Сымэджэщхэм яIэпыIэгъу щыкIэхэрэм япчъагъэ хэхъо
МэфипшIым къыкIоцI коронавирусыр къызэузыгъэхэу сымэджэщым зыщяIэзэн фаехэм япчъагъэ зэхапшIэу къыхэхъуагъ. Ащ епхыгъэу зэпахырэ узхэм зыщяIэзэхэрэ Адыгэ республикэ клиническэ сымэджэщым икIэрыкIэу гъолъыпIэ чIыпIэхэр къызэIуехыжьых.
Ар нэбгырэ 220-мэ ателъытэгъэщт, Мыекъопэ къэлэ сымэджэщыми икъатитIу ащ фагъэхьазыры.
— Охътэ гъэнэфагъэкIэ узэкIэIэбэжьымэ, COVID-19-р зэкIакIуи сымаджэхэм япчъагъэ нахь макIэ зэхъум, медицинэ организациехэу ковиднэ лъэныкъомкIэ Iоф зышIэщтыгъэхэр зэфэтшIыжьыгъэх. Зэпаххэрэ узхэм зыщяIэзэхэрэ сымэджэщым чIыпIи 100 къыфэдгъэнагъэу Iоф ышIэщтыгъ. Нэбгырэ 40 — 45-м шIокIыщтыгъэп чIэлъыгъэр. ГухэкI нахь мышIэми, джы узым лъэшэу зыкъиIэтыжьэу фежьагъ ыкIи мы уахътэм ехъулIэу нэбгыри 143-рэ а сымэджэщым чIэлъ. Сымэджэ хьылъэу нэбгырэ 11-р реанимацием илъ, — къыIуагъ Адыгэ Республикэм псауныгъэр къэухъумэгъэнымкIэ иминистрэ иапэрэ гуадзэу Максим Коробко.
Зэпаххэрэ узхэм зыщяIэзэхэрэ Адыгэ республикэ клиническэ сымэджэщым чIэт пIэкIор 220-м нэмыкIэу Мыекъопэ къэлэ клиническэ сымэджэщым щын хирургиемкIэ иотделение зычIэт унэу къатитIу хъурэр ковиднэ сымаджэхэм апае зэтырагъэпсыхьэ. Псауныгъэр къэухъумэгъэнымкIэ министрэм иапэрэ гуадзэ зэрэхигъэунэфыкIыгъэмкIэ, коронавирусыр къызлъыIэсыгъэхэм яIэзэгъэнымкIэ гъэлъэшыгъэ шIыкIэм республикэр фэхьазыр. ИкIыгъэ илъэсым пандемием медицинэм иIофышIэхэр пэуцужьынхэ алъэкIыгъ, Iэзэн шIыкIэхэм афырагъэджагъэх.
— Мы уахътэм коронавирусым иштаммыкIэхэр къежьагъэхэу къэралыгъуабэмэ гъунэпкъэ гъэнэфагъэхэр ащагъэуцух. Джыри ахэм тишъолъыр къафимыгъэзэжьынымкIэ, узыр хьылъэу тпэкIэмыкIынымкIэ зишIуагъэ къэкIощт закъор вакцинациер ары. Коронавирусым пэуцужьырэ вакцинэр зыхарагъэлъхьанэу цIыфхэм сыкъяджэ. Сэ сшъхьэкIэ ар къыхэсхыгъ, сиунагъуи, сиIахьылхэри узым щыухъумагъэхэ хъунхэм фэшI прививкэр арагъэшIыгъ, — къыхигъэщыгъ Максим Коробко.
Вакцинэр зыщахалъхьэрэ чIыпIэ 32-рэ Адыгеим къыщызэIуахыгъ ыкIи мобильнэ пункти 2-мэ Iоф ашIэ. «Спутник V» зыфиIорэр икъоу аIэкIэлъ, джыри шIэхэу хэлъхьагъу мин 14 республикэм къыIэкIэхьащт. Аужырэ вакцинитIоу къежьа- гъэр япчъагъэкIэ макIэу тишъолъыр къыIэкIэхьагъэх ыкIи ахалъхьэгъахэх.
Iэшъынэ Сусан.