Тикъуаджэхэм адэсых бзылъфыгъэ предпринимательхэр, чанхэр, щы­Iэныгъэм чIыпIэ пытэ щызыIыгъхэу, зиунагъо, зиIахьыл, зиадыгагъэ къэзыгъэгъунэхэу, зидахэ, зишIушIагъэкIэ къахэщыгъэхэр. Ахэм къа­лэжьыгъэу гущыIэ дэхабэ афаIо. Сэ непэ зигугъу къэсшIы сшIоигъор ахэм ащыщэу Алыбэрд Аминэт Мусэ ыпхъур ары. Аминэт — предприниматель, Iуш, чан, хьалэл, цIыфхэм лъы­тэныгъэ афэзышIырэ бзылъ­фыгъ. Ар улэпэ Ны Хасэм ипащ. ЩыIэныгъэм къыздихьырэ къиныгъохэм ащ щакIухьагъэп, ишъэожъыий, ишъхьэгъусэ кIэлэ зишIугъоми, ядунай ахъожьыгъ, ежьыри бэрэ ыпсэ ихьафэу къыхэкIыгъ. Ау непи нычэпи Тхьэм ишIушIэ ыгъэкIодырэп. Игъунэгъухэм афэраз, ахэм ыгу агъэшIу. Алыбэрд Аминэт цIыфышIу, фэдэу джыри зы гозгъэуцонэу згъотыщтэп, ащкIэ зыми серэмыгъэмыс —мыщ Тхьэм шIугъэу къыхилъхьагъэр бэ ыкIи фэлъэкIырэмкIэ укIэхьанэу щытэп.

Чылэ мэфэкIхэм имылъкоу хьалэлэу ахилъхьэрэмкIэ псэпэшхо къелэжьы, ичэу дэжь кIэлэцIыкIу джэгупIэ сабыйхэм апае къыщызэIуихыгъ, ежь исабыеу щымыIэжь цIыкIум фигъа­дэхэу «мэлэIич цIыкIухэр къытфэбыбыгъэх» еIо. ГумэкIыгъо зиIэ хъурэр Аминэт дэжь макIо, психолог-ушъыякIу, ухигъэукъощтэп, гъунэгъумэ къызэрэуатын щыIэп, нысэ цIыкIухэр «нэнэ Щатэ» зэреджэхэрэр, ахэм, пчыхьэзэхахьэхэр афызэхищагъэ фэдэу, агурегъаIо цIыфы­гъэ-адыгэгъэ шэн-хэбзэ зэфыщытыкIэу чIэтынэ мыхъущтхэр. Джырэблагъэ кIэлэцIыкIу Iыгъы­пIэм афэкIогъагъ шIухьафтынхэр афихьи, ащ ыуж сабыйхэри ыдэжь къэкIогъагъэх, Аминэт иадыгэ Iэпэщысэхэу ыугъоигъэ­хэм яплъыгъэх.

Аминэт ищагу дахэ, зэIухыгъ, экскурсие псау щызэхэпщэн плъэкIыщт. Улапэ илъэси 150-рэ зэрэхъугъэм епхыгъэу зэхащэгъэ Iофтхьабзэхэм язэфэхьысыжьхэмкIэ «Дом образцового содержания» зыфиIорэмкIэ Аминэт апэрэ чIыпIэр къыратыгъагъ. Ащ диныр елэжьы, нэмаз ешIы. Псауныгъэу иIэмкIэ, ипшъэшъитIукIэ, ахэм ясабыйхэмкIэ, дунэе нэфым къызэрэтехъуагъэмкIэ шыкур ешIы. Ахэм апае уцуи, тIыси иIэп, зэригъэгушIощтхэм, зэригъэ­дэ­хэщтхэм ренэу пылъ. Уни, ща­гуи, урами емызэщыжьэу ахэм апае егъэкIэракIэх. Аминэт Iэп­кIэ-лъапкI ыкIи IэпэIас, дахэр зэкIэ икIас. Пхъи, мыжъуи, ятIи, хьашъуи, шэкI такъыри, хъэдэни, шъоф ыкIи унэ къэгъагъи гъэшIэгъонэу ыгъэфедэзэ егъэ­кIэракIэх, ахишIыкIырэр бэдэд. Щагум IэкIэ шIыгъэ нысхъэпитIу джадэхэу дэсых. Зыр «Насып­хъан», ар адыгэ нан, щагум дэкIи къыдахьи апэгъокIы, егъэ­кIуатэ; адрэр — цыхьан джэнчыдз пшъашъэу «Аза» — ар ипшъэшъэгъумэ апай, афэ­плъэщт, янасып къариIощт (сэ­мэркъэу шIыкIэу гъэпсыгъэ).

Аминэт иунэ чылэ ехыпIэм пэмычыжьэу щыт, чылэм ечъэ­кIырэ псыхъо цIыкIум дэжь загъорэ зехыкIэ, бэ гъэшIэгъо­нэу ынэмэ къапэкIафэрэр —чъыгыжъ икIыкIыгъэр, мыжъошхо лыд-пкIыдыр, IутIэныр. Ащ фэдэхэр ядэжь къарегъэхьы, тIысыпIэ, щысыпIэ гъэшIэгъонхэр ахешIыкIы. Аминэт мэхьа­нэшхо реты бзылъфыгъэу укъэ­хъуным, сабый къыппыфэным. Ащ ихьатыркIэ, уипшъэдэкIыжь нахь ин мэхъу, уигукIэгъуи, уишIулъэгъуи, уиIэдэбныгъи зэ­диштэнхэ фае. Уиунагъо дахэу пIыгъыныр, уихъулъфыгъэ уасэ фэпшIыныр, уихьакъу-шыкъухэр дахэу зепхьанхэр, уищагу къыдахьэхэрэм дахэу уапэгъокIыныр, уирызыкъэу Тхьэм къыуитыгъэр апэбгъохыныр бзылъфыгъэм къытефэрэ Iофыгъох. Ащ пщэрыхьаныр икIас, IэшIоу шхыныгъохэр ешIых, ипшъашъэ­хэри фигъэсагъэх. Аминэт янэ (Уджыхъумэ япхъугъ) шIукIэ ыгу къэкIыжьы, ары IокIэ-шIыкIэр езыгъэшIагъэр.

Аминэт «Сидунае къэзыгъэ­дахэхэрэм сипхъорэлъф цIыкIу­хэр ащыщых, ахэр сэркIэ анахь мылъку лъапIэх» еIо. ЩыIэныгъэм, тхылъхэм къарихыгъэ шIэныгъэхэмкIэ Аминэт цIыфхэм адэгуащэ, ыгощырэм нахьи на­хьыбэ къыхэхъожьы. Бзылъфыгъэ хъупхъэм ыбзи IэшIу, шъабэ, ежьыри гоIу, илъэс пчъа-гъэм сэшIэшъ, зэхъокIыныгъэшхуи фэхъурэп, ащ фэдэхэр жъы хъухэрэп, ахэр яшIушIагъэ къеухъумэх.

Аминэт «творческэ цIыф» зы­фаIорэмэ ащыщ. Бзылъфы­гъэхэм ямэфэкIэу Аминэт зы­хэлэжьагъэм гущыIэ къызы­щыратым, дахэу къэгущыIагъ, иусэхэм къяджагъ. КъедэIугъэ­хэр лъэшэу къыфэрэзагъэх, къыкIэрыхьэгъагъэх, къехъохъу­гъэх. Аминэт тэри тырэгушхо. Улэпэ коим итхьаматэу Куфэнэ Анзор лъэшэу тыфэраз Аминэт зыфэдэ цIыфыр къыгурыIуи, Ны Хасэм иIофыгъохэр ыпшъэ зэрэрилъхьагъэмкIэ. Ар укъэзымыгъэукIытэжьын цIыф.

Бзылъфыгъэ чаным ыгу къы­зыдэчъырэм зэрилъэкIэу усэхэр етхых, аузэ лъэкIуатэх има­фэхэр.

Пщыкъэнэ Май. Улап.