Адыгэ Республикэм и Общественнэ палатэ итхьаматэу Устэ Руслъан коронавирусыр къызежьакIэм апэу сымэджагъэхэм ащыщ ыкIи ащ ихьы­лъагъэ, пкъынэ-лынэм зэрарэу къы­фихьырэр дэгъоу зэ­хишIэн ылъэ­кIыгъ.

— Илъэсым къехъугъ пандемиер тищыIэныгъэ пытэу зы­хэтыр, — къеIуатэ ащ. — А уахътэм къыкIоцI узым щынагъоу къыздихьын ылъэкIыщтым щыгъуазэ тыхъугъ. Сигупсэхэм, синэIуасэхэм ащыщыбэм тхьамыкIагъоу къафихьыгъэр синэ­рылъэгъугъ. Ащ дэжьым узым зэрэпэуцужьынхэу щыIагъэр карантин амалхэр ыкIи гъунэпкъэ гъэнэфагъэхэу агъэуцугъагъэхэр арых. Ахэм икъоу коронавирусыр къызэтырагъэуцон алъэкIыгъэп. Джы ащ пэуцу­жь­хэрэ вакцинэхэр къыхахы­гъэх. Урысыем имызакъоу, а шIыкIэ амалыр къэралыгъуабэмэ джы агъэфедэ. Арышъ, тэри амал зэриIэкIэ коронавирусым тыпэуцужьыным фэшI вакцинэр зыхядгъалъхьэмэ ишIуагъэ къэ­кIощт.

Общественнэ палатэм итхьаматэ зэрэхигъэунэфыкIыгъэмкIэ, мы уахътэм вакцинэхэм язы­тет фэгъэхьыгъэ къэбар зэ­фэшъхьафхэу къекIокIыхэрэм цIыфхэм агу джэнджэш къы­рагъахьэ. Медицинэм хэшIыкI фы­зимыIэхэм къаIорэм уядэ­Iу­нэу зэрэщымытыр Устэ Рус­лъан къыхигъэщыгъ. Джащ фэ­дэу, цивилизованнэ къэралыгъуабэхэм узыкIэу къежьагъэм зэ­рэпэуцужьыщт амалэу вакцинациер къызэрэхахырэм нафэ къытфешIы ащ фэдиз цIыфыр бгъэделэныр зэрэмыIэшIэхыр.

Iэшъынэ Сусан.