Мэкъуогъу мазэр къызихьагъэм къыщыублагъэу шъолъыр гъэIоры­шIэнымкIэ Гупчэу Адыгеим щылажьэрэм цIыфхэм гъогогъу 487-рэ зы­фагъэзагъ, ахэм янахьыбэр охътэ кIэкIым зэшIохыгъэ хъугъэ.

Социальнэ хъытыухэмкIэ къагъэхьырэ упчIэхэм япчъагъэ хэхъо. Зэгъэпшэгъэным пае: жъоныгъокIэ мазэм иаужырэ тхьамэфитIу Гупчэм фэгъэзэн 413-рэ къыIэкIахьи, ахэм ащыщэу 205-р ардэдэм зэхафи къэ­нагъэм Iоф дашIэжьыгъэмэ, джы фэгъэзэнхэм япчъагъэ мазэу къихьагъэм 74-кIэ нахьыб — 487-рэ хъугъэ. ЗэшIуахыгъэхэм ябагъи хэхъуагъ — жъоны­гъуакIэм итхьамэфитIу 205-рэ хъущтыгъэмэ, мэкъуогъум и ащ фэдиз уахътэкIэ 268-м нэсыгъ. Джыри 219-мэ Iоф адашIэ ыкIи язэшIохын кIэухым фэкIо. Аужырэ тхьамэфитIум зыкъызэра­фагъэзэгъэ пчъагъэм щыщэу 142-р лъэныкъуитIу зэпхыны­гъэм иамалхэмкIэ къаIэкIэ­хьагъ, 345-р «Инцидент менеджмент» зыфиIорэ системэу социальнэ хъытыухэмкIэ агъэфедэрэм ща­гъэунэфыгъ. ЗэшIуахыгъэ Iофыгъохэр — 178-р — социальнэ хъытыухэмкIэ зыкъызэрафа­гъэзагъэх. Ащ къикIырэр хабзэм иIофышIэхэмрэ республикэм щыпсэухэрэмрэ шIуагъэ къытэу къэралыгъо къулыкъухэм яофициальнэ нэкIубгъохэу Инста­грамым, «ВКонтакте» ыкIи «Од­ноклассники» зыфиIохэрэм щыряIэхэмкIэ зэрэзэдэлажьэ­хэрэр ары.

ГумэкIыгъохэу зыкъызэра­фагъэзагъэхэм янахьыбэр зы­фэгъэхьыгъэр гъогухэм язытет — 60. ЯтIонэрэ чIыпIэр зэтегъэпсыхьаныр ары — 31-рэ. ПсэупIэ-коммунальнэ хъызмэтым епхыгъэхэм ящэнэрэ чIыпIэр аIыгъ — фэгъэзэн 23-рэ. ЯплIэнэрэр — 19-р — социальнэ фэIо-фашIэхэмрэ цIыфхэр социальнэу къэухъумэгъэнхэм­рэ. ГумэкIыгъохэмкIэ ятфэ­нэрэ чIыпIэм щытыр газым иищэнрэ гъэстыныпхъэмрэ — 15.

«Одноклассники» зыфиIорэ социальнэ хъытыур къызфа­гъэфеди закъыфагъэзагъ Красногвардейскэ районым щы­псэухэрэм. Район администрацием иофициальнэ нэкIубгъо къэтхагъэх зэшъхьэгъусэхэр ыкIи псэупIэу Белэм игупчэ ит кIэлэцIыкIу джэгупIэм изытет зэрэдэир къыхагъэщыгъ — хэ­кIыр тиз, зи лъыплъэрэп. Мы гумэкIыгъор фагъэзагъ шъолъыр гъэIорышIэнымкIэ Красногвардейскэ муниципальнэ гупчэм ыкIи муниципальнэ псэупIэм иадминист­рацие иIофышIэхэм аIэкIагъэ­хьагъ.

­Тхьаусыхэ тхылъыр зызэхаф нэуж чIыпIэу зигугъу ашIыгъэм зы нэбгырэ фагъэнэфагъ тхьамафэм щэ къызэIихынэу ыкIи къэбзэныгъэм ылъэныкъокIэ изытет лъыплъэнэу. Ащ нэмыкIэу джэгупIэр нэфынэу зэтырагъэпсыхьагъ, мы илъэсым видеолъыплъэнри щагъэ­псыщт.

Джащ фэдэу псэупIэу Красногвардейскэм дэсхэм ялъэIукIэ Лениным ыцIэ зыхьырэ урамыр къэнэфынэу агъэпсы­жьыгъ.

Мы районым иадминистрацие иофициальнэ нэкIубгъо (@krasnogvardeiskyi_raion) район гупчэм щыпсэурэ бзылъ­фыгъэм къыритхагъ: «Тиурам къэнэфыжьырэп, остыгъэр зэпыстыкIыгъэн фае е тэрэзэу игъэчэрэгъуагъэп. Ломоносовым ыцIэ зыхьырэ урамым икъежьапI, я 3-рэ ун». Мызыгъэгуми къатхыгъэм апэу гу лъызытагъэр шъолъыр гъэIоры­шIэнымкIэ Красногвардейскэ муниципальнэ гупчэм ипащ ыкIи къоджэ псэупIэм иадминист­рацие ар ыгъэхьыгъ. Адресэу итхагъэм IофышIэхэр агъэ­кIуагъэх, гъэцэкIэжьынхэм апае ищыкIагъэр къызIэкIагъэхьагъ. Нахь кIасэу бзылъфыгъэм къыт­хыжьыгъ гумэкIыгъор зэрэда­гъэзыжьыгъэр.

ЛъэныкъуитIу зэпхыныгъэм иамалхэр къызфигъэфедэхи, Мыекъуапэ щыпсэурэ бзылъ­фыгъэм игумэкIыгъо къыриIотыкIыгъ — тхьамэфэ пчъагъэ хъугъэу урамхэу Чкаловамрэ Пионерскэмрэ зыщызэблэ­кIы­хэрэм тет пкъыгъоу ящынагъокIэ апэрэ — ятIонэрэ классхэмкIэ зэтеутыгъэ пыдзафэхэр (батарейкэхэр, светодиоднэ остыгъэхэр, нэмыкIхэр) ратэкъонхэм тегъэпсыхьагъэм изы хъугъэу щыт.

«Батарейкэхэр къетэкъужьых, ртуть зэрыт остыгъэхэр къещых. Ахэр псауныгъэмкIэ щынагъо къыздэзыхьырэ пкъыгъох, цIыф бэ дэдэ мыщ мафэ къэс къыщекIокIы», — къы­тхыгъ бзылъфыгъэм.

Шъолъыр гъэIорышIэнымкIэ Гупчэм иIофышIэхэм мы къэбарыр къэлэ администрацием (@maikop_adm) IэкIагъэ­хьагъ. Мыекъопэ администраци­ем псэупIэ-коммунальнэ хъыз­мэтымкIэ ыкIи зэтегъэ­псыхьа­нымкIэ игъэIорышIапIэ иIофышIэхэр псынкIэу гумэкIыгъом идэгъэзыжьын фежьагъэх — къыкIэлъыкIорэ мафэм псэуа­лъэр арагъэукъэбзыгъ.

Шъолъыр гъэIорышIэнымкIэ Гупчэм сыд фэдэрэ лъэныкъокIи республикэм щыпсэухэрэм яупчIэхэм ынаIэ атет, къафагъэхьырэ пстэури мэхьанэ ратызэ зэхафы.