БэмышIэу Мыекъуапэ щыкIуагъ партиеу «Справедливая Россия — За Правду» зыфиIорэм ишъолъыр отделение зэхи­щэ­гъэ пресс-конференциер. Ащ хэлэ­жьагъ партием игупчэ аппарат ипащэу Дмитрий Гусевыр.

Iофтхьабзэм иублэгъум ащ кIэкIэу къыIотагъ партиер зызэхащагъэр, гъогоу къыкIу­гъэр. Ащ къызэри­IуагъэмкIэ, 2007-рэ илъэсым партиехэу «Жизнь», «Родина» зыфи­Iохэрэр ыкIи «Партия пенсионеров» зыцIагъэр зэха­хьэхи зы партиеу затхыгъ. Аужырэ лъэ­хъаным ахэм гъусэ къафэ­хъугъэх партиеу «Патриоты России» ыкIи «За правду» зыфаIохэрэр. Арэущтэу зэ­хэтхэу хэдзынхэм ахэр ахэлэжьэщтых.

Сыд фэдэ Iофыгъо шъхьа­Iэха партиер зыдэлажьэрэр, зыгъэгумэкIырэр? Дмитрий Гусевым ащ фэдэ IофыгъуиплI анахь шъхьаIэу къыхигъэщыгъэхэр. Ахэм политологыр кIэкIэу къащыуцугъ.

Анахь шъхьаIэу пстэумэ апэ къызыкIигъэтхъыгъэр цIы­фыр пенсием зыщыкIощт ныбжьыр зэрэщытыгъэу къэ­гъэнэжьыгъэныр ары. Джащ фэдэу пенсиер сомэ мин 31-м нэгъэсыгъэныр. Ащ фэ­дэ амал къэралыгъом зэриIэм ицыхьэ телъэу ащ къыIуагъ.

Ащ ыуж къызыщыуцугъэр къэралыгъом шыпсэухэрэм зэкIэми мазэ къэс сомэ минипшI зырыз ятыгъэныр ары, «Справедливый базовый доход (СДП) зыфаIорэр, цIыфхэм ящыIэкIэ-псэу­кIэ къэIэтыгъэным фэшI.

Ащ фэдэ IэпыIэгъу цIыфхэм ягъэ­гъотыгъэн фаеу партием елъытэ IофшIэпIэ чIыпIэхэр нахь макIэ зэрэхъухэрэм, цифрэ технологиехэм ти­щыIэныгъэ чIыпIэшхо зэрэщаубытырэм къахэкIэу. Ащ фэдэ тыныр (СПД-р) кIэлэцIыкIухэмкIэ къырагъажьэмэ нахьышIоу Дмитрий Гусевым ылъытагъ ыкIи а мылъкур къызыдырахын ылъэ­кIыщт лъэныкъохэри къыпчъыгъэх.

ПсэупIэ-коммунальнэ Iофыгъохэм япхыгъэхэри партием къеIэтых. Ащ зэрилъы­тэрэмкIэ, унэхэм ягъэцэкIэ­жьын пае ахъщэу аIахырэр техыжьыгъэу, ар илъэсэу зы­хэтхэм агъэцэкIэжьынэу щыт унэхэм ащыпсэухэрэм атынэу шIыгъэн фае.

Джащ фэдэу хэдзынхэм япхыгъэ Iофыгъо заулэхэм ар къащыуцугъ, ащкIэ зигъо ылъэгъухэрэм къакIигъэт­хъыгъ.

Iофтхьабзэм икIэухым къэ­зэрэугъоигъэхэм яупчIэхэм джэуапхэр къаратыжьыгъэх партием игупчэ аппарат ипа­щэрэ мы партием ишъолъыр отделение исовет ипащэу Александр Лободарэ.

(Тикорр.). Сурэтыр Iэшъынэ Аслъан тырихыгъ.