим Iофтхьэбзабэ щызэшIуахы. Къа­лэхэм ыкIи къуаджэхэм ащыпсэунхэр ыкIи Iоф аща­шIэныр Iэрыфэгъу къафэхъуным пае бэ къыдалъытэрэр.

«Непэ шъуигъэхъагъэхэм уяплъымэ, теубытагъэ хэлъэу къэпIон плъэкIыщт тинахьыжъхэм къакIэлъыкIохэрэр сэнаущыгъэ зыхэлъ, шIэныгъэ зиIэ, зимурад фэкIорэ ныбжьыкIэхэр арэу зэрэщытхэр. Ащ къикIырэр Адыгеим тапэкIи хэхъоныгъэ зэришIыщтыр ары. ЗэкIэ шъо шъуIэ илъ, шъукъызэкIэмыкIу, шъуапэкIэ ежъугъэхъу! Тиапшъэ­рэ еджапIэхэм ыкIи колледжхэм япчъэхэр зэкIэ къышъуфызэ­Iухыгъэх. Ахэм сэнэхьат зэфэшъхьафхэр шъуIэ къащижъу­гъэхьан шъулъэкIыщт, наукэм шъупылъын, шъуитворческэ амалхэм зяжъугъэушъомбгъун шъулъэкIыщт. Тицыхьэ къышъу­телъ!», — къыIуагъ Адыгеим и ЛIышъхьэ.

ЕджапIэр къэзыухыгъэхэм, кIэлэегъаджэхэм, ны-тыхэм афэ­гушIонхэу къэкIуагъэх ­Адыгэ Республикэм и Къэралыгъо Совет — Хасэм и Тхьаматэу Владимир Нарожнэр, Адыгэ Республикэм гъэсэныгъэмрэ шIэныгъэмрэкIэ иминистрэу КIэ­рэщэ Анзаур, Адыгэ Рес­публикэм иминистрэхэм я Кабинет хэтхэр, муниципальнэ об­разованиехэм япащэхэр.

Адыгэ Республикэм итвор­ческэ коллективхэм яконцерткIэ пчыхьэзэхахьэр лъагъэкIотагъ. Адыгэ къашъомкIэ кIэлэцIыкIу ансамблэу «Мыекъуапэ инэфылъэхэм», эстраднэ орэдымкIэ студиеу «Шпаргалкэм», эстраднэ ансамблэу «Ошъуте­нэм» ыкIи купэу «Weеkеnd band» зыфиIорэм къагъэлъэ­гъуагъэхэм яплъыгъэх. ЕджапIэ­хэм япащэхэм, кIэлэеджакIохэу къэзыухыгъэхэм ыкIи ахэм янэ­-ятэхэм къызэдаIуагъ илъэс еджэгъухэм афэгъэхьыгъэ орэдыр. Пчыхьэзэхэхьэ чэфыр мэ­­фэкI мэшIоустхъукIэ ухыгъэ хъугъэ.

Зэпахырэ узэу къекIокIырэм къыхэкIэу пчыхьэзэхахьэр гупчэ шъхьэихыгъэм щыкIуагъ. Ащ еджапIэр къэзыухыгъэхэр, кIэлэегъаджэхэр ыкIи пащэхэр арых ныIэп къырагъэкIолIагъэ­хэр. ЗэкIэми пэшIорыгъэшъэу тестированиер апэкIэкIыгъ, ащ нэмыкIэу санитарнэ-эпидемиологие шапхъэу ищыкIагъэхэр зэкIэ агъэцэкIагъэх.

АР-м и ЛIышъхьэ ипресс-къулыкъу