Урысые Федерацием и Президентэу Владимир Путиным пшъэрылъ къызэрэфишIыгъэм тетэу УФ-м и Президент Къыблэ федеральнэ шъолъырымкIэ и Полномочнэ лIыкIоу Владимир Устиновым цIыфхэр тыгъуасэ ригъэблэгъагъэх. Видеоконференцие шIыкIэм тетэу кIогъэ Iофтхьабзэм Адыгеим и ЛIышъхьэу КъумпIыл Мурат хэлэжьагъ.

Владимир Устиновыр цIыфхэм ялъэIу тхылъхэм ахэплъагъ ыкIи шъолъыр­хэм япащэхэм пшъэрылъ гъэнэфагъэхэр афишIы­гъэх.

Джэджэ районым къи­кIыгъэ Елена Воробьевар гурыт еджапIэу N 1-м ипащэу щыт. Ар къызкIэлъэIугъэр еджапIэм игъэ­фэбэпIэ системэ агъэцэкIэжьынымкIэ IэпыIэгъу къаратыныр ары.

КъумпIыл Мурат а Iофым зэрэщыгъуазэр ыкIи зэхэубытагъэу зэшIохыгъэ хъуным ыуж зэритхэр къыхигъэщыгъ. Илъэсэу икIыгъэм еджапIэм ышъхьэ, шхапIэр агъэцэ­кIэжьыгъэх, джащ фэдэу унитIумэ агупэ гъэцэ­кIэ­жьынхэр рашIылIагъэх, чъыг-къэгъагъэхэр агъэтIысхьагъэх. ЕджапIэм къыготэу кIэлэцIыкIу IыгъыпIэр агъэпсы.

«Гъэфэбэн системэр игъэкIотыгъэу гъэцэкIэ­­жьыгъэн зэрэфаем елъы­тыгъэу къэтIон тлъэ­кIыщт илъэсыкIэ еджэгъум иублэгъум ехъулIэу ар тыухын мурад зэрэтиIэр», — къы­Iуагъ КъумпIыл Мурат. Непэ ехъулIэу проект-­сметнэ докумен­тациер агъэхьазырыгъах, аукцион зэхащагъ. Мы охътэ благъэхэм псэолъэшI-монтаж IофшIэнхэр рагъэжьэщтых. Муниципальнэ бюджетым къыхагъэкIынышъ сомэ миллиони 3,2-рэ ащ пэIуа­гъэхьанэу щыт.

Владимир Устиновым республикэм и ЛIышъхьэ пшъэрылъ къыфишIыгъ игъом унашъор гъэцэкIагъэ хъуным пае ищыкIэгъэ Iофтхьабзэхэр зэкIэ зэрахьанхэу.

Мы илъэсым Iоныгъом и 1-м ехъулIэу еджапIэм икъэгъэфэбэн иIофыгъо зэшIохыгъэ зэрэхъущтым акIуачIэ зэрэрахьылIэщтымкIэ Адыгеим и ЛIы­шъхьэ ар ыгъэгугъагъ.

ПсэупIэу Джаджэм дэт гурыт еджапIэу N 1-м кIэлэцIыкIу 608-рэ щеджэ. ЕджапIэр мызэу, мытIоу творческэ зэнэкъокъухэм, олимпиадэхэм ахэлэжьагъ ыкIи текIоныгъэр къащыдихэу къыхэкIыгъ. ЗипсауныгъэкIэ щыкIагъэ зиIэ кIэлэцIыкIухэм язытет къыдалъытэзэ гъэсэныгъэ-егъэджэн Iофыр мыщ щызэшIуахы. Предмет зэ­фэшъхьафхэмкIэ кабинетхэри ящыкIэгъэ оборудованиемкIэ зэтегъэпсыхьагъэх.

Адыгэ Республикэм и ЛIышъхьэ ипресс-къулыкъу