Адыгэ Республикэм и Къэралыгъо Совет — Хасэм зи­чэзыу зэхэсыгъоу тыгъуасэ иIагъэр зэрищагъ ащ и Тхьа­матэу Владимир Нарожнэм. Депутатхэр Iофыгъо 16-мэ ахэплъагъэх ыкIи ахэмкIэ унашъохэр ашIыгъэх.

Адыгеим социальнэ-­экономикэ хэхъоныгъэ ышIыным и Стратегиеу 2030-рэ илъэсым нэс телъытагъэр блэкIыгъэ илъэсым гъэцэкIагъэ зэ­рэхъугъэм фэгъэхьыгъэ зэфэхьысыжьэу АР-м и ЛIышъхьэ къышIыгъэм депутатхэр пэублэм хэп­лъагъэх ыкIи ащ дыра­гъэштагъ.

«Правительственнэ сы­хьатым» къыдыхэлъыта­гъэу къэгущыIагъ ыкIи лъэпкъ проектэу «Псауныгъэм икъэухъумэн» зы­фиIорэр республикэм зэрэщагъэцакIэрэм изэ­фэхьысыжьхэр къышIыгъэх министрэу Мэрэтыкъо Рустем. Ащ къызэриIуагъэмкIэ, проектым къыдыхэлъытэгъэ лъэныкъохэр зэрифэшъуашэу гъэцэкIэгъэнхэм, къэгъэлъэгъон гъэнэфагъэхэм акIэхьанхэм анахьэу анаIэ тырагъэты.

Коронавирусым, вакцинацием, IэпыIэгъу псын­кIэм иIофшIэн зэрэзэхищэрэм, нэмыкIхэм япхыгъэ упчIэхэр депутатхэм министрэм фагъэзагъэх. Ахэм зэкIэми игъэкIотыгъэу ар къатегущыIагъ, джэуапхэр къаритыжьы­гъэх.

Министерствэм ипащэ мыщ дэжьым анахьэу зи­гугъу къышIыгъэр коронавирусыр къызпыхьагъэхэм япчъагъэ республикэм щыхэхъожьынэу зэрэригъэжьэжьыгъэр ары.

— БлэкIыгъэ чэщ­-зы­мэфэ закъом шъолъырым щыпсэурэ нэбгырэ 14-мэ коронавирусыр къяузыгъ. Реанимацием нэбгыри 9 илъ. Къыхэзгъэщымэ сшIоигъу, рес­публикэм ис нэбгырэ мин щэкIырэ блырэ фэ­дизмэ вакцинэр зыхарагъэлъхьагъ, ахэм ащыщэу прививкэр къы­зэмыкIугъэ дгъэунэфыгъэп. Мы лъэныкъомкIэ непэ Iофхэм язытет къы­зэрыкIоу зэрэщымытыр цIыфхэм къыда­лъы­тэзэ вакцинациер акIуным мэхьанэшхо иI. Ар агъэцэкIэнэу закъыфэсэ­гъазэ, сыкъяджэ, — къы­Iуагъ Мэрэтыкъо Рустем.

Джащ фэдэу 2020-рэ илъэсымкIэ Адыгеим ирес­публикэ бюджет, АР-м шIокI зимыIэ медицинэ страхованиемкIэ и ЧIыпIэ фонд ибюджет зэрагъэцэкIагъэхэм яхьылIэгъэ законопроектхэм депутатхэр ахэплъагъэх ыкIи аштагъэх, хэ­бзэ­гъэу­цугъэхэм ащыщхэм зэ­хъокIыныгъэхэр афашIыгъэх. АР-м и Къэралыгъо Совет — Хасэм идепутатхэр зыхадзыщтхэ ма­фэри агъэнэфагъ.

ТХЬАРКЪОХЪО Адам.