Урысые Федерацием гъэсэныгъэмкIэ ими­ни­стрэу Сергей Крав­цовым лъэпкъ проектэу «Гъэсэныгъ» зыфиIоу Урысыем и Президентэу Вла­димир путиныр кIэ­щакIо зыфэхъугъэм къыдыхэлъытэгъэ Iоф­тхьэбзэ заулэ республикэм зэрэ­щагъэцакIэрэр зэри­гъэ­шIагъ.

Адыгэ Республикэм и ЛIы­шъхьэу КъумпIыл Муратрэ Урысые Федерацием гъэсэ­ныгъэмкIэ иминистрэу Сергей Кравцовымрэ нэбгырэ 1100-мэ ателъытэгъэ гурыт еджапIэу Мыекъуапэ къыщызэIуа­хыщтым иIофхэм язытет ты­гъуасэ ауплъэкIугъ.

Адыгэ Республикэм и ЛIы­шъхьэ къызэрэхигъэщыгъэмкIэ, лъэпкъ проектым ишIуагъэкIэ Урысые Федерацием и Пре­зидент къыгъэнэфэгъэ пшъэ­рылъхэм ащыщхэр — кIэлэцIыкIухэм яегъэджэнкIэ амалышIу­хэр зэхэщэгъэнхэр, зы сменэм тетэу гурыт еджапIэхэм Iоф ашIэныр республикэм щагъэцакIэх.

Мыекъуапэ имикрорайонэу цIыфыбэ зыщыпсэурэм гурыт еджэпIакIэр щагъэпсы. Iоныгъом и 1-м ехъулIэу ащ ипчъэхэр кIэлэеджэкIо миным ехъумэ къафызэIуихыщт. Гурыт еджапIэм къыготэу нэбгырэ 240-мэ ателъытэгъэ кIэлэцIыкIу IыгъыпIи агъэпсыгъ. Станицэу Ханскэми Iоныгъом и 1-м ехъулIэу нэбгырэ 250-мэ ателъытэгъэ гурыт еджапIэ къыщызэIуахыщт.

Адыгэ Республикэм гъэсэныгъэмрэ шIэныгъэмрэкIэ ими­нистрэу КIэрэщэ Анзаур Iофэу ашIагъэм фэгъэхьыгъэу къыIотагъ. Ащ зэрэхигъэунэфыкIы­гъэмкIэ, Мыекъуапэ щагъэпсырэ гурыт еджапIэр джырэ шапхъэхэм адештэ. Актовэ залхэр, спортзал заулэ ащ хэтыщтых, футболешIапIи иIэщт, джырэ шапхъэхэм адиштэрэ оборудованиери къащэфыгъах.

Урысые Федерацием гъэсэныгъэмкIэ иминистрэ Адыгеим къыщыдагъэкIыгъэ партэхэр зэ­рэдэгъухэр къыIуагъ. КIэлэ­еджа­кIохэм зэреджэщтхэ тхылъхэр ягъэгъотыгъэнхэм, еджэным изэхэщэнрэ кIэлэеджакIохэм яколлектив изэгъэуIунрэ екIо­лIэкIэ шъхьаф къафагъотын зэ­рэфаер Сергей Кравцовым хигъэунэфыкIыгъ. КъумпIыл Му­рат Адыгэ Республикэм гъэ­сэныгъэмрэ шIэныгъэмрэкIэ иминистрэрэ Мыекъуапэ имэриерэ пшъэрылъ афишIыгъ гурыт еджапIэм къыпэIулъ чIыпIэм изэтегъэпсыхьан анаIэ тырагъэ­тынэу, Iоныгъом и 1-м ехъулIэу еджэныр рагъэжьэным пае рахъухьэгъэ Iофтхьабзэхэр зэкIэ охътэ благъэхэм аухынхэу.

АР-м и ЛIышъхьэ ипресс-къулыкъу