Адыгэ Республикэм и ЛIышъхьэу КъумпIыл Муратрэ Урысые Феде­рацием гъэсэныгъэмкIэ иминистрэу Сергей Кравцовымрэ ты­гъуасэ АР-м и Правительствэ и Унэ щызэдыряIэгъэ зэIукIэгъум гъэсэны­гъэм иIоф республикэм зэрэщызэхэщагъэм шIуагъэу къытырэм зыкъегъэIэтыгъэным ыкIи УФ-м и Президентэу Владимир Путиным ипшъэрылъхэр гъэцэкIэгъэнхэм япхыгъэ Iофыгъохэм щатегущыIагъэх. Лъэпкъ проектэу «Гъэсэныгъэр» зыфиIорэм тегъэпсыхьагъэу ашIыгъэ псэолъэ заулэхэм язытет Сергей Кравцовым зэригъэлъэгъунэу къеблэгъагъ.

КIэлэцIыкIухэр зыщыпсэухэрэ чIыпIэм емылъытыгъэу зэфэдэ гъэсэныгъэ ягъэгъотыгъэным фытегъэпсыхьэгъэ республикэ IофтхьабзэхэмкIэ УФ-м гъэсэныгъэмкIэ иминистрэ къызэ­радеIэрэм пае зэрэфэразэр Адыгеим и ЛIышъхьэ къыIуагъ. Лъэпкъ проектыр Адыгеим зыщагъэцэкIэрэ илъэситIум къыкIоцI нэбгырэ 2160-рэ зычIэ­фэщтхэ кIэлэцIыкIу IыгъыпIи 9 агъэпсыгъ, ахэм азыныкъор илъэси 3-м нэсыгъэ кIэлэцIыкIухэм апай. Гъэсэныгъэм иор­ганизациехэу Iоф зышIэхэрэм кIэлэцIыкIухэр щаIыгъынхэу уни 3 къыпашIыхьагъ, ахэм нэбгырэ 360-рэ ачIэфэщт, азыныкъор илъэси 3-м шIомыкIыгъэ кIэлэцIыкIухэм апай. Мы илъэсымкIэ рахъухьагъэхэм ащыщ джыри кIэлэцIыкIу IыгъыпIи 7 ашIыныр, зэкIэмкIи нэбгырэ 990-рэ ахэм ачIэфэщт. Джащ фэдэу лъэпкъ проектхэм яшIуагъэкIэ илъэсищэу блэкIыгъэм республикэм кIэлэеджэкIо 3440-рэ зычIэфэщт еджэпIи 4 щашIыгъ. Мы илъэсым Iоныгъом и 1-м къыщегъэжьагъэу джыри еджэпIитIу кIэу къахэхъощт: псэупIэу Ханскэм — нэбгырэ 250-м, къалэу Мыекъуапэ — нэбгырэ 1100-м атегъэпсыхьэгъэщтых. Мыекъуапэ нэбгырэ 1100-рэ зычIэфэщт еджапIэм ишIын щы­рагъэжьагъ.

«КIэлэцIыкIухэр егъэджэ­гъэнхэмкIэ ыкIи пIугъэнхэмкIэ пшъэрылъхэу къэуцухэрэм язэшIохынкIэ а пстэури амалышIоу щыт. Ахэм анахь пшъэрылъ шъхьаIэр — шIэныгъэ куухэр ягъэгъотыгъэ­н­хэр ары. Джащ пае кад­рэхэм ягъэхьазырын лъэшэу тынаIэ тедгъэтын фае ыкIи ащ тыдэлажьэ. Сэнаущыгъэ зыхэлъ кIэлэцIыкIухэм Iоф адэшIэгъэнымкIи республикэм опыт шIукIае щытиIэ хъугъэ, федеральнэ программэу «Сабый пэпчъ гъэхъагъэ ышIыныр» зыфиIорэ федеральнэ программэм къыдилъытэрэ Iофтхьабзэхэр зэшIотэхых. Урысые Федерацием и Президент ипшъэрылъхэр нахь шIогъэ ин хэлъэу гъэцэкIэ­гъэнхэм пае тапэкIи федеральнэ гупчэр къыддеIэным тыщэгугъы», — къыIуагъ Къум­пIыл Мурат.

Гъэсэныгъэр нахьышIоу зэ­хэщэгъэным, шIэныгъэ куухэр ягъэгъотыгъэнхэм (мыщ къы­хеубытэх анахь пэIудзыгъэ псэу­пIэхэри) тегъэпсыхьагъэу шъолъыр зэфэшъхьафхэм пшъэ­рылъхэр ащыгъэцэкIэгъэнхэм, ащкIэ амалхэу щыIэхэр зэкIэ гъэфедэгъэнхэм бэ зэрелъытыгъэр Сергей Кравцовым къыхигъэщыгъ. Адыгеим икъоджэ еджапIэхэм ащыщ горэм ар зыщэIэм лъэпкъ проектым къы­дилъытэрэ Iофтхьабзэхэм ягъэ­цэкIэнкIэ пшъэрылъхэу яIэхэр республикэм зэрэщыпхыращыхэрэр ыуплъэкIугъ.

Джащ фэдэу къэралыгъо кIэух аттестацием ичэзыу шъхьаIэ зэхэщагъэ зэрэхъугъэм Сергей Кравцовым осэшIу къыфишIыгъ. Министрэм къызэриIуагъэмкIэ, хэгъэгум ишъолъыр пстэуми афэдэу, Адыгеими ушэтынхэр тэрэзэу щызэхэщагъэ хъугъэх. Санитарнэ шапхъэхэр мыукъогъэнхэм лъэшэу анаIэ зэрэтырагъэтыгъэм ишIуагъэкIэ еджапIэр къэзыуххэрэм ащыщ горэми зэпахырэ узыр — коронавирусыр къынэсыгъэп. Сергей Кравцовым къызэрэхигъэщы­гъэмкIэ, кIэлэцIыкIухэм ягъэмэфэ гъэпсэфыгъо уахъти лъэшэу анаIэ тетэу, шэпхъэ пстэури къыдалъытэзэ зэхащэн фае.

«Къэралыгъо программэу кIэлэцIыкIу лагерхэм апае путевкэхэм алъатырэ ахъщэм изы Iахь къафэгъэзэжьыгъэным тегъэпсыхьагъэр Урысые Федерацием и Президент къы­зэрафигъэнэфагъэм тетэу гъэцэкIагъэ мэхъу. Мы илъэсым кIэлэеджэкIо миллиони 7 фэдиз гъэпсэфыпIэхэм ащыIэщтых, илъэсэу икIыгъэм елъытыгъэмэ, нэбгырэ миллионкIэ ар нахьыб», — къы­Iуагъ Сергей Кравцовым.

Ащ нэужым УФ-м гъэсэныгъэмкIэ иминистрэ еджапIэхэми гъэкIотыгъэ гъэцэкIэжьынхэр яшIылIэгъэнхэм ипрограммэ гъэцэкIагъэ зэрэхъущтым епхыгъэ пшъэрылъхэр къафишIыгъэх. Партиеу «Единэ Россием» изэфэсэу щыIагъэм ащ фэгъэ­хьыгъэу УФ-м и Президент къыщиIогъагъ. РеспубликэмкIэ а программэм мэхьанэу иIэр КъумпIыл Мурат кыхигъэщыгъ. КIэлэцIыкIухэм шхыныгъо стыр­хэр ятыгъэнхэм епхыгъэу УФ-м и Президент ипшъэрылъхэр гъэцэкIагъэ хъунхэм пае ищыкIэгъэ Iофтхьабзэхэр зэкIэ Адыгеим щызэшIуахых.

«КIэлэцIыкIухэм афэгъэхьыгъэ пстэуми апшъэрэ мэхьанэ ятэты, тихэгъэгу инеущырэ мафэ, лъэпкъым ипсауныгъэ зыфэдэщтыр ахэм зэрялъытыгъэр къыдгурэIо ыкIи тынаIэ ащ тетэгъэты», — къыхигъэщыгъ АР-м и ЛIышъхьэ.

ЗэIукIэгъум илъэхъан анахьэу анаIэ зытырагъэтыгъэхэм ащыщ илъэсыкIэ еджэгъум еджапIэхэр фэгъэхьазырыгъэнхэм иIофыгъо.

Адыгэ Республикэм и ЛIышъхьэ ипресс-къулыкъу