Адыгэ Республикэм псауныгъэр къэухъумэгъэнымкIэ и Министер­ст­вэрэ Роспотребнадзорым АР-мкIэ и ГъэIорышIапIэрэ къызэ­раты­гъэм­кIэ, непэрэ мафэм ехъулIэу коронавирусым ылъэныкъокIэ шъо­лъырым иIофхэм язытет зыпкъ итэп, мэкъуогъум щегъэжьагъэу сымаджэхэм япчъагъэ нахьыбэ зэрэхъугъэр муниципальнэ образо­вание­хэм пстэу­ми ащагъэунэфыгъ. Коронавирусым иштамм зэфэшъхьафхэри къыхагъэщыгъэх.

Джырэ уахътэм нэбгырэ 288-мэ яIазэх, ахэм ащыщэу 79-р сымэджэщхэм ачIэлъых, реанимацием нэбгыри 7 илъ. Пандемиер къызежьагъэм къыщыублагъэу нэбгырэ 222-мэ ядунай ахъожьыгъ, нахьыжъхэм узыр хьылъэу зэраукIочIырэр спе­циалистхэм къаIо.

Адыгеим и ЛIышъхьэу КъумпIыл Мурат зэрэхигъэунэфыкIыгъэмкIэ, коронавирусым пэшIуе­кIогъэным фытегъэпсыхьэгъэ Iофтхьабзэхэу агъэнэфагъэхэм джыри кIуачIэ яI. ТхьамыкIэгъо чIыпIэ тимыуцоным пае псынкIэу Iофтхьабзэхэр зэрахьанхэм мэхьанэшхо зэриIэр рес­публи­кэм ипащэ къыIуагъ. Ащ пае санитарнэ-эпидемиологи­ческэ шапхъэхэр зэрауплъэкIу­хэрэр гъэлъэшыгъэн, вакцинэр зыхалъхьэхэрэм япчъагъэ хэп­шIыкIэу нахьыбэ шIыгъэн фае.

— Экспертхэм зэралъытэрэмкIэ, мы лъэныкъомкIэ Iофхэм язытет нахь дэй хъун ылъэ­кIыщт, къэралыгъомкIэ сыма­джэхэм япчъагъэ хэхъо. Ау на­­хьы­шIум тыкъыфэкIон тлъэ­кIыщт прививкэ языгъэшIыхэрэм япчъа­гъэ нахьыбэ хъумэ. Ар республикэм щыпсэухэрэм къагурыIоным мэхьанэшхо иI. Нэбгырэ пэпчъ ежь зызэрэ­фэгумэкIыжьырэм дакIоу къыпэблэгъэ цIыфхэми япсауныгъэ къэухъумэгъэным ынаIэ тыригъэтын фае, — къы­Iуагъ Адыгеим и ЛIышъхьэ.