Лъэпкъ проектэу «Щынэгъончъэ ыкIи шэпхъэшIухэм адиштэрэ гъогу­хэр» зыфиIорэм ишIуагъэкIэ Мыекъуапэ автомобиль гъогухэм къа­пыщылъ урам 18 агъэцэкIэжьыщт.

БэмышIэу апэрэ объектым ишIын аухыгъ. IофшIэнхэр зыщагъэцэкIагъэр урамэу Коль­цовыр ары. Ар иныгъэп, зэ­кIэмкIи зы квартал зэрэхъурэр, урамэу Пионерскэм къыщегъэжьагъэу Пролетарскэм нэс. Ащ изытет дэигъэ, ас­фальтыр жъы хъугъагъэ ыкIи ямэ инхэр иIагъэх. А чIыпIэм щыпсэухэрэ цIыфхэр пчъагъэрэ Мыекъопэ къэлэ администрацием лъэIу яIэу екIолIагъэх.

ЫпэкIэ мы чIыпIэм щашIыщтыгъэ гъэцэкIэжьынхэр бэрэ имыкъоу, зэрэщытыгъэм фэдэу хъужьыщтыгъ. Джы асфальтэу гъогум телъыгъэр тырахыжьи игъэкIотыгъэ гъэцэ­кIэжьынхэр ашIыгъэх, гъогу напцэр агъэпытагъ, автомо­бильхэр зыдагъэуцущтхэ чIыпIакIэхэр ашIыгъэх, гъогу та­мыгъэхэр тырагъэуцуагъэх ыкIи гъэцэкIэжьынхэр лъэпкъ про­ектымкIэ зэрашIыгъэр къэзы­гъэлъэгъорэ табличкэ тыра­гъэуцуагъ.

Мыекъуапэ игъогухэм ягъэцэкIэжьын чанэу макIо. Гъэ­мэфэ лъэхъаным ахэр пшIэщтхэмэ игъо дэд. ДжырэкIэ урамэу Привокзальнэм гъэцэкIэ­жьынхэр ыкIэм щыфэкIох, ура­мэу Гагариным ыцIэ зыхьырэм ыкIи поселкэу Западнэм тет гъогоу Новэм Iоф­шIэнхэр ащырагъэжьагъэх.

Лъэпкъ проектым епхыгъэ IофшIэнхэм АР-м и ЛIышъхьэу КъумпIыл Мурат ынаIэ атет. (Тикорр.).