Адыгэ хьалыжъом и Мафэ я 10-у Мыекъопэ районым иIофшIапIэу «Руфа-Турым» щы­зэ­хащагъ.

Республикэм и Правительствэ и Тхьаматэ игуадзэу Наталья Широковар Адыгэ Республикэм и ЛIышъхьэу КъумпIыл Мурат ыцIэкIэ мэфэкI зэхахьэм хэла­жьэхэрэм къафэгушIуагъ. Илъэс къэс мэфэкIым зызэриушъомбгъурэр хигъэунэфыкIыгъ.

«Руфа-Турым» ипащэу щытыгъэ Бибэ Мурадин кIэщакIо зыфэхъугъэ зэхахьэхэу адыгэ хьалыжъом, адыгэ къужъым, адыгэ къэбым ямафэхэр Урысыем щыкIорэ Iофтхьэбзэ хэ­хыгъэ 1000-мэ ащыщ хъугъэх. М. Бибэм идунай ыхъожьы­гъэми, ишIушIагъэкIэ къытхэт, ри­гъэжьэгъэ Iофхэр республи­кэм щылъагъэкIуатэх.

ШIэжьым фэгъэхьыгъэу мэфэкI зэIукIэгъум къыщыгущы­Iагъэх Адыгэ Республикэм гуманитар ушэтынхэмкIэ и Ин­сти­тутэу Т. КIэращэм ыцIэ зы­хьырэм ипащэу ЛIыIужъу Адам, осэшI купым итхьаматэу ЛIы­хъукIэ Азмэт, респуб­ликэм иоб­щественнэ дижениеу «Ады­гэ Хасэм» ипащэу ЛIымыщэкъо Рэмэзан, шIэныгъэлэжьэу Къуекъо Асфар, ар­хеолог цIэрыIоу Тэу Аслъан, мэфэкI зэхахьэм испонсорэу, редукторышI заводым ипащэу Пщыжъ Щамсудин, общест­веннэ IофышIэу ХъокIон Хьамедэ, «Руфа-Турым» ипащэу Бибэ Ну­рыет, нэмыкIхэри.

Зэхахьэр зезыщэгъэ журналистэу Беданыкъо Замирэ тарихъ къэбархэр гъэшIэгъонэу къыIотагъэх. Пэсэрэ лъэхъаным къыщегъэжьагъэу адыгэхэм гъомылапхъэм мэхьэнэ ин зэ­рэратырэр щысэ зэфэшъхьаф­хэм къащыхигъэщыгъ.

Тэу Аслъан мэфэкI хьалы­жъор шIэжь хьалыжъом зэрэте­кIырэр, пшхы зыхъукIэ зэпыпчыгъэми, шэн-хабзэхэр укъуагъэ зэрэмыхъухэрэр, хьалыжъом адыгэ къуаем нэмыкIэу лыр е фэшъхьафхэр далъхьэхэу къызэрэхэкIырэм иеплъыкIэхэр къыриIолIагъэх.

«Нысэщэ хьалыжъом», «Бысымгуащэм ихьалыжъо», «Къэ­зыгъэзэжьыгъэ хьалы­жъом», фэшъхьафхэм яхьылIэгъэ къэбархэм зэхахьэм хэлажьэхэрэр къакIэупчIагъэх.

Тхьацур, къуаер, машIор

Бысымгощэ хъупхъэм иIанэ узыIэпищэн фае. Хьалыжъор агъэжъэным фэшI пщэры­хьа­кIохэм чIыпIэхэр афагъэшъо­шагъэх. МашIом рахьылIэзэ тхьацур зэрагъажъэрэм лъэпкъ шэн-хабзэхэр зэгъэфагъэхэу ащызэрахьэх. Анахь IэпэIасэр къахэгъэщыгъуай. ОсэшIхэм къаIорэм тедэIу.

Анахь IэпэIасэхэр

«Нанэ ихьалыжъо» фэгъэхьыгъэ зэнэкъокъум Джэджэ районым къикIыгъэ Къушъхьэ Розэ апэрэ чIыпIэр къыщыдихыгъ. Ахътао Сарэ ятIонэрэ чIыпIэр ыхьыгъ, Мыекъуапэ щэпсэу. Теу­цожь районым щыщэу Мэщ­лIэкъо Симэ ящэнэрэ чIыпIэр къыдихыгъ.

«МэфэкI хьалыжъу». Илъэсыбэ хъугъэу зэнэкъо­къум ча­нэу хэлэжьэрэ Отрэщ Симэ Блащэпсынэ щэпсэу, апэрэ чIы­пIэр къыдихыгъ. Шэуджэн Тэмарэ Мыекъуапэ дэс, ятIонэрэ хъугъэ. Кощхьэблэ районым щыщэу Тхьар­къохъо Фатимэ ящэнэрэ чIыпIэр фа­гъэ­шъошагъ.

«Нысэ Iап». Мыекъопэ районым къикIыгъэ ЖакIэмыкъо Бэллэ апэрэ чIыпIэр къыди­хыгъ. Красногвардейскэ районым щыпсэурэ Нэфышъ Асе ятIонэрэ чIыпIэр ыхьыгъ. ЛIыгъур Аминэ ящэнэрэ ­хъугъэ.

«Бысымгуащэм ихьа­лы­жъу». Красногвардейскэ районым щыпсэурэ Сихъу Светланэ апэ­рэ чIыпIэр къыдихыгъ. Мые­къуа­пэ щыщэу Цэй Марыет ятIонэрэ чIыпIэр ыхьыгъ. Кощ­хьэблэ рай­оным щыщэу Хьашхэ Саидэ ящэнэрэ чIыпIэр фагъэшъошагъ.

«Къэзыгъэзэжьыгъэ хьа­лы­жъу». ХьакIэмзые щыпсэурэ ХьакIэ­мыз Ритэ зэнэкъо­къум апэ­рэ чIыпIэр къыщыди­хыгъ. Красно­гвардейскэ районым ­щы­­щэу Мэрчанэ Сусанэ ятIонэрэ чIыпIэр ыхьыгъ. Кощ­хьэблэ рай­оным къикIыгъэ От­рэщ Симэ ящэнэрэ хъугъэ.

ШIухьафтын шъхьаIэр

ШIухьафтын шъхьаIэу Гран-прир нэбгыри 4-мэ язырызэу афагъэшъошагъ. Ахэр: Ожъ Ирин — Красногвардейскэ рай­он, Кучмэз Мерэм — Мыекъопэ район, Аджырэ Жанн — Красногвардейскэ район, Цундышк Зурыет — Теуцожь район.

Щытхъу тхылъхэр, сертификат­хэр, сомэ мин 50 зырыз анахь IэпэIасэхэм аратыжьыгъэх.

Ныбджэгъухэм яшIэжь

Бибэ Мурадинэ ныбджэгъу­хэм зэращымыгъупшэрэм, ишIу­шIагъэ, спортсмен цIэрыIоу зэ­рэщытыгъэм афэгъэхьыгъэ едзыгъоу Къэралыгъо телерадиокомпаниеу «Адыгеим» ижурналистхэу Гъазый Бирамхъанрэ Къудаикъо Алыйрэ агъэхьазырыгъэр зэхахьэм къыщагъэлъэгъуагъ.

Ансамблэхэу «Ащэмэзым», «Синдикэм» адыгэ орэдхэр къаIуагъэх, къэшъуагъэх. Артист­хэу Цышэ Зарэт, Къатмэс Рус­лъан гум иорэдхэр агъэжъынчыгъэх. КIэлэцIыкIухэр усэхэм къяджагъэх.

Адыгэ Республикэм культу­рэмкIэ иминистрэу Аулъэ Юрэ лъэпкъ зэфэшъхьафхэр мэфэ­кIым зэрэзэфищагъэхэм, мэфэкIым зызэриушъомбгъурэм мэхьэнэ ин ритыгъ.

ЕплъыкIэхэр, зэгъэпшэнхэр

ШIэныгъэлэжьхэм, культурэм пылъхэм, общественнэ Iофы­шIэхэм, лэжьэкIо къызэрыкIо­хэм, зекIо ныбжьыкIэхэм гущы­Iэгъу тафэхъугъ. Теуцожь Марыет, Къуекъо Марыет, Мэщ­фэшIу Нэдждэт, ЦIыкIушъо Ас­лъан, Анастасия Красиковам, Анастасия Ивановам, ЛIышэ Ахьмэд, ХьакIэмыз Ритэ, фэшъхьафхэм адыгэ хьалыжъом и Мафэ гъэшIэгъонэу агъэ­кIуагъ, алъэгъугъэр, зэхахыгъэр зэрагъэпшэщтыр ашIэрэп. Зыгъэпсэфыгъо уахътэм унэм исымрэ мэфэкIым хэлажьэрэмрэ зэ­рэзэтекIыхэрэм къытегущыIа­гъэх. Сырыфыбг жьыр щыкъабз, гушхоныгъэ уегъэшIы. СатыушI­хэм игъэкIотыгъэу Iоф щашIэ, шIухьафтын пкъыгъуабэ щыпщэфын плъэкIыщт.

МэфэкIым щагъэжъэгъэ хьалыжъохэр зэхахьэм къэкIуагъэ­хэм аратыжьыгъэх, Iэнэ шы­гъэм кIэрысхэу къэбархэр къызэфа­Iотагъэх, нэбгырабэ нэIуасэ зэ­фэхъугъ.

Бибэ Мурадинэ ыпхъухэу Гъыщ Заремэрэ Iэшъхьэмэфэ Аннэрэ мэфэкIым хэлэжьагъэ­хэм афэразэхэу «тхьашъуегъэ­псэу» араIожьыгъ.

ЦIыфым ишIушIагъэ кIодырэп. Лъапсэу ышIыгъэр мэпытэ, зеу­шъомбгъу. ЛIыIужъу Адам къы­зэриIуагъэу, шъоф нэкIым, мыжъо итэкъухьагъэхэм Бибэ Мурадинэ (МуратэкIэ еджэщтыгъэх) ащыригъажьи, дунэе мэхьанэ зиIэ зыгъэпсэфыпIэ­-зэ­хэхьапIэр ыгъэпсыгъ, лъэпкъ шIэжьым, пIуныгъэм къапкъырыкIхэрэ мэфэкIхэр зэхищэхи, тамэ аритыгъ. Тыпфэраз, Мурат. Тхьэм джэнэт къыует. О уилъа­гъо рыкIощтхэр, уиIофшIагъэ лъызыгъэкIотэщтхэр къэбгъэнагъэх, къытхэтых.

Сахьидэкъо Нурбый.