ЦIыфхэм гъэцэкIэжьын IофшIэнхэр нахьыбэрэмкIэ къызырахьы­жьэ­рэр, мебелыр зызэблахъурэр гъэмафэр ары. Адыгеим щыпсэухэрэм ащыщхэм къазщапэкIэфэрэ чIыпIэм диванхэр, алырэгъухэр, сантех­никэр ыкIи нэмыкIхэр щыратэкъухэу урехьылIэ.

Амыгъэнэфэгъэ чIыпIэм пкъы­гъошхохэр зэрэщырадзы­хэрэм ехьылIэгъэ тхьаусыхэ тхылъхэр шъолъырым игъэIоры­шIэнкIэ гупчэм бэрэ къы­IокIэх. Диванхэр, пIэкIорхэр, пхъэнтIэкIухэр, шкафхэр, комодхэр, ошэкурхэр, гъэучъыIалъэ­хэр, хьакухэр, зэрыгыкIэхэрэ машинэхэр, компьютерхэр, те­левизорхэр, кушъхьэфачъэхэр, пчъэ-шъхьаныгъупчъэ блыпкъхэр, обой пыдзафэхэр ахэм къахэфэх.

Чырбыщ, бетон тэкъуафэхэр, пхъэпыдзафэхэр, краскэ зэрытыгъэ щалъэхэр, гъэцэкIэн IофшIэн зэфэшъхьафхэм нэ-мыкI пыдзафэу афэхъухэрэр зыдахьыжьыщтхэм ежь цIыфхэр ары ыгъэгумэкIынхэ фаер. Шъолъыр операторым зэзэгъыныгъэ шъхьаф дашIымэ, ащ фэ­дэ пыдзафэхэр афыIуищыщтых, контейнерхэм адэжь ахэр щызэтыралъхьэхэ хъущтэп.

Фэтэрыбэу зэхэт унэхэм ачIэсхэм ямыщыкIэгъэжь пкъы­гъошхохэр контейнерхэм адэжь, унэе унэ зиIэхэм ящагу къыпэIулъ гъогунапцэм дэжь щагъэ­тIылъынхэ алъэкIыщт.

Пкъыгъошхохэр зыIуащырэ мафэхэр шъолъыр операторэу «ЭкоЦентрэм» иофициальнэ сайт къырегъахьэх. Компанием испециалистхэр цIыфхэм къяджэ а мафэхэм атефэу ахэр ящагухэм адахынхэу. Къэбзэныгъэм лъыплъэн фаехэр гъэ­IорышIэкIо организациехэмрэ къалэм изэтегъэпсыхьан фэ­гъэзэгъэ къулыкъухэмрэ ары. Пкъыгъошхохэр республикэм ирайонхэм защаIуащыхэрэр язаявкэ шъолъыр операторым зыIэкIагъахьэкIэ ары. Муниципальнэ образованиехэм адэсхэм ыпкIэ зылъатыкIэ, ахэр зэрэIуа­щыщт техникэр къафагъэкIощт.

Коммунальнэ пыдзэфэ пы­тэхэр Адыгеим щыIузыщырэр ООО-у «ЭкоЦентрэр» ары. Рес­пуб­ликэм ипсэупIэхэм адэс нэ­бгырэ мин 460-м ехъумэ яфэIо-фашIэхэр ащ егъэцакIэх. Маши­нэ 60-м ехъумэ арыс­хэр мафэ къэс къэбзэныгъэм лъэплъэх.

«Шъолъыр операторым зэ­зэгъыныгъэ дашIынэу, хэкIыр чIыпIэ нэкIхэм щарамытэкъунэу цIыфхэм зафэдгъазэ тшIои­гъуагъ. ХэкIыр пыутэу Iузыщырэ машинэхэр Адыгеим итых. Ахэм чIыпIэ гъэнэфагъэхэр арэп хэкIыр зыщыратэкъурэр, апэ къифэрэ хъуатэм е гъэхъунэм ар щызэтыратакъо, хэкIитэкъу­пIэ ашIы», — къыIуагъ ООО-у «ЭкоЦентрэм» Адыгэ Респуб­ликэмкIэ икъутамэ ипащэу Алы­бэрд Налбый.

Мыгъэ шъолъыр операторым хэкIитэкъупIэ ашIыгъэгъэ чIыпIи 10-р Адыгеим щиукъэ­бзыжьыгъ. ПсыIушъохэр, мэзхэр, тиреспубликэ инэмыкI чIыопс чIыпIэхэр аушIоигъагъэх, пыдзэ­фэ кубометрэ 30 — 200-м нэс ахэм ащызэIуагъэкIэгъагъ. Фытемыгъэпсыхьэгъэ чIыпIэхэм хэкIыр ащизытэкъухэрэм административнэ пшъэдэкIыжь зэра­рагъэхьырэр бэмэ ащэгъупшэ.

Коммунальнэ пыдзэфэ пы­тэхэмрэ пкъыгъошхохэмрэ зэ­рэIуащыхэрэм епхыгъэ Iофы­гъохэмкIэ телефон номерхэу 8-800-707-05-08-р е 8-962-868-14-62-р къызыфэжъугъэфедэнхэ шъулъэкIыщт.

ПсэолъэшIын IофшIэнхэм афэхъурэ пыдзафэхэм яIущынкIэ зэзэгъыныгъэ адэзышIы зышIоигъохэр телефонэу 8-918-425-96-22-мкIэ теохэмэ хъущт. ПэIудзыгъэ шIыкIэм тетэу официальнэ сайтэу https://adygeya.clean-rf.ru зыфиIорэмкIэ е ком­панием иофисхэмкIэ (къ. Мые­къуапэ, ур. Пионерскэр, 297; къэлэ гъэпсыкIэ зиIэ поселкэу Яблоновскэр, ур. Школьнэр, 10/1) заявкэр аIэкIагъэхьан алъэкIыщт.