Адыгэ Республикэм иклиническэ сымэджэщ нейрохирургиемкIэ иотделение ипа­щэу Хьатх Марат «Спутник V» зыфиIорэ вакцинэр зыхэзылъхьагъэхэм ащыщ.Отделением врач нэбгыриеу Iоф щызышIэхэрэм ащыщэу нэбгыритIумэ прививкэр ашIыгъ, хымэ икъущтым фэдизэу алъытэрэ антителэ пчъагъэр яI, сымэджагъэх. Отделением ипащэ къызэрэтиIуагъэмкIэ, ежьыри гъорекIо ковидымкIэ сымэджагъ, ау узыр псынкIэу, къемыхьылъэкIэу пэкIэкIы- нэу хъугъэ. Антителэмэ япчъагъэ зе­уплъэ­кIум, макIэу къычIэкIыгъ, ащ ыпкъ къикIэу прививкэр зыхаригъэлъ­хьагъ.

«Тхьамэфэ зытIущ тешIэжьыгъ вакцинэм иятIонэрэ хэлъхьагъу къызысфашIыгъэр, — хигъэунэфыкIыгъ врачым, — прививкэр къысэхьылъэ­кIыгъэп. Сабыир къызыхъурэм къыще­гъэжьагъэу уз зэфэшъхьафхэм апэшIуекIохэрэ прививкэхэр фашIых, джащ фэд ковидым пэуцужьырэ вакцинэри. Ущыщынэнэу щытэп, псауныгъэм икъэухъумэн фэIорышIэ. Нэбгырэ пэпчъ ежь-ежьырэу ащ къыфэкIон фай. Вакцинэр зыхэзылъхьэ мыхъущт­хэр аутоиммуннэ узхэр ыкIи адэ­бзыр зиIэхэр арых. Прививкэр пшIыным ыпэкIэ зябгъэуплъэкIуныр нахь тэрэз. Вирус укIыгъэр зыхэлъ прививкэр — классическэ вакцинэкIэ алъытэ. Ащ фэд нахьыбэм тикъэралыгъо ща­шIыхэрэм алъапсэ. РНК-вакцинэхэр къежьэ къодыех, ахэм нахьыбэрэ Iоф адашIэщт. Арэу щытми, вектор вак­ци­нэу «Спутник V» зыфиIоу тикъэралыгъо щашIырэм ыкIи джыдэдэм цIыфхэм жъугъэу ахалъхьэрэм цыхьэ фэпшIынэу щыт. Илъэс 76-рэ сянэ ыныбжь, а вак­цинэр хязгъэлъхьагъ. Ковидым пэшIуекIогъэнымкIэ, цIыфхэр къэухъу­мэгъэнхэмкIэ ар амалы­шIоу сэлъытэ».

Тэу Замир.