Урысые Федерацием и Президент ЮФО-мкIэ иполномочнэ лIы­кIоу Владимир Устиновым видеоселектор шIыкIэм тетэу УФ-м и Пре­зи­дент Къыблэ федеральнэ шъолъырымкIэ и Полномочнэ лIыкIо дэжь щызэхэщэгъэ Советым изэхэсыгъо тыгъуасэ зэрищагъ.

Урысые Федерацием и Пре­зидентэу Владимир Путиным ублэпIэ классхэм ащеджэхэрэм ыпкIэ хэмылъэу шхын стыр ятыгъэным иIоф тэрэзэу еджапIэхэм ащызэ­хэщэгъэнымкIэ иуна­шъохэр гъэцэкIагъэ зэрэ­хъухэрэм япхыгъэ Iофы­гъохэм ахэплъагъэх. Мы зэIукIэм джащ фэдэу хэлэжьагъэх Урысые Фе­дерацием гъэсэныгъэмкIэ иминистрэу Сергей Кравцовыр, хабзэм ифедеральнэ къулы­къухэм ялIыкIохэр, шъолъырхэм япащэхэр. Адыгеим ыцIэкIэ а Iофтхьабзэм хэлэжьагъ респуб­ликэм и ЛIышъхьэу КъумпIыл Мурат.

Джащ фэдэу республи­кэм ыцIэкIэ щыIагъэх федеральнэ инспектор шъхьаIэу Сергей Дрокиныр, Адыгэ Республикэм и Премьер-министрэ игуадзэу Наталья Широковар, Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипащэу Владимир Свеженец, Адыгэ Республикэм гъэсэныгъэмрэ шIэныгъэмрэкIэ иминистрэу КIэрэщэ Анзаур, Роспотребнадзорым Адыгэ Рес­публикэмкIэ ипащэу Сергей Завгороднер, АР-м иминист­рэхэм я Кабинет хэтхэр.

Зэхэсыгъор къызэIуихызэ Вла­димир Устиновым къызэрэхигъэщыгъэмкIэ, Урысыем и Президент ипшъэрылъхэр гъэцэкIэгъэнхэм пае ренэу IофшIэн гъэнэфагъэ зэшIуахы, мыщ къы­хеубытэ къэралыгъом ипащэ анахь мэхьанэшхо зэритырэ пшъэрылъхэм зыкIэ ащыщыр — кIэлэеджакIохэм шхын стыр ятыгъэныр.

«КъэсIон слъэкIыщт кIэлэ­еджакIохэм ягъэшхэн шъолъырым мыдэеу зэрэщызэхэщагъэр. Ау ащ дакIоу Роспотребнадзорым щыкIагъэхэр зиIэ шъолъыр заули къыхигъэщыгъ. Мы пIэлъэ благъэхэм ахэр щыгъэзыегъэнхэ фае. Хэукъоныгъэхэр зэкIэ дамыгъэзхэмэ, аужып­къэм уголовнэ Iофхэр къапагъэтэ- джэн алъэкIыщт. Зигугъу тшIырэр кIэ­лэцIыкIухэр, ахэм япсау­ныгъ ары. Джащ пае кIэлэеджа­кIохэм ягъэшхэн иIофыгъо ренэу анаIэ тырагъэтын фае, мыщ къыхеубытэх хэбзэухъумакIо­хэри», — къыхигъэщыгъ Владимир Устиновым.

Урысые Федерацием и Президент Къыблэ федеральнэ шъолъырымкIэ и Полномочнэ лIыкIо шъолъырхэм яIэшъхьэтетхэм илъэсэу къихьащтым еджапIэхэр лъэныкъо пстэумкIи фытырагъэпсыхьанхэу, санитарнэ, машIом зыкъимыштэным, гъэсэныгъэ зыщарагъэгъотырэ организациехэм террористическэ Iофтхьабзэхэр ащызэрамыхьанхэм япхыгъэ Iофыгъохэр зэшIуахынхэу къафигъэпытагъ.

Урысые Федерацием гъэсэны­гъэмкIэ иминистрэ зэхэсыгъом илъэхъан пшъэрылъ заулэ къы­гъэнэфагъ, анахьэу къыхигъэщы­гъэхэм ащыщ кIэлэ­еджа­кIохэм шхын стыр аIэкIэгъэ­хьэгъэныр.

«Пстэуми апэу Урысые Федерацием и Президент пшъэ­рылъэу къыгъэуцугъэр тикIэлэцIыкIухэм япсауныгъэ изытет зэрепхыгъэр къыхэгъэщыгъэн фае. Арышъ, Роспотребнадзорым къыхигъэщыгъэ щыкIа­гъэхэр, хэукъоныгъэхэр дэгъэзыжьыгъэнхэмкIэ IофшIэныр жъугъэлъэшынэу сышъолъэIу, ащ дакIоу кIэлэцIыкIухэм ягъэшхэн щынэгъончъэу зэрэщытыщтым тынаIэ тедгъэтын, ащ пае гъомылапхъэхэр къаIэкIэзыгъа­хьэхэрэр зыфэдэхэр тэрэзэу гъэунэфыгъэным мэхьанэ иIэу щыт», — къыIуагъ Сергей Кравцовым.

Зэхэсыгъом илъэхъан Адыге­им щыкIагъэ къыфалъэгъугъэп. Ау ащ дакIоу республикэм и ЛIышъхьэ АР-м гъэсэныгъэмрэ ыкIи шIэныгъэмрэкIэ и Минис­терствэ пшъэрылъ фишIыгъ еджапIэхэм кIэлэцIыкIухэм ягъэ­шхэн зэращызэхэщагъэр тэрэ-зэу ауплъэкIузэ ашIынэу, мыщ хэхьэ гъэмэфэ лъэхъаным кIэлэцIыкIухэм языгъэпсэфыгъо уахътэ зэрагъэкIощтыри.

«Урысые Федерацием и Президент иунашъо икъоу гъэцэ­кIагъэ зэрэхъущтым илъэс еджэ­гъоу къихьащтыми тынаIэ тедгъэтын фае. ЕджапIэхэм яшхапIэхэр зэкIэ гъэцэкIэжьыгъэнхэ, ныбжьэу яIэм елъытыгъэу ашхыщтыри икъоу гъэунэфыгъэн фае. Врачхэм язэфэ­хьысыжьхэм ялъытыгъэу «диетическэ» зыфаIорэ шIыкIэм те­тэу, зэтеутыгъэу кIэлэцIыкIу­хэр гъэшхэгъэнхэми шъхьафэу тынаIэ тетымыдзэ хъущтэп. А IофшIэным специалистхэр къы­хэжъугъэлажьэх. Роспотреб­надзорым ишэпхъэ пстэуми адиштэу тикIэлэцIыкIухэм гъомылэпхъэ тэрэз апэдгъохын зэ­рэфаер тщыгъупшэ хъущтэп. СышъолъэIу шъунаIэ лъэшэу а Iофым тежъугъэтынэу», — къы­Iуагъ КъумпIыл Мурат.

Шъугу къэдгъэкIыжьын: Урысые Федерацием и Президентэу Владимир Путиным игукъэ­кIыкIэ 2020-рэ илъэсым Iоныгъом къыщегъэжьагъэу ублэпIэ классхэм ащеджэрэ кIэлэеджа­кIохэм ыпкIэ хэмылъэу шхын стырхэр аратыхэ хъугъэ. Рес­пуб­ликэм ащ фэдэ кIэлэцIыкIоу исыр нэбгырэ мин 25-рэ мэхъу, я 5 — 11-рэ классхэм арыс кIэлэеджэкIо мини 9,5-мэ социальнэ IэпыIэгъум къыдилъы­тэрэ Iофтхьэбзэ гъэнэфагъэхэр адызэрахьанхэ фае.

Адыгэ Республикэм и ЛIышъхьэ ипресс-къулыкъу