Зэпахырэ узхэр къахэзыгъэщырэ медицинэ органи­за­циехэм ялабораториехэр джырэ шапхъэхэм адиштэу зэтегъэпсыхьэгъэнхэм пае Урысые Федерацием и Пра­вительствэ ыухэсыгъ федеральнэ бюджетым имылъкоу шъолъырхэм атырагощэщтыр.

А гухэлъым пае Адыгэ Республикэм сомэ мил­лион 48-рэ мин 639,7-рэ къыфыхагъэкIыгъ.

Урысые Федерацием и Правительствэ а унашъор зиштагъэр Урысые Фе­де­рацием и Федеральнэ ЗэIукIэ бюджет мылъкур ате­гощэгъэнымкIэ и Комиссие ащ къызыдыре­гъэштэ нэуж ары. Адыгэ Республикэм ыцIэкIэ Къэ­ралыгъо Думэм идепута­тэу Владислав Резник ащ­кIэ IэпыIэгъу къафэ­хъугъ.

«Инфекционнэ къулыкъум, диагностическэ ла­бораториехэри ахэм зэра­хэтхэу, хэхъоныгъэ егъэ­шIыгъэныр, джырэ шап­хъэхэм атетэу зэ­те­гъэ­псы­хьэгъэныр экономикэр зыпкъ игъэуцо­жьыгъэнымкIэ Урысые Федерацием и Правительствэ зэри­хьэ­рэ Iоф­тхьабзэхэми, къэралыгъо санитар-эпидемиологие надзорыр гъэпы­тэгъэнымкIэ гъогу картэми къащыдэлъытагъ», — къы­Iуагъ Владислав Резник.

Адыгеим и ЛIышъхьэу КъумпIыл Мурат зэрэхигъэунэфыкIыгъэмкIэ, медицинэ организациехэм ядиагностическэ инфек­ционнэ лабораториехэр джырэ уахътэм диштэу зэтегъэпсыхьэгъэнхэмкIэ федеральнэ мылъкоу къы­хагъэкIыгъэр цIыфхэм япсауныгъэ икъэухъумэн фэIорышIэщт.

«Зэпахырэ узыр къызэуталIэхэрэр игъом къы­хэгъэщыгъэнхэм, ащ игъогупэ пыбзыкIыгъэным мэхьанэшхо зэряIэр пандемием илъэхъан къэлъэгъуагъ. Диагнос­тикэм ишIуагъэкIэ сымаджэхэм нахь шIуагъэ къытэу яIэзэнхэ, зэпахырэ уз зэфэшъхьафхэр къыхагъэщын алъэкIы», — къыIуагъ Адыгэ Рес­публикэм и ЛIышъхьэ.