Урысые Федерацием и Президентэу Владимир Путиныр полити­че­скэ партиеу «Единэ Россием» и Зэфэс къыщыгущыIагъ. Непэрэ ма­фэм ехъулIэу партием зэшIуихын ылъэкIыгъэм, пшъэрылъхэм, нэмыкI лъэныкъохэм къэралыгъом ипащэ къащыуцугъ.

«Единэ Россиер» зызэхащагъэр мы илъэсым тыгъэгъазэм илъэс 20 хъущт. А уахътэм къыкIоцI ар ылъэ пытэу теу­цуагъ, цыхьэ къыфэзышIырэ хэдзакIохэм япчъагъэ хэпшIыкIэу хэхъуагъ. Непэ къэралыгъом­кIэ ар партие шъхьаIэу щыт.

— ЦIыфхэм, хэдзакIохэм цыхьэу къышъуфашIырэм къыщышъумыгъакIэу чIыпIэхэм Iоф ащышъушIэным, пшъэдэкIыжьэу шъухьырэр къыжъугурыIоным мэхьанэшхо иI. Илъэс тIокI ­фэ­диз хъугъэу а пшъэрылъхэр зэрифэшъуашэу шъогъэцакIэх, сыд фэдэрэ лъэныкъокIи пэ­рытныгъэ шъуIыгъ, — къыIуагъ УФ-м и Президент къэзэрэу­гъоигъэхэм закъыфигъазэзэ.

Анахьэу анаIэ зытырагъэтын фэе лъэныкъохэр, гухэлъхэр, УФ-м и Президент Федеральнэ ЗэIукIэм фигъэхьыгъэ Джэпса­лъэм къыщиIуагъэх. Пшъэрылъхэм ягъэцэкIэн партие зэфэ­шъхьафхэм, общественнэ организациехэм, граждан обществэм иструктурэ зэфэшъхьафхэм яIахьышIу зэрэхэлъыр, ау мыщкIи «Единэ Россиер» пстэуми къазэрэхэщырэр Владимир Путиным къыIуагъ.

Партием игукъэкIыкIэ аштэрэ федеральнэ ыкIи шъолъыр законопроектыр цIыфхэр социальнэу къэухъумэгъэнхэм, ахэм ящыIэкIэ-псэукIэ нахьышIу шIы­гъэным фэIорышIэх. «Единэ Россием» илIыкIохэр цIыфхэм гущыIэгъу афэхъухэзэ, ахэм ягу­мэкIыгъохэр зэрагъашIэх ыкIи зэхафых. А IофшIэныр та­пэкIи лъыгъэкIотэгъэным, нахь гъэлъэшыгъэным мэхьанэшхо зэриIэр къэралыгъом ипащэ хигъэунэфыкIыгъ.