КIэлэцIыкIу творчествэмкIэ гупчэу Москва дэтым бэмышIэу «Боль­шой семейный совет» зыфиIорэ форумыр щызэхащагъ. Ар зэрищагъ партиеу «Единэ Россием» и Тхьаматэу Дмитрий Медведевым. Iофтхьабзэм хэлэжьагъэх сатыум емыпхыгъэ социальнэ организа­циехэм япащэхэр ыкIи ны-ты объединением хахьэхэрэр.

Сабыибэ зэрыс унагъохэм IэпыIэгъу арагъэгъотыным, унагъохэм ящыIэкIэ-псэукIэ на­хьы­шIу шIыгъэным афэшI гукъэкIэу щыIэхэр къаIуагъэх, ахэм атегущыIагъэх. Мыщ фэдэ унагъо­хэм атырэ хэбзэ Iахьыр уцу­гъо-уцугъоу нахь макIэ шIыгъэн фаеу зэрилъытэрэр «Единэ Рос­сием» ипащэ къыхигъэщыгъ.

— Джы къызнэсыгъэм шъо­лъыр пэпчъ унэгъо IужъукIэ кIо­хэрэр ежь-ежьырэу къыхагъэщых. Ащ зэгурымыIоныгъэхэр къыхэкIы. Урысыем ичIыпIэ пстэуми унэгъо IужъукIэ кIорэ унагъохэр шапхъэхэм атетэу къыхахын фае, — къыIуагъ Дмитрий Медведевым.

Унэгъо Iужъумэ къаратырэ чIыгу Iахьым ычIыпIэ ахъщэ аратынэу партиеу «Единэ Россием» игъоу ылъэгъугъ. ДжырэкIэ ахэм аратырэ чIыгу Iахь­хэм инфраструктурэр зэрямыщэлIагъэр къыIуагъ «Единэ Россием» ипэшIорыгъэшъ мэкъэтын хэлэжьэгъэ, Калининградскэ шъолъыр Думэм ипащэу Марина Оргеевам. Мыщ фэдэ материальнэ IэпыIэгъум унэгъо Iужъухэм ящыIэкIэ-псэу­кIэ нахьышIу шIыгъэнымкIэ ишIуа­гъэ къэкIонэу ащ елъытэ.

Джащ фэдэу къэралыгъом ишъолъырхэм зэкIэми сабый къэхъугъакIэхэм шIухьафтынхэр ащаратынэуи ащ къыIуагъ. Унагъохэм зэкIэми ар ящыкIагъэу ылъытагъ.

«Женщины за развитие» зы­фиIорэ организацием ипащэу Либкан Базаевам сабыибэ зиIэ ныхэр зэлъыпытэу илъэс пчъа­гъэрэ унэм зэрисхэр, Iоф ашIэн амал зэрямыIэр къыхигъэ­щыгъ. Ныр е тыр сабыим зэрэкIэрыс уахътэр стажым хэхьан фаеу ащ ылъытагъ. Краснодар и Общественнэ палатэ хэтэу, унэгъо Iужъухэм яобщественнэ объединение ишъолъыр Союз ипрезидентэу, «Матери России» зыфиIорэ урысые общественнэ движением ишъолъыр отделение ипащэу Светлана Недилько кIэлэпIупкIэмкIэ къин зэрэхэтхэр къы­Iуагъ. Ахъщэу сабыим къытефэрэр икъу фэдизэу къаратырэп, хьыкумым зыфагъэза­гъэми, ишIуагъэ къакIорэп, сыда пIомэ ахъщэу къаIэкIахьэрэр нахь макIэу къагъэлъагъо.

УрыпсэунымкIэ анахь ахъщэ макIэу цIыфым къыратырэм ызыныкъо шIокI имыIэу са­быим фэкIонэу тыфай. Тиюристхэр хьыкумым мэкIо зэпытых. Алиментыр зытынэу щытым сомэ мини 10 нахь къымылэжьэу тхьапэ къехьы, ащ ипроцент ары зыныбжь имыкъугъэм фэ­кIожьырэр, — еIо Светлана Недилько.

Джащ фэдэу мылъкум фэ­гъэхьыгъэ упчIэхэри зэхэсы-гъом къыщаIэтыгъэх. «Женщины за жизнь» зыфиIорэ фондым ипащэу, «Единэ Россием» ипэшIорыгъэшъ мэкъэтын текIоныгъэ къыщыдэзыхыгъэ Наталья Москвитинам (Молдовие Рес­публикэм щыщ) ахъщэр зыпэ­Iуагъэхьан фитхэм ахагъэхъон фаеу игъоу ылъытагъ.

— ЫпэрапшIэу унагъор зэ­рыс унэм игъэцэкIэжьын ны мылъкур пэIуагъэхьан алъэ­кIы­нэу тыфай, сыда пIомэ ипотекэ зышIын амал зимыIэу, ау зычIэсхэ унэр зэтырагъэпсы­хьажьы зышIоигъоу бэ ахэтыр. ЯтIонэрэмкIэ, автомобиль къащэфын амал яIэн фае, анахьэу сабыибэ зэрыс унагъохэм ар ящыкIагъ. Джащ фэдэу гъэстыныпхъэ шхъуантIэм епхыгъэ Iэмэ-псымэр къащэфын амал яттын фае.

«Новая школа» зыфиIорэм икоординаторэу, Къэралыгъо Думэм идепутатэу Алена Аршиновам илъэситфым нэс кIэ­лэцIыкIухэр ыпкIэ хэмылъэу электричкэм исынхэ зэрэфитыр къыIуагъ. Илъэси 5-м къыщегъэжьагъэу 7-м нэс ащ ха­хьэхэрэп. Шъолъыр 48-мэ хэу­шъхьафыкIыгъэ фэгъэкIотэнхэр ащ епхыгъэу ашIыгъ. Шъо­лъырхэм зэкIэми ащ фэдэ фэ­гъэ­кIотэнхэр яIэнхэ фаеу зэ­ри­лъытэрэр къыхигъэщыгъ.

«Семейный клуб «Перово» зыфиIорэ шъолъыр общественнэ организацием ипащэу Татья­­на Яковлевам таксихэм зэкIэми кIэлэцIыкIу креслэхэр шIокI имыIэу арытын фаеу ыкIи ащ пае ахъщэ тедзэ аIамыхынэу зэрилъытэрэм къыкIигъэтхъыгъ.

ГупшысакIэу къаIуагъэхэм зэкIэми Правительствэм Iоф зэ­радишIэщтыр ыкIи «Единэ Россием» хэдзынхмкIэ ипрограммэ зэрэхэхьащтхэр форумым ыкIэм Дмитрий Медве­девым къыIуагъ.

— Сабыйхэр зэрыс унагъо­хэм IэпыIэгъу ягъэгъотыгъэныр къэралыгъом ипшъэрылъ шъхьа­Iэхэм ащыщ. УФ-м и Консти­туцие Урысыем икъэралыгъо политикэ кIэлэцIыкIухэм чIыпIэшхо зэрэщаубытырэр къыщеIо. Ны мылъур зэрэбгъэфедэщт шIыкIэм зэрэхэбгъэхъон фаем, сабыибэ зэрыс унагъохэм фэгъэкIотэнхэр зэрафэпшIын фаеу къаIуагъэхэр зигъо къэсыгъэ Iофыгъохэу сэлъытэ. Урысыем унэгъо Iужъухэм зы статус яIэн зэрэфаер къыхагъэщыгъ. Ащ нэмыкIэу, мэхьанэ ин зиIэ гу­мэкIыгъохэм атегущыIагъэх, — къыIуагъ «Единэ Россием» ипэшIорыгъэшъ мэкъэтын хэлэ­жьагъэу, МыекъуапэкIэ народнэ депутатхэм я Совет итхьа­матэ игуадзэу Светлана Мекеровам. ДЕЛЭКЪО Анет.