Диспансеризациер Адыгеим мы илъэсыр екIыфэ щыкIощт. Коронавирусыр къызэу­зыгъэхэм ягу-лъынтфэ ыкIи жьыкъэщэпIэ си­стемэхэм узым зэрарэу арихыгъэр къыхэгъэщыгъэными ар фэIорышIэщт. Уплъэ­кIунхэр зэрэзэхащэщтхэр Мыекъопэ къэлэ IэзапIэу N 1-м ищысэкIэ зэдгъэ­шIагъ. Ащ иврач шъхьаIэу ЕмтIылъ Окса­нэ гущыIэгъу тыфэхъугъ.

— Оксана, къэблэгъэрэ медицинэ уплъэкIуныр сы­да ыпэрэ илъэсхэм щы­Iа­гъэхэм зэратекIырэр?

— Хабзэ зэрэхъугъэу, илъэс къэс цIыфхэм аныбжь елъытыгъэу зэтеутыгъэу япсауныгъэ изытет тэуплъэ­кIу. Ау мыгъэ а уплъэкIунхэм нахь ахагъэхъуагъ. Хэт­кIи шъэфэп цIыфым ыпкъы­нэ-лынэ анахь мэхьанэ зи­Iэхэм узыкIэу къежьэгъэ COVID-м иягъэ зэраригъэ­кIырэр. Анахьэу гу-лъынтфэ зэхэтым лъыпцIэныр фэ­къаигъэ мэхъу, лъым хэлъ шъоущыгъур дэкIуае. Ахэр зэкIэри игъом къыхэгъэщыгъэнхэм мыгъэрэ диспансеризациер фытегъэпсыхьагъ.

— Мыщ хэхьэрэ уплъэ­кIун гъэнэфагъэхэм нахь игъэкIотыгъэу уакъытегущы­Iагъэмэ дэгъугъэ.

— УплъэкIунхэр зэфэ­шъхьа­фых: лъым изытет игъэ­кIотыгъэу зэрагъэшIэщт, жьы къызэращэрэм (сату­ра­цием) еплъыщтых, Д-ди­мет­рие, спирометрие е спиро­графие, рентген, эхокардио­графие ыкIи компьютернэ томографие ашIыщтых.

ХэзгъэунэфыкIымэ сшIоигъу, мы уплъэкIун пстэури нэбгырэ пэпчъ фашIыщтэп. Диспансе­ризациер едзыгъуитIоу зэтеутыгъ. ИпсауныгъэкIэ щыкIагъэ­хэр иIэу апэрэ едзыгъом къы­зигъэ­лъагъокIэ, ащ елъытыгъэу ятIонэрэр ыкIунэу агъакIо. Мыщ нахь игъэкIотыгъэ уплъэкIунхэр хэхьэх. БлэкIыгъэ илъэсхэм къызэрагъэлъэгъуагъэмкIэ, диспансеризациер зыкIунэу къа­кIохэрэм ащыщыбэм «апэрэ едзыгъор скIунэу сыфаеп, ятIо­нэрэр ары» е «мыщ фэдэ спе­циалистыр сищыкIагъэп» зы­Iохэрэр къахэкIых. Арэущтэу щытэп мы Iофыр. Диспансеризацием къыхиубытэрэ Iофыгъо­хэр зэкIэ шIокI имыIэу цIыфым ышIынхэ фае.

— Оксана, хэткIи шъэфэп, коронавирусыр нэбгырабэмэ апэкIэкIыгъ. Ащ фэдиз цIыфыр ыуплъэкIуным шъуиIэзапIэ фэ­хьа­зыра? Чэзыухэр щыIэхэ хъущтба?

— План гъэнэфагъэу тиIэм къызэрэдилъытэу, диспансеризацием нэбгырэ мин 12 къыхиубытэн фае. Ау нахьыби тыуплъэкIун амал тиI, шIоигъоныгъэ зиIэу къытэуалIэрэр IудгъэкIыжьыщтэп. ЕгъэзыгъэкIэ цIыфхэр къыхэтщыщтхэп. Ко­ронавирусыр къызэузыгъэхэм яспискэ тиI. Ау къэзымышIэу ыгъэсымэджагъэхэри щыIэх, ар уплъэкIун гъэнэфагъэм къы­гъэлъэгъощт.

Чэзыухэм ягугъу къэтшIымэ, ахэр щыIэхэ хъущтэп. ИкIыгъэ илъэсым пандемием тиIофшIакIэ зэблытигъэхъун ылъэкIыгъ, шIыкIэ гъэнэфагъэхэри дгъэфедэхэ хъугъэ. Ащ пае бэдзэ­огъум и 1-м къыщегъэжьагъэу шэмбэтрэ Iоф тшIэныр етэгъэ­жьэжьы. IофшIэгъу мафэхэм къемыкIолIэшъухэрэр шэмбэтым тштэщтых. Ящэнэрэ амалэу дгъэ­федэхэрэм ащыщ диспансеризациер зыкIу зышIоигъохэм къэралыгъо фэIо-фашIэхэм я ЗыкI порталкIэ зыхатхэн зэралъэкIыщтыр.

— ЦIыфым диспансеризаци­ер зыщишIыщтыр зыщы­псэурэ чIыпIэм елъытыгъэу щыта?

— Республикэм мы Iофтхьабзэр зыщызэхащэщт чIыпIэхэр щагъэнэфагъэхэу щыт. Мые­къуапэкIэ тэ тиIэзапIэ къыха­хыгъ. Арышъ, къэлэдэсхэр зэкIэ мыщ къекIолIэнхэ фитых. Регистратурэм зыIухьэхэкIэ, медицинэ профилактикэмкIэ отделением агъэкIощтых. Ау зыгорэкIэ а уахътэм цIыфыр сымаджэу терапевтым дэжь щыIэу тефа­гъэ­мэ (врачыр къызезэгъыкIэ), диспансеризацием ыгъэкIон ылъэкIыщт.

ШъушIэным пае. Медицинэ организациехэу диспансеризациер зыщакIунэу республикэм щагъэнэфагъэхэр: Мыекъопэ къэлэ IэзапIэр, Ханскэм дэтыр, Тэхъутэмыкъое гуп­чэ район сымэджэщыр, К. Батмэным ыцIэ зыхьырэ сымэджэщэу Адыгэ­къалэ дэтыр, Шэуджэн, Мые­къопэ, Кощхьэблэ, Красногвардейскэ ыкIи Джэджэ гупчэ район сымэджэщхэр.

Iэшъынэ Сусан.

Сурэтхэр Iэшъынэ Аслъан тырихыгъэх.