Арэущтэу зылъытэрэмэ ащыщ Адыгэ республикэ клиническэ сымэджэщым лъынтфэ хирургиемкIэ иотделение ипащэу, зэлъашIэрэ врачэу Борсэ Мухьамэд.

БэмышIэу Мухьамэд гущыIэгъу тыфэхъугъ, вакцинациеу зэрэдунаеу ща­шIырэм еплъыкIэу фыриIэр, ар ежь аригъэшIыгъэмэ теупчIыгъ.

— Зытетыр къэсIон: мы лъэхъаным нэмыкI хэкIыпIэ щыIэп, вакцинациер ищыкIагъ, ащ джэнджэш сэ сшъхьэкIэ фысиIэп.

Тэ тиIофшIэн елъытыгъэу цIыфхэм ренэу тахэт,а узыр къызэутэкIыным ищынагъо зышъхьарытхэм пстэуми апэу тащыщ. Сэ вакцинэр къысхалъ­хьагъэгоп, сыда пIомэ си­шъхьэгъуси сэри корона­вирусыр къытэузи сымэ­джэщым тычIэлъыгъ. Джыдэдэм антителахэр шап­хъэм нэсэу тиIэхэу анализхэм къагъэлъэгъуа­гъэшъ, вакцинэр зыхядгъэ­лъхьаныр ищыкIагъэгоп. Ау зэхъокIыныгъэ ахэм афэ­хъоу, вакцинэр ищыкIагъэ зыхъукIэ, зэрязгъэ­шIыщтым щэч хэлъэп. Сы­мэджэщым Iоф зэрэщысшIэрэм епхыгъэу цIыфэу сымаджэ хъугъэм къинэу ылъэгъурэм сыщыгъуаз, мафэ къэс ар сэлъэгъу. Ау коронавирусыр къы­зэузыгъэхэр хьазабэу зы­хафэхэрэр сэ сшъхьэкIэ сыушэтыгъэшъ, джыри зэ ар сэри, сигупсэхэми тпэ­кIэкIынэу, ащ фэдэ чIыпIэ джыри тифэнэу сыфаеп. ЦIыфэу а узыр къызэу­зыгъэм къехъулIэрэмрэ къинэу ылъэгъурэмрэ щэчалъэм изы лагъэ иплъхьэу, адырэм ащ зы­щыу­ухъумэным пае пшIэн плъэкIыщтыр, амалэу непэ щыIэр зиплъхьэрэм нафэ къэхъу ахэр зэбгъэпшэнхэу зэрэщымытхэр. А узым тыпэуцужьыным фэшI анахь макIэу джары — вакцинациер ары тшIын тлъэкIыщтыр. ЗэкIэми ащ тегупшысэн, «коллективный иммунитет» тиIэ хъуным тыкъыфэкIон фае. Джары ащ тызэрэтекIон тлъэкIыщт закъор. Псауны­гъэкIэ зэкIэми сышъуфэ­лъаIо. ЖакIэмыкъо Аминэт.