Урысые Федерацием и Къэралыгъо Думэ физическэ культурэмкIэ, спортымкIэ, зекIонымкIэ ыкIи ныбжьыкIэ IофхэмкIэ и Комитет хэ­тэу Хьасаныкъо Мурат пэIудзыгъэ шIыкIэм тетэу цIыфхэр ригъэблэ­гъагъэх.

УФ-м иполитикэ партиеу «Единэ Россием» и Тхьаматэу Д. А. Медведевым ишъолъыр общественнэ приемнэ Iофтхьабзэр щызэхащагъ. ЗекIоным ыкIи гъэмэфэ зыгъэпсэфыгъо уахътэм япхыгъэ Iофыгъохэр ары анахь шъхьаIэу зытегущы­Iагъэхэр.

Iофтхьабзэр окIофэ парламентарием республикэм щы­псэурэ ыкIи ихьэкIэ заулэмэ зы­къыфагъэзагъ.

УФ-м и Правительствэ пшъэ­рылъэу къыфишIыгъэми диштэу Ростуризмэм зэхигъэу­цогъэ программэу кIэлэцIыкIу лагерым кIохэрэм путевкэм ищэфын пэIуагъэхьагъэм изы Iахь (зекIоным фэдэу) къафызэкIагъэкIожьынымкIэ амалэу щыIэхэм цIыфхэр къакIэупчIагъэх. Депутатым упчIэхэм игъэ­кIотыгъэ джэуапхэр къариты­жьыгъ.

Республикэм щыпсэурэ зэшъхьэгъусэхэм къаIэтыгъэ Iофыгъор зыфэгъэхьыгъагъэр зэзэгъыныгъэм къыдилъытэрэ лъэныкъохэр туристическэ компанием зэримыгъэцэкIагъэхэм изэхэфын ары. Хэбзэгъэуцугъэм диштэу цIыфхэм яфитыныгъэхэр зэтегъэуцожьыгъэнхэм фэшI федеральнэ депутатым уплъэкIун-лъыплъэн къулыкъухэм зафигъэзагъ.

— Пандемием илъэхъан цIыф­­хэм щынэгъончъэу загъэ­псэфыным мэхьанэшхо иI. Ар зэшIохыгъэ хъуным къэралы­гъом ыкIи шъолъырым япащэхэм анаIэ тет. Урысыем зыщагъэ­псэфыным цIыфхэр фэщэгъэнхэмкIэ ыкIи зекIоным зыщиу­шъомбгъунымкIэ шIуагъэ къытэу IофшIэныр зэхащэ, — къыхи­гъэщыгъ Хьасаныкъо Мурат.

ЦIыфхэм нэмыкI упчIэхэри къатыгъэх, ахэми яджэуапхэр агъотыжьыгъэх.

Къандор Анзор УФ-м и Къэралыгъо Думэ идепутат иIэпыIэгъу.