Адыгеим и ЛIы­шъхьэу КъумпIыл Мурат пэщэныгъэ ды­зэрихьэзэ къолъ­хьэ тын-Iыхыным пэшIуекIорэ IофшIэ­ным фэгъэзэгъэ Ко­миссием изэхэсыгъо республикэм и Пра­вительствэ и Унэ щыкIуагъ.

Зэхэсыгъом хэлэжьагъэх Адыгэ Республикэм и Къэралыгъо Совет — Хасэм и Тхьаматэу Владимир Нарожнэр, Адыгэ РеспубликэмкIэ федеральнэ инспектор шъхьаIэу Сергей Дрокиныр, Адыгэ Рес­публикэм иминистрэхэм я Кабинет хэтхэр, АР-м ипрокуратурэ, МВД-м, УФСБ-м ыкIи муниципальнэ образованиехэм япащэхэр.

Къолъхьэ тын-Iыхыным ыкIи нэмыкI хэбзэукъоныгъэхэу псау­ныгъэм икъэухъумэнкIэ щыIагъэхэм, республикэм къолъхьэ тын-Iыхыным ылъэныкъокIэ со­циологическэ ушэтынхэу ща­шIыгъэхэм якIэуххэм, чIыпIэ зыгъэIорышIэжьыным икъулыкъухэм къолъхьэ тын-Iыхыным пэуцужьыгъэнымкIэ яIофхэм язытет фэгъэхьыгъэ Iофыгъохэм атегущыIагъэх.

Апэрэ IофыгъомкIэ къэгущы­Iагъэх АР-м псауныгъэм икъэу­хъумэнкIэ иминистрэу Мэрэ­тыкъо Рустем, АР-м ипрокурорэу Игорь Шевченкэр, АР-м хэгъэгу кIоцI IофхэмкIэ ими­нистрэу Иван Бахиловыр ыкIи ФСБ-м и ГъэIорышIапIэу Адыгэ Республикэм щыIэм ипащэу Сергей Каштановыр.

ЗэрэхагъэунэфыкIыгъэмкIэ, пандемием илъэхъан псауны­гъэм икъэухъумэн ылъэныкъокIэ хэбзэукъоныгъэу зэрахьагъэхэр зэлъытыгъэхэм ащыщ Iэзэным епхыгъэ продукциябэ къащэфын фаеу зэрэхъугъэр. IэзапIэхэм япэщэ ыкIи яспециалист заулэхэм уголовнэ Iоф къапагъэтэджагъ. 2019-рэ илъэсым къы­щегъэжьагъэу 2021-рэ илъэсым нэс планым къыхиубытэрэ уплъэкIуни 8 ыкIи цIыфхэм ялъэIухэм япхыгъэу планым къыхимыубытэрэ уплъэкIун 15 зэхащэгъагъ. Пэщэ IэнатIэ зыIыгъ нэбгыри 7-мэ уголовнэ Iоф къапагъэтэджагъ ыкIи дисциплинарнэ пшъэдэкIыжь арагъэ­хьыгъ. А охътэ дэдэм уплъэкIу-лъы­плъэкIо къулыкъухэм уплъэкIун 27-рэ зэхащагъ. УплъэкIуни 10-м якIэуххэм ялъытыгъэу министерствэхэм тхылъ гъэнэфагъэхэр афагъэхьыгъэх.

ИгъэкIотыгъэ псэолъэшIыным къы­хитубытэрэ псэуалъэхэм зэралъыплъэ­хэрэ шIыкIэр нахь тэрэзэу агъэпсыным мэхьанэшхо зэриIэр лъыплъэкIо къулыкъухэм япащэхэм хагъэунэфыкIыгъ.

Къэралыгъо продукцием ищэфын ыкIи къэралыгъо программэхэм ягъэцэкIэ­жьын хэлэжьэрэ цIыфхэм пшъэдэкIыжьэу ахьырэм зыкъегъэIэтыгъэн ыкIи а лъэныкъомкIэ яшIэныгъэхэм нахь ахагъэ­хъон зэрэфаем республикэм и ЛIышъхьэ анаIэ тыраригъэдзагъ.

«Мы лъэныкъомкIэ зэкIэми зэдегъэштэныгъэ ахэлъэу яIоф агъэпсыным мэхьанэшхо иI, сыда пIомэ къолъхьэ тын-Iыхыным пэшIуекIорэ Iофтхьабзэхэр игъом ыкIи зэрищыкIагъэм тетэу зэшIо­хыгъэнхэ фае. Псауныгъэм икъэухъу­мэнкIэ къыхэдгъэщыгъэ хэукъоныгъэхэр къыдэслъытэхэзэ, республикэм и Премьер-министрэ IэзэпIэ-профилактикэ организациехэм япащэхэр зыхэлэжьэщтхэ зэIукIэ зэхищэнэу пшъэрылъ фэсэшIы. Анахьэу анаIэ зытырагъэтын фаер игъэкIотыгъэ псэолъэшIынымкIэ къэралыгъо программэхэм япхырыщын ары», — къыхигъэщыгъ КъумпIыл Мурат.

Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэп­къэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр республикэм къолъхьэ тын-Iыхыным ылъэныкъокIэ иIофхэм язытет фэгъэхьыгъэ ушэтынхэу АРИГИ-м ышIыгъэхэм якIэуххэм афэгъэхьыгъэу къыIотагъ. 2019-рэ илъэсым цIыфхэмрэ хабзэм икъулыкъухэмрэ ащ фэдэ хэбзэукъо­ныгъэу зэрахьагъэр процент 1,13-рэ хъущтыгъэмэ, 2020-рэ илъэсым — зы процент. Отраслэ пэпчъ ащ фэдэ Iоф­шIэным икIэуххэр къырахьылIэхэзэ рес­публикэм ипащэхэм ушэтын Iофтхьа­бзэхэр лъагъэкIотэнхэу Адыгеим и ЛIы­шъхьэ пшъэрылъ афишIыгъ.

Къолъхьэ тын-Iыхыным пэуцужьы­гъэнымкIэ Iофхэм язытет къытегущы­Iагъэх Красногвардейскэ районым ипа­щэу Гъубжьэкъо Темуррэ Кощхьэблэ районым ипащэу Хьамырзэ Зауррэ.

Зэхэсыгъом икIэухым Адыгеим и ЛIы­шъхьэу КъумпIыл Мурат анахьэу къыхигъэщыгъэр къолъхьэ тын-Iыхыным епхыгъэ бзэджэшIагъэхэр къыхэгъэщыгъэнхэмкIэ, гъогур ахэм афыпыбзыкIыгъэнымкIэ хэбзэухъумэкIо къулыкъухэм якъутэмэ пстэуми языкIыныгъэ нахь агъэпытэныр ары. Къэралыгъо программэхэм ягъэцэкIэн елъытыгъэу аукци­-онхэр зэрэкIохэрэм тегъэпсыхьагъэу гъэу­нэфын-зэхэфын Iофхэр нахь агъэлъэшынхэу хэбзэухъумэкIо къулыкъухэм игъо афилъэгъугъ.

Адыгэ Республикэм и ЛIышъхьэ ипресс-къулыкъу