Аужырэ чэщ-зыма­фэм коро­навиру­сымкIэ Адыгеим щысымэджагъэхэм япчъагъэ лъэшэу зыкъыIэтыгъ. Сымэ­джэщым хьылъэу чIафэ­хэрэми ахахъоу ыублагъ. Анахьэу узыгъэгумэкIынэу щытыр зищыIэныгъэ зыдихьыхэрэр на­хьыбэ зэрэхъу­хэрэр ары.

Вакцинэр зыхягъэлъхьэгъэныр зэкIэми апэу къэштэгъэн зэрэфаем ишыхьат узым щыIэныгъэу зыдихьыхэрэм япчъагъэ. Коронавирусым иштаммыкIэу къыхагъэщыгъэхэр нахь «бза­джэу» зэрэщытхэм ыкIи нахь псынкIэу зэрэзэпахырэм апкъ къикIыкIэ анахь щынагъох, Урысыем къыщашIыгъэ вакцинэхэр ахэми зэрапэуцужьхэрэр ме­дицинэм иIофышIэхэм теубытагъэ хэлъэу къаIо.

Тыгъуасэ ехъулIэу чэщ-зы-мафэм нэбгырэ 14 республикэм къыщысымэджагъ, нэбгыри 9 реанимацием чIэфагъ. Зэпахырэ узхэмкIэ сымэджэщым Мыекъуапэ щыщ бзылъфы­гъи­тIумэ апсэ щыхэкIыгъ.

Мы пчъагъэхэр бэкIэ нахь щынагъо джыри хъушъущтых республикэм щыпсэухэрэм са­къыныгъэрэ гупшысэкIэ тэрэзрэ къызхамыгъафэхэмэ. Вакцинэр ыпкIэ хэмылъэу, аужыпкъэм, фэгъэкIотэнхэр ар зыхэзылъхьэхэрэм зафашIыхэрэ уахътэр бгъэфедэнышъ, псауны­гъэмкIэ уифеди удегупшысэжьын фае.

Зэпахырэ узыкIэмкIэ оперативнэ штабым къызэритыгъэмкIэ, Адыгеим къыщысымэджагъэхэм япчъагъэ зэкIэмкIи нэбгырэ 14837-рэ мэхъу. Анахьыбэр къалэу МыекъуапэкIэ — нэбгырэ 5960-рэ, Тэхъутэмы­къое районыр — 2046-рэ, Кощ­хьэблэ районыр — 1096-рэ, Красногвардейскэ районыр — 1051-рэ, Джэджэ районыр — 785-рэ, Адыгэкъалэ — 639-рэ, Шэуджэн районыр — 557-рэ.

Джырэ уахътэм зэIазэхэрэм япчъагъэ нэбгырэ 292-рэ мэхъу. ЗэкIэмкIи зидунай зыхъожьыгъэр нэбгырэ 225-рэ.

Мы пчъагъэхэм шъо, шъуиIахьылхэр, шъуинэIуасэхэр къа­хэмыфэнхэр шъхьаджи ыIэ илъ.

Сурэтыр Мыекъопэ къэлэ ад­министрацием ипресс-къу­лыкъу къытIэкIигъэхьагъ.