Мэкъуогъум и 20-м Джэджэ районым къыщыхъугъэ гъогу хъугъэ-шIэгъэ тхьамыкIагъом нэбгыри 4 хэкIодагъ.

Мы чIыпIэм щыIагъ АР-м и ЛIышъхьэу Къум­пIыл Мурат. А уахътэм ехъулIэу аварием епхы­гъэ къэбарэу аIэкIэлъым рес­публикэм ипащэ щигъэгъозагъ АР-м хэгъэгу кIоцI IофхэмкIэ иминистрэу Иван Бахиловым.

Станицэу Джаджэм пэмы­чыжьэу хъугъэ-шIагъэр къыщыхъугъ. Къэбарэу аIэкIэлъымкIэ, автомобилитIу зэутэкIыгъ. ВАЗ-2114-м ыкIи «Фольксваген Джетта» зыфиIорэм зэкIэмкIи нэбгыри 7 арысыгъ.

Шъобж хьылъэхэу атещагъэ хъугъэхэм апкъ къикIыкIэ нэ­бгырищмэ а чIыпIэм ядунай щахъожьыгъ: IэкIыб къэралы­гъом къыщыдагъэкIыгъэ маши­нэм Мыекъуапэ щыщ илъэс 60 зыныбжь водителэу кIэрысы­гъэмрэ ащ къыдисыгъэ нэбгыритIумрэ (илъэс 21-рэ ыкIи 43-рэ аныбжь), Шэуджэн районым щэпсэух. НэбгыриплIыр IэпыIэгъу псынкIэм Iуищыгъэх, илъэс 17, 22-рэ, 46-рэ ыкIи 50 аныбжь. ГухэкI нахь мышIэми, ахэм ащыщ бзылъфыгъэу сы­мэджэщым нагъэсыгъэм ыпсэ хэкIыгъ. Адрэ нэбгырищмэ ящы­Iэныгъэ врачхэр фэбанэх.

Адыгеим и ЛIышъхьэрэ мини­стрэмрэ следствием илIыкIо­хэр ягъусэхэу хъугъэ-шIагъэр къыз­щыхъугъэ чIыпIэр къаплъы­хьагъ, следственнэ-оперативнэ купым хэтхэм гущыIэгъу афэхъу­гъэх. Шъобж зытещагъэхэм ме­дицинэ IэпыIэгъу ягъэгъотыгъэным анахьэу анаIэ тырагъэ­тыщт.

Мы мафэм Адыгеим игъогу­хэм хъугъэ-шIэгъитIу къатехъу­хьагъ. Ахэм нэбгыри 4 ахэкIодагъ, 4-мэ шъобжхэр атещагъэхэ хъугъэ. Ешъуагъэу рулым кIэ­рысхэу водитель 13 къаубы-тыгъ. ГъогурыкIоным ишапхъэ­хэр гъогогъу 614-рэ аукъуагъ, ахэм ащыщэу 27-р лъэсрыкIохэм ялажь.