Федеральнэ хэбзэгъэуцугъэу «О национальной платежной системе» зыфиIорэм къызэрэщыдэлъытагъэмкIэ, пенсие е нэмыкI ахъщэ тын къызыфакIоу ар банкым къызIэкIигъахьэхэрэр къихьащт бэдзэогъу мазэм и 1-м шIомыкIэу картэу «МИР» зыфиIорэм техьажьынхэ фае.

Почтэм е нэмыкI организациеу пенсиехэр аIэкIэзыгъа­хьэхэрэм къызфихьыхэрэм мы шапхъэр анэсырэп.

Адыгеим щыпсэоу пенсиер е нэмыкI ахъщэ тыныр банкымкIэ къызфакIохэрэм янахьыбэм мы картэм зыфагъэзэжьыгъ. Нэ­мыкI картэхэмкIэ (MasterCard, Visa, нэмыкIхэр) къызIэкIахьэхэрэм «МИР-м» техьажьынхэу мэкъуо­гъу мазэм и 30-м нэс пIалъэу яI.

Картэр бгъэпсыным пае бан­кым зыфэбгъэзэн фае. Ар зэ­рэ­зэблэпхъурэм имызакъоу, бан­кым иреквизитэу ахъщэр къызэрыхьэхэрэри зэхъокIыгъэ зыхъукIэ, ПенсиехэмкIэ фондыр ащ щыбгъэгъозэныр шIокI зимыIэ Iоф. Ащ пае лъэIу тхы­лъыр «унэе кабинетым» е къэралыгъо фэIо-фашIэхэм япортал ащыптын плъэкIыщт. ПенсиехэмкIэ фондым икъулыкъоу цIыфхэм Iоф адэзышIэрэм е МФЦ-м уякIуалIэми пIахыщт, ау ахэм пэшIорыгъэшъэу зябгъэтхын фае.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу