Дунаим щызэлъашIэрэ сурэтышI-модельерэу СтIашъу Юрэ иIофшIа­гъэ, щыIэныгъэм гупшысэу фыриIэм афэгъэхьыгъэ тхылъыр Мыекъуа­пэ къыщыдэкIыгъ.

Адыгэ Республикэм лъэпкъ IофхэмкIэ, IэкIыб къэрал­хэм ащыпсэурэ тилъэпкъэ­гъухэм адыряIэ зэпхыныгъэ­хэмкIэ ыкIи къэбар жъугъэм иамалхэмкIэ и Комитет федеральнэ къэралыгъо программэу «Къэралыгъо лъэпкъ политикэр гъэцэкIэгъэныр» зыфи­Iорэр щыIэныгъэм щыпхырещы. Адыгэ Респуб­­ли­кэм илъэпкъ­хэм якультурэ къыу­хъумэзэ, бгъэфедэн плъэ­кIыщт искусствэм пылъ IэпэIа­сэхэр яIофшIагъэ кIегъэгушIух.

ЗэхэщакIохэр

Тхылъым икъыдэгъэкIын изэ­хэщэкIо куп ипащэр Комитетым итхьаматэу Шъхьэлэхъо Аскэр.

КъокIыпIэм и Къэралыгъо музей ипэщэ шъхьаIэу А. В. Седовыр, КъокIыпIэм имузей икъутамэу Темыр Кавказым щы­Iэм ипащэу Н. З. Кушъур зэ­­хэщэкIо купым хэтыгъэх.

Тхы­лъым ипроект, ипэублэ гущыIэ яавторыр музеим ипащэ игуадзэу Ф. Сулеймановар ары. Л. ХъуакIор, Ж. Къоцыр, С. Левченкэр, А. Кадорэр, Джун Бепатрис Уильямс, А.Ш. Познахириныр, М. Худояровар, С.А. Никифоровыр IофшIэкIо купым хэтыгъэх.

ТедзапIэу «Качествэм» къыщыдагъэкIыгъэ тхылъэу «Через дизайн к миру. В мире мифов и реальности» зыфиIорэр урысыбзэкIэ, инджылызы­бзэкIэ тхыгъэ. Шъо зэфэшъхьаф сурэтхэмкIэ гъэкIэрэкIагъэ, да­хэу зэгъэфа­гъэшъ, псынкIэу узы­Iэпещэ.

Афэразэх

ЗэхэщэкIо купыр Адыгэ Рес­публикэм и Къэралыгъо ака­демическэ лъэпкъ къэшъокIо ансамблэу «Налмэсым» ихудожественнэ пащэу, Урысыем, Абхъазым, Пшызэ язаслуженнэ артистэу, Адыгэ Республикэм инароднэ артистэу Хъоджэе Аслъан фэраз. Ансамблэм иартист сэнаущхэу Хьакъуй Анжеликэ, Бэрзэдж Дианэ, Ахътэо Беллэ, Дыбэгъо Альбинэ, Къулэ Альбинэ, КIыкI Адыиф, Еутых Беллэ, Долэ Миланэ, Хьатитэ Аминэт, Анна Абрамцевам, Теу­цожь Изобеллэ, Едыдж Гу­шъао, Къулэ Алый, Къулэ Адемир, Дыбэгъо Адамэ, Къонэ Мухьамэд, Iэшъынэ Руслъан шъуашэхэм якъэгъэлъэгъонкIэ Iофышхо агъэцэкIагъ. СтIашъу Юрэ инэу фэраз тарихъымкIэ шIэныгъэлэжьэу Абрэдж Альмир, музеим илъэсыбэрэ пэ­щэныгъэ дызезыхьэгъэ Кушъу Нэфсэт, «тхьашъуегъэпсэу» зэ­риIожьы шIоигъохэм ащыщых Дунэе Адыгэ Хасэм хэтэу Охъу­тэ Александр, тхылъым икъыдэгъэкIынкIэ зэхэщэкIо купым пэщэныгъэ дызезыхьэгъэ Шъхьэ­лэхъо Аскэр, шъуашэхэм якъэгъэлъэгъон ехьылIэгъэ Iофхэр зыгъэцэкIэгъэ тучанэу «Европэм» ипащэу Игорь Кушнырь, бизнесменэу Ешэ Рэмэзанэ, Юрэ ишъхьэгъусэу Юлий. Дунаир зыхъожьыгъэхэм Тхьэм джэнэт къарет.

Еджэхэрэм афэкIо

Адыгэ Республикэм и ЛIы­шъхьэу КъумпIыл Мурат игу­пшысэхэу тхылъ еджэхэрэм афа­кIохэрэр гум къегущыIыкIых.

— «ЦIыфышIоу, зэлъашIэрэ сурэтышI-модельерэу, ежь ышIыгъэ шъуашэхэм, бгъэфедэн плъэ­кIырэ искусствэм афэгъэ­хьыгъэ къэгъэлъэгъон гъэшIэгъонхэр зэхэзыщэгъэ СтIашъу Юрэ ехьылIэгъэ тхылъыр къэ­шъуштагъ… уицыхьэ телъынэу щыт цIыфыбэмэ агу зэрэри­хьыщтым», — къетхы КъумпIыл Мурат.

Кушъу Нэфсэт, Сулейманова Фатимэ къатхыгъэхэм, шъуа­шэхэмрэ тхыпхъэхэмрэ афэ­гъэхьыгъэхэм уяджэзэ, СтIашъу Юрэ лъытэныгъэу фэтшIырэм хэхъо.

Шъуашэхэр, тхыпхъэхэр

Iуданэмрэ мэстапэмрэ зэдигъэIорышIэхэзэ, СтIашъу Юрэ философие гупшысэ зыхэлъ IофшIагъэ къегъэлъагъо. Шъуа­шэм анахьэу къыхигъэщырэр лъэпкъэу ар зиер, тарихъэу къыкIугъэр зыфэдэр ары. Зэман­хэр, илъэсхэр зэригъапшэхэзэ, лIэужхэр зэзыпхырэ амалхэм гукIэ уахещэ.

Шъуашэу «Тыргъэтаор» Къулэ Амэрбый къызыфигъэфеди, ащ техыгъэ къашъоу ыгъэуцугъэр илъэсыбэ хъугъэу республикэм и Къэралыгъо ансамблэу «Налмэсым» концертхэм къащешIы.

Адыгэ шъуашэу «ТекIоныгъэм исаугъэт, нарт бзылъфыгъэу Лащынэ ишъуашэ, Гикатей ишъуа­шэ, Михаил Черкасскэм фэгъэхьыгъэ шъуашэр, адыгэ бзылъфыгъэм исае, фэшъхьаф­хэм уяплъызэ, суртышI-модель­ерыр лъэпкъым, хэгъэгум зэ­ра­фэлажьэрэр, политикэм хэ­щагъэ зэрэхъурэр псынкIэу зэ­­фэохьысыжьы.

ООН-м итамыгъэ, шъуашэу «ЩэIагъэм», Кавказым итыгъэ игумэкIыгъохэм, къэбар жъугъэм иамалхэм яхьылIагъэм, дунаир мамырэу псэуным, Кав­каз заор 1864-рэ илъэсым зэраухыгъэм ехьылIагъэм, фэ­шъхьафхэм уяплъызэ, тарихъыр, лъэпкъ искусствэр нахьышIоу зэбгъашIэхэ пшIоигъо охъу.

Адыгэ Республикэм икъэ­ралыгъо гъэпсыкIэ игъэпытэн СтIашъу Юрэ иIахьышIу зэрэ­хэлъыр шъуашэхэм, тхыпхъэхэм къахэогъэщы. «Адыгэ Рес­публик» зыфиIорэр, чIыопсым икъэухъумэн, фэшъхьафхэм гур къаIэты, агъэгупшысэ.

Унагъом, лIэкъо тамыгъэхэм, Олимпиадэ джэгунхэу Шъачэ щыкIуагъэхэм ащызэхищэгъэ къэгъэлъэгъонхэм, нэмыкIхэм уагъэгъуазэ.

БлэкIыгъэ лъэхъэнэ къиным гукIэ укъыхэкIынышъ, уилъэпкъ итарихъ, икультурэ нахь куоу зэбгъэшIэнхэ фаеу Ю. СтIашъум елъытэ. Лъэпкъыр ыпэкIэ лъыкIотэным фэшI щыIакIэу лъэпкъым иIагъэр зыщигъэгъу­пшэ хъущтэп.

— Лъэпкъ шъуашэр блэкIыгъэ лъэхъэнэ чыжьэм адыгэм ыгъэ­лъапIэщтыгъ, рыгушхощтыгъ, къеIуатэ СтIашъу Юрэ. — Шъуа­шэр ипаспортэу ылъытэщтыгъ.

Адыгэ шъуашэм и Мафэ илъэс къэс Iоныгъом и 28-м дунаим щагъэмэфэкIы. СтIашъу Юрэ къызыхъугъэ мафэм ар тефэ.

Республикэ общественнэ движениеу «Адыгэ Хасэм» игъэ­цэкIэкIо куп Ю. СтIашъур хэт. ИIофшIагъэхэр Москва, Уры­сыем ишъолъырхэм, США-м, Германием, Тыркуем, Иорда­нием, Сирием, Эстонием, фэшъхьафхэм къащагъэлъэгъуа­гъэх, щытхъуцIэхэр къыфаусыгъэх.

СтIашъу Юрэ фэгъэхьыгъэ тхылъэу тыкъызытегущыIэрэм хэ­гъэхъонхэр фашIыщтых, адыга­бзэкIи, урысыбзэкIи къыдагъэ­кIыщт, зекIо Iофыгъохэм, мамыр псэукIэм афэIорышIэщт. Опсэу, Юр! Уиунагъо удатхъэу ущыIэнэу пфэтэIо.

ЕмтIылъ Нурбый.