Ныбджэгъу лъапIэхэр!

НыбжьыкIэхэм я МафэкIэ тышъуфэгушIо!

НыбжьыкIэгъур гугъэпIэшхохэр зыщыряIэ, цIыфым къырыкIощтыр зэлъытыгъэ унашъохэр заштэрэ анахь охътэ дахэу щыт. ЩыIэныгъэм илъэныкъо зэфэшъхьафхэм закъащагъэлъэгъонэу ныбжьыкIэхэм амалэу яIэр нахьыбэ къэс нахьышIу.

Мы лъэныкъомкIэ къэралыгъо политикэу зэрахьэрэр зыфэкIожьырэр ныбжьыкIэхэм щыIэныгъэм яфэшъошэ чIыпIэ щаубытынымкIэ, хэгъэгуми, республикэми яIофыгъохэм нахь чанэу ахэлэжьэнхэмкIэ ищыкIэгъэ амалхэр ягъэгъотыгъэнхэр ары.

Ащ пае Адыгеим проект, программэ гъэнэфагъэхэр щагъэцакIэх, спорт, научнэ, культурнэ инфраструктурэр щагъэпсы, ныбжьыкIэхэм IофшIапIэхэр къафэгъотыгъэным, специалист, унэгъо ныбжьыкIэхэм IэпыIэгъу ягъэгъотыгъэным япхыгъэ пшъэрылъхэр щызэшIуахых.

Ежь ныбжьыкIэхэри къыхэлажьэхэзэ, ащ фэдэ Iофыгъуабэ зэшIуахы. ТикIалэхэмрэ типшъашъэхэмрэ республикэм иобщественнэ, иэкономическэ, иполитическэ щыIэныгъэ яIахьышхо хашIыхьэ, политикэ, культурэ Iофтхьэбзэшхохэм язэхэщэн чанэу хэлажьэх. Республикэм ис ныбжьыкIэхэу пандемием илъэхъан цIыфхэм IэпыIэгъу афэхъугъэхэм тхьашъуегъэпсэу ятэIо.

Нахьыжъхэм ачIыпIэ зицыхьэ зытелъыжь ныбжьыкIэ чанхэр къызэриуцохэрэр тинэрылъэгъу. Ащ къыушыхьатырэр Адыгеим тапэкIи зыпкъ итэу хэхъоныгъэ зэришIыщтыр ары.

Ныбджэгъу лъапIэхэр! МэфэкIымкIэ джыри зэ тышъуфэгушIо! Псауныгъэ пытэ, щыIэкIэ-псэукIэшIу шъуиIэнэу, шъунасыпышIонэу, гушIуагъом шъущымыкIэнэу, шъуицыхьэ зытелъыжьэу ыпэкIэ шъулъыкIотэ зэпытынэу, текIоныгъакIэхэм шъуафэкIонэу, IофышIоу ешъухьыжьэрэ пстэуми гъэхъагъэхэр ащышъушIынэу шъуфэтэIо!

Адыгэ Республикэм и ЛIышъхьэу, Урысые политикэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат

Адыгэ Республикэм и Къэралыгъо Совет — Хасэм и Тхьаматэу Владимир Нарожный