Зэрэхэгъэгоу зэлъызыубытыгъэ коронавирусыр тIэкIу зэкIэкIуагъэми, сымаджэхэр нахь макIэ хъугъэхэми, уцужьыгъэу пIоныр джыри жьы. Неущрэ мафэм къэхъущтыр зыми ышIэрэп. ШIэхэу зэпахырэ узыр къыбнэмысыным пае вакцинацие закъор ары зишIуагъэ къэкIощтыр.

Непэрэ мафэм ехъулIэу рес­публикэм икъалэхэм ыкIи ­ирайонхэм вакцинациер етIупщыгъэу ащашIы. Адыгэкъалэ узыр апэрэу къызнэсыгъагъэхэм ащыщ, арышъ, ащ пэшIуекIогъэным пае ищыкIагъэр зэкIэ ашIэ, вакцинэр зыщахалъхьащт чIыпIакIэ бэмышIэу къыщызэ­Iуахыгъ.

Адыгэкъэлэ сымэджэщэу К. Батмэным ыцIэ зыхьырэм ипа­щэу ЛIыхэсэ Фатимэ къызэрэтиIуагъэмкIэ, мы уахътэм Теуцожь районымкIэ нэбгырэ 1493-м ехъурэмэ Адыгэкъалэ нэбгырэ 1103-мэ прививкэ аща­шIыгъ. Агъэуцугъэ планым ар ипроцент 16-м ехъу. Теуцожь районымкIэ поселкэу Лъэустэнхьаблэ ыкIи къуаджэу Пэнэ­жьыкъуае, Адыгэкъэлэ сымэ­джэщым шIоигъоныгъэ зиIэхэм вакцинэр ащахалъхьэ. Мэкъу­огъум и 4-м къыщегъэжьагъэу, Адыгэкъалэ джыри зы пункт къыщызэIуахыгъ. КультурэмкIэ Гупчэм ар щагъэпсыгъ. Ащ ищыкIэгъэ гъэучъыIалъэхэр, ме­дицинскэ Iэмэ-псымэхэр ад­министрацием къыщэфыгъэх. Джащ фэдэу къекIолIэнхэу амал зимыIэ нэжъ-Iужъхэр вакцинэ зыщашIыхэрэм къыращалIэх. Къоджэ нахь пэIудзыгъэхэм адэт фельдшер-мамыку пунктхэм сымэджэщым иIофышIэхэр кIохэзэ прививкэр ащыхалъхьэ.

— Непэрэ мафэмкIэ вакцинэ зышIыхэрэм япчъагъэ зэхапшIэу хэхъуагъ. Зым зыр еупчIыжьы­хэзэ, псауныгъэм изытет къызэ­ремыгуаорэр, антителэхэр яIэ зэрэхъугъэр зызэхахыкIэ, ежь­­хэри къэкIох. Вакцинищэу къыдэкIыгъэр тиI. Шъхьадж ипсауны­гъэ изытет елъытыгъэу ахалъ­хьэ. ДжырэкIэ анахьэу къыха­хырэр апэ къыдэкIыгъэ «ЭпиВакКорона» зыфиIорэр ары, — еIо ЛIыхэсэ Фатимэ.

Зыныбжь илъэс 18-м къыщегъэжьагъэу шIоигъоныгъэ зиIэ пстэуми вакцинэр ахалъхьэ. Пунктым къекIолIагъэм ыпэ рапшIэу ипсауныгъэ изытет зэрагъашIэ, терапевтым еуп­лъэ­кIу, узэу иIэхэмкIэ еупчIы, лъыдэкIуаер еуплъэкIу. Зи къы­хамыгъэщыгъэмэ, прививкэр халъхьэ.

— КъызгурэIо, кIэу къежьэрэ пстэуми цIыфыр егъащтэ. Ау тызэкIэплъэжьымэ, зэпахырэ уз пчъагъэ вакцинэм ишIуа­гъэкIэ къызэтынэкIыгъ. Охътэ лые тымыгъакIоу вакцинэр зыхатлъхьэмэ, коронавирусри зэкIэкIощт. Къэбар нэпцIхэм шъуямыдэIу. Сэ сшъхьэкIэ узыр апэрэу къызэузыгъэхэм сащыщ. Сиунагъо исхэу мысымэджа­гъэхэм вакцинэ язгъэшIыгъ. Сэри охътэ гъэнэфагъэу пы­лъыр текIымэ, зыхязгъэлъхьащт, — еIо Адыгэкъэлэ сымэджэщым ипащэ.

ДЕЛЭКЪО Анет.