Архитектурэм ыкIи къэлэгъэпсыным яIофыгъохэм афэгъэзэгъэ Сове­тэу Адыгеим щызэхащагъэм изэхэсыгъоу щыIагъэм тхьамэтагъор щызэ­рихьагъ республикэм ивице-премьерэу Сапый Вячеслав.

Социальнэ мэхьанэ зиIэ псэуалъэхэм яшIын фытегъэ­псыхьэгъэ проектхэр ары Iо­фыгъо шъхьаIэу къэзэрэугъоигъэхэр зытегущыIагъэхэр.

ГущыIэм пае, Адыгэкъалэ мэщытыкIэ щашIынэу агъэнафэ. ПэшIорыгъэшъэу ащ ипроект зыфэдэщтым къытегущыIагъ унэе предпринимателэу Къэзэнч Мурат. Ащ къызэриIуагъэмкIэ, мы псэуалъэр тIоу зэтетыщт, зэкIэмкIи квад­ратнэ метрэ мини 5,3-рэ илъыщт, зытырашIыхьащтри чIы­пIэри агъэнэфагъ.

Адыгэкъалэ щыпсэурэ быс­лъымэнхэр непэ зэкIолIэхэрэ мэщытыр ыпэкIэ кIэлэцIыкIу IыгъыпIэу щытыгъ, ар инэп, цIыфхэр чIафэхэрэп. Ар къыда­лъыти, муниципалитетым мэ­щытыкIэ щагъэпсынэу унашъо ашIыгъ. Псэуалъэр зэрашIыщт шIыкIэм иплан хьазыр. Мы гухэлъым Советым хэтхэм дырагъэштагъ, щыкIагъэу щыIэхэр проектыр загъэхьазырыщт лъэ­хъаным дагъэзыжьынхэу зэ­даштагъ.

Станицэу Дахъом щашIынэу агъэнэфэрэ Свято-Георгиевскэ чылысым иIофыгъуи къэзэрэугъоигъэхэм мэхьанэшхо ратыгъ. Ар зытырашIыхьащт чIыгу Iа­хьыр къыхахыгъ, план гъэнэфагъэ щыI. ПшъэдэкIыжьэу ыхьырэмкIэ гъунэпкъэ гъэнэфагъэ зи­Iэ обществэу «Архстудио» зыфиIорэм ипроектировщикэу Надежда Щербаковам къызэри­IуагъэмкIэ, мы псэуалъэр классическэ шIыкIэм тетэу агъэ­псынэу ары. Станицэм имыза­къоу, республикэмкIи мыр культурнэ гупчэ хъунэу ылъытагъ. Джащ фэдэу еджэпIэ корпус, нэмыкI шъолъырхэм къарыкIыхэрэ хьакIэхэм апае хьакIэщ мыщ къыдыхэлъытэ­гъэщтых.

Мы проектым щыкIагъэхэр зэриIэхэр къэгущыIагъэхэм къы­хагъэщыгъ, ахэр дэгъэзы­жьы­гъэнхэм фэшI IофшIэкIо куп зэхащэнэу рахъухьагъ. Ау ежь псэуалъэм ишIын игъо дэдэу алъытагъ ыкIи ащ дырагъэ­штагъ.

Ящэнэрэ Iофыгъоу зытегущыIагъэхэр атлетикэ онтэ­гъумкIэ шъолъыр Гупчэм ипроект ары. ЗэрагъэнэфагъэмкIэ, псэуалъэр Мыекъуапэ игурыт еджапIэу N 5-м пэмычыжьэу щашIыщт, квадратнэ метрэ мини 5,2-рэ фэдиз илъыщт. Мы спорт лъэпкъым фэщагъэхэм япчъагъэ нахьыбэ шIыгъэным, ащ зиушъомбгъуным фэIоры­шIэщт.

— Мы псэуалъэхэр респуб­ликэм ищыкIагъэх, арышъ, про­ектхэр гъэцэкIэгъэнхэм тынаIэ тедгъэтын фае. Ахэр архитектурнэ шэпхъэ гъэнэфагъэхэм адиштэнхэм мэхьанэшхо иI, — къыIуагъ Сапый Вячеслав.

Зэхэсыгъом хэлэжьагъэхэр Iофыгъо пшIыкIубгъумэ ахэп­лъагъэх, тапэкIэ Iоф зэрашIэщтыр, анахьэу анаIэ зытыра­гъэтыщт лъэныкъохэр агъэнэфагъэх.

ТХЬАРКЪОХЪО Адам.