Адыгэ республикэ сымэджэщым нефрологиемкIэ иотделение ипащэу Мария Ду­дарь цIыфхэм коронавирусым пэуцужьырэ вакцинэр зыхарагъалъхьэмэ ишIуагъэ къызэрэкIощтыр ицыхьэ телъэу къытиIуагъ.

ЫшIэщтым бэрэ ар егупшысагъэп.

— Коронавирусым пэуцужьыщт вирусыр апэу зыхязгъэлъхьагъэхэм сащыщ. Сэ сизакъоп, коллективэу сызыхэтыми зымышIыгъэ ахэтэп. Джащ фэдэу сымэджэщым къычIэфагъэу тызэIазэхэрэм ащыщхэри къы­тэупчIых, вакцинэм ишIуагъэ къэкIощтымэ зэрагъашIэ, етIанэ нахьыбэмэ зыхарагъалъхьэ.

Сиунагъуи джащ фэд, зэкIэ исхэм вакцинэр ахядгъэлъхьагъ. Зыми ар къегоуагъэп, ыгъэгумэкIыгъи къахэкIыгъэп.

Вакцинэр ныбжьыкIэхэми зыныбжь хэкIотагъэхэми зыхарагъэлъхьан фаеу елъытэмэ Маринэ тызеупчIым, къытиIожьыгъ:

— Ковидым пэуцужьын зылъэкIыщт вакцинэр жъи, кIи ящыкIагъэу сэлъытэ. Мары сятэу илъэс 75-рэ зыныбжьыр вакцинацием хэфагъ. Зы мафи ащ рыкIэгъожьыгъэп, ыгъэсымэджагъэп, плъыр-стыри къыкIилъхьагъэп. ­Ыныбжь емылъытыгъэу, хатэм щэлажьэ, хэтэ­рыкIхэр къытфегъэкIых.

Арышъ, сэ бэрэ сызыхэтырэ ыкIи сызигъусэрэ цIыфхэр вакцинацие зэрашIыгъэхэр сигуапэ, къысэшIэкIыгъэ пстэумэ коронавирусым зыщаухъумагъэу сэлъытэ.

Маринэ къыIотагъ къэлэ зэфэшъхьафхэм Iоф ащызышIэрэ исэнэхьатэгъухэм бэрэ зэрафытеорэр, зэрадэгущыIэрэр, вакцинэм ишIуагъэ къызэ­рэкIорэр ахэми къызэраIорэр.

— ЦIыфхэм Iоф адэпшIэн фае. Вакцинэр зыфэдэр ыкIи ишIуагъэу къакIорэр агурыбгъаIомэ, ежьхэм яцыхьи мэпытэ, — еIо ащ. Шъаукъо Аслъангуащ.