КIэлэцIыкIухэу илъэси 3-м къыщегъэжьагъэу илъэси 7-м нэс зы­ныбжьхэм мазэ къэс ахъщэу аратыщтым тегъэпсыхьагъэу Урысые Фе­дерацием и Правительствэ ыухэсыгъ хэгъэгум ишъолъырхэм апае федеральнэ бюджетым ахъщэ тедзэу къыхагъэкIыщтыр зыфэдизыр.

Адыгеим а гухэлъхэм апае сомэ миллион 275,3-м ехъу къыфыхагъэкIыгъ. Урысые Федерацием и Къэралыгъо Думэ Адыгэ РеспубликэмкIэ идепутатэу Владислав Резник ащ фэгъэхьыгъэу макъэ къыгъэIугъ. Урысые Федерацием и Федеральнэ ЗэIукIэ и Комиссиеу бюджет ассигнованиехэм ятегощэн фэгъэзагъэм Владислав Резник кIэщакIо зыфэхъугъэ Iофым къызыдырегъэштэ нэуж Урысые Федерацием и Пра­вительствэ ащкIэ унашъохэр ыштагъэх. Адыгеим и ЛIышъхьэу КъумпIыл Мурат федеральнэ IэпыIэгъум мэхьанэу иIэр къыхигъэщыгъ, анахьэу етIани сабыйхэр зэрыс унагъохэр социальнэу ухъумэгъэнхэмкIэ пшъэрылъхэр гъэцэкIагъэ хъунхэм ар фытегъэпсыхьагъ. Илъэсэу икIыгъэм республикэмкIэ кIэлэцIыкIу мин 93,5-м ехъумэ ахъщэ къаратыгъагъ. ПстэумкIи зэхэубытагъэу сомэ миллирди 2,9-рэ фэдиз ар зэрэхъущтыгъэр. Ащ нэмыкIэу республикэ бюджетым къыхагъэкIи гъот макIэ зиIэ унэгъо мини 10,8-м сомэ миллион 39,5-м ехъу зэтыгъо ахъщэ IэпыIэгъоу аратыгъагъ.

«Социальнэ Iофыгъохэм язэшIохынкIэ ренэу фэныкъоныгъэ зиIэхэр къыдэтэлъытэх. Анахьэу етIани пандемием илъэхъан ащ фэдэ екIолIакIэр нахь зыпытагъэр. Хэгъэгум и Президентэу Владимир Путиным сабыйхэр зэрыс унагъохэм IэпыIэгъу ятыгъэныр ары анахьэу къыхигъэщыгъэр. Илъэсэу икIыгъэм Iофтхьэбзэ тедзэхэу социальнэ IэпыIэгъумкIэ зэрахьагъэхэр ыпэкIэ щыIагъэхэм хэпшIыкIэу ашъхьадэкIых. Мы илъэсми а IофшIэныр лъыдгъэкIотэщт», — къыIуагъ Адыгеим и ЛIышъхьэ.

2021-рэ илъэсымкIэ федеральнэ бюджетым ехьылIэгъэ законым къыдилъытэрэ Iоф­тхьабзэхэм къапкъырыкIыхэзэ Адыгеим щыпсэурэ кIэлэцIыкIухэу илъэси 3-м къыщегъэжьагъэу илъэси 7-м нэс зыныбжьхэм мазэ къэс федеральнэ ахъ­щэ IэпыIэгъоу аIэкIагъэхьащтыр сомэ миллиард 1,2-м ехъу. НепэкIэ республикэм ис кIэлэцIыкIу мин 15,5-рэ фэдиз ахъщэ зэратыщтыр, ахэр унэгъо мин 12,8-м ащапIух.

Шъугу къэтэгъэкIыжьы: Урысые Федерацием и Президент кIэщакIо фэхъуи, илъэсэу икIыгъэм иублэгъухэм адэжь илъэси 3-м къыщегъэжьагъэу илъэси 7-м нэс зыныбжь кIэлэцIыкIухэм ахъщэ IэпыIэгъу аратэу рагъэжьагъ. Сабый цIыкIухэр зэрыс фэныкъо унагъохэмкIэ ащ фэдэ IэпыIэгъум мэхьанэ­шхо иIэу щыт. Урысые Федерацием и Президент мы илъэсым гъэтхапэм къыдигъэкIыгъэ уна­шъом тетэу кIэлэцIыкIухэм апае къа­тIупщырэ ахъщэм хагъэхъуагъ. ГущыIэм пае, кIэлэцIыкIухэр рыпсэунхэмкIэ анахь ахъщэ ма­кIэу агъэнэфагъэм ызыныкъо фэдиз хъурэ ахъщэу къызыпкъы­рыкIыхэрэр фэдитIу хьазыркIэ нахьыбэ ашIын алъэкIыщт.

«Илъэсэу икIыгъэм бжыхьэм 2021 — 2023-рэ илъэсхэмкIэ федеральнэ бюджетыр аштэ зэхъум Адыгеим ипащэхэр сигъу­сэхэу илъэси 3-м къыщегъэ­жьа­гъэу илъэси 7-м нэс зыныбжь кIэлэцIыкIухэм апае респуб­ли­кэм сомэ миллиардым ехъу къыфыхядгъэгъэкIыгъагъ. Бюджет ассигнованиехэр атегощэгъэнхэм фэгъэзэгъэ парламент Комиссием Урысые Федерацием и Правительствэ игъусэу илъэсэу икIыгъэм зэрашIыгъэм фэдэу социальнэ пшъэрылъхэм ягъэцэкIэнкIэ шъолъырхэм ахъщэр афикъуным анаIэ ­тырагъэ­ты. Адыгеим ахъщэ тедзэу къы­фы­ха­гъэкIыгъэ сомэ миллион 275,3-м илъэси 3-м къыще-гъэ­жьагъэу илъэси 7-м нэс зы­ныбжь кIэлэцIыкIухэм зэкIэ аIэ­кIагъэхьэн фэе ахъщэр ­икъоу алъыгъэIэсыгъэнымкIэ ишIуагъэ къэкIощт. ТапэкIэ, ищыкIагъэу хъумэ, етIани ахъщэ тедзэ къы­зэрэфыхагъэкIыщт амалхэм тяусэщт», — къыхигъэщыгъ Владислав Резник. АР-м и ЛIышъхьэ ипресс-къулыкъу