Мыекъопэ производственнэ объединениеу «Точрадиомаш» зыфи­Iо­рэм игенеральнэ директорэу Вадим Исаевым ыцIэкIэ шIэжь мы­жъо­бгъу джырэблагъэ къызэIуахыгъ. Ар поселкэу Западнэм Исаевым ыцIэ зыхьырэ унэу N 1-м щагъэпсыгъ.

Iофтхьабзэм хэлэжьагъэх Мыекъопэ къэлэ администра­ци­ем ипащэ ипшъэрылъхэр зыгъэцэкIэрэ С. Стельмах, ве­теранхэм якъэлэ Совет итхьаматэу Ю. Томчак, зэIухыгъэ Iахьзэ­хэлъ обществэу «Адыг­промстроим» ипащэу ХъутIыжъ Аслъан, «Точ­ра­диомашым» иIо­­фышIэхэр, В. Исаевым иIа­хьылхэр, студентхэр.

ШIэжь зэхахьэм къыщыгущы­Iагъэхэм ячIыпIэгъоу, яIоф­шIэ­гъугъэу В. Исаевым фэгъэхьыгъэ гукъэкIыжьхэмкIэ хьакIэхэм къадэгощагъэх. КъызэраIуа­гъэм­кIэ, Урысыем и Къыблэ ипредприятие анахь инэу итхэм ащы­щэу мыекъопэ производственнэ объединениеу «Точрадиомаш» зыфиIорэм хэхъоныгъэхэр ышIынхэм Вадим Исаевым иIахьышхо хишIыхьагъ.

1980-рэ илъэсым ыкIэхэм В. Исаевыр зипэщэ заводыр Мыекъуапэ ыкIи Адыгэ автоном хэкум ит мылъку къэкIопIэ пред­приятие анахь инхэм ащыщ хъу­гъагъэ. Ащ нэмыкIэу СССР-м и Минрадиопром предприятие анахь дэгъухэм ахалъытагъ, ре­нэу хагъэунэфыкIырэ чIыпIэхэр къыфагъэшъуашэщтыгъ.

ИсэнэхьаткIэ IэпэIэсэныгъэшхо хэлъэу, заводым гъэхъэгъэ инхэр зэришIырэм фэшI Вадим Леонид ыкъом СССР-м иминистрэхэм я Совет ипремие къы­фагъэшъошагъ. Джащ фэдэу «Заслуженный машиностроитель РСФСР» ыкIи «Почетный радист» зыфиIорэ щытхъуцIэхэр къылэжьыгъэх.

КIАРЭ Фатим.