Адыгеим и ЛIышъхьэу Къум­пIыл Мурат Урысыем и ФСИН кадрэхэмкIэ игъэIоры­шIапIэ ипащэу Александр Мат­веенкэмрэ ФСИН-м Адыгэ РеспубликэмкIэ и ГъэIорышIапIэ ипащэу Виталий Перхоровичрэ тыгъуасэ республикэм и Правительствэ зычIэт унэм зэIукIэгъу щадыриIагъ. Илъэс­рэ пэщэ пшъэрылъхэр ащ ыгъэцэкIагъ ыкIи мэкъуогъум и 21-м а IэнатIэм Iуагъэхьагъ.

Александр Матвеенкэм къызэриIуагъэмкIэ, ФСИН-м Адыгэ РеспубликэмкIэ и ГъэIорышIапIэ ипэщэщтыр къыхахын зэхъум Виталий Перхорович IофшIэнымкIэ IэпэIэсэныгъэ инэу хэ­лъым, гъэхъагъэу ышIыгъэхэм, пшъэрылъэу ыгъэуцухэрэм ягъэ­цэкIэн ынаIэ зэрэтыригъэтырэм къапкъырыкIыгъэх.

Адыгеим и ЛIышъхьэ ведомствэм ипэщакIэ фэгушIуагъ ыкIи республикэм зыпкъитыныгъэ тапэкIи илъыным тегъэпсыхьэгъэ зэдэлэжьэныгъэм шIуагъэ къытыным зэрэщыгугъырэр къыхигъэщыгъ.

ЗэдэгущыIэгъум хэлэжьагъэх Адыгэ РеспубликэмкIэ федеральнэ инспектор шъхьаIэу Сергей Дрокиныр, АР-м и Премь­ер-министрэу Геннадий Митрофановыр, АР-м и ЛIы­шъхьэрэ АР-м иминистрэхэм я Кабинетрэ я администрацие ипащэу Владимир Свеженец, АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур.

«Виталий Перхорович Адыге­им Iоф зыщишIэгъэ лъэхъаным шIуагъэ къэзытырэ зэфыщытыкIэхэр, продукцием игъэхьа­зырынкIэ муниципальнэ ыкIи шъо­лъыр заказхэм ягъэцэкIэн епхыгъэ зэдэлэжьэныгъэ дэгъу тазыфагу илъ хъугъэ. Колониехэм продукциеу къащыдагъэ­кIырэр нахьыбэ шIыгъэнымкIэ Урысые Федерацием и ФСИН Адыгэ РеспубликэмкIэ и ГъэIорышIапIэ IофшIэныр нахьышIоу зэхищэн зэрилъэкIыгъэр тигуапэ. Къулыкъум иучреждениехэм мылъку ыкIи техникэ лъэны­къом­кIэ язытет нахь дэгъу зэ­рэ­­хъурэм мэхьэнэ гъэнэфагъэ иI», — ­къы­хигъэщыгъ КъумпIыл Мурат.

Адыгеим и ЛIышъхьэ къызэри­IуагъэмкIэ, бизнесри УФСИН-м нахь чаныгъэ хэлъэу дэгъэлэ­жьэгъэн, производственнэ учреждениехэм проектхэр ащыгъэцэкIагъэ хъунхэмкIэ амалэу щыIэхэм предпринимательхэр ащыгъэгъозэгъэнхэ фае.

Виталий Перхорович цыхьэ къызэрэфашIыгъэм пае зэрафэразэр къыхигъэщыгъ ыкIи зиIоф аIуагъэхэу пщыныжь зыхьыхэрэм урысые хэбзэгъэуцугъэу щыIэм къыдилъытэрэ шапхъэхэр агъэцэкIэнхэмкIэ пшъэрылъхэр зэкIэ зэшIуихынхэм зэрэфэхьазырыр къыхигъэщыгъ. ШIуагъэ къэзыты­рэ зэдэлэжьэныгъэмкIэ Адыге­им и ЛIышъхьэ IэпыIэгъу фэ­хъунхэу зэригъэгугъагъэм пае зэрэфэразэри ащ къыхигъэ­щыгъ. 2021-рэ илъэсым иапэрэ кIэлъэ­ныкъо проценти 198-кIэ планыр гъэцэкIагъэ хъугъэ. Ащ нэмыкIэу зэзэгъыныгъакIэхэри зэдашIыгъэх. А пстэуми амал къаты зиIоф аIуагъэхэм IофшIэн ягъэ­гъотыгъэнымкIэ, муниципальнэ псэупIэхэм яфэныкъоныгъэ­хэм атегъэпсыхьэгъэ продукцие лъэпкъ зэфэшъхьафхэм ягъэхьазырын дэлэжьэнхэмкIэ.

«Ведомствэм республикэм ихабзэ икъулыкъухэм тапэкIи зэдэлэжьэныгъэ-зэгъусэныгъэу адыриIэщтым зызэриушъом­бгъу­щтым сицыхьэ телъ. УФ-м и Президент кIэщакIо зыфэхъу­гъэ Iофыгъохэм язэшIохынкIэ бэ дгъэцэкIэн фаеу къытпыщылъыр. Ахэр социальнэ псэуа­лъэхэм яшIын епхыгъэх. КIочIа­кIэхэр ащ пае тищыкIэгъэщтых, ­Уфсин-м иучреждениехэм яамалхэри ащкIэ дгъэфедэщтых», — къыIуагъ АР-м и ЛIышъхьэ.

АР-м и ЛIышъхьэ ипресс-къулыкъу