Инэм гъэцэкIэжьын IофшIэнхэр щырагъэжьагъэх
Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм ишIуагъэкIэ Тэхъутэмыкъое районым ипоселкэу Инэм идэхьагъум екIурэ автомобиль гъогу участкэм гъэцэкIэжьынхэр щырагъэжьагъэх.
Зигугъу къэтшIыгъэ гъогу участкэм зэкIэмкIи километрэ 1,6-рэ икIыхьагъ, ащ нэмыкIэу мыр псэупIэм мэхьанэшхо щызиIэ автомобиль гъогухэм ащыщ, сыда пIомэ социальнэ псэолъэ анахь шъхьаIэхэм ащыщэу — урамэу Иркутскэ-Пинскэ дивизием ыцIэ зыхьырэм Инэм район сымэджэщыр тет.
Лъэпкъ проектым хахьэу гъогу гъэцэкIэжьынхэм яшъолъыр планэу 2022-рэ илъэсым къыдыхэлъытагъэм мы псэуалъэр хахьэ. Шъолъыр проектэу «Шъолъыр ыкIи чIыпIэ гъогу сетир» лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм епхыгъэу щыт ыкIи мыщ хахьэу мы илъэсым гъэцэкIэжьын IофшIэнхэр макIох.
Сомэ миллион 18-м ехъу зытефэрэ зэзэгъыныгъэм къызэрэдилъытэу псэолъэшI организациеу «Тэхъутэмыкъое ДРСУ-р» апэрэ IофшIэнхэм афежьагъ.
IофшIэнхэр языгъэгъэцакIэхэу, «Адыгеяавтодор» зыфиIорэм иотдел ипащэу Роман Верзуновым къызэриIуагъэмкIэ, мыжъо гъэушкъоигъэ мастикэ асфальтобетонкIэ гъэчъыгъэ гъогум ишIын лъэпкъ проектым игъэцэкIэн хахьэу реестрэм кIэу къыхэхьагъэхэм ащыщ. БэшIагъэу агъэфедэрэ асфальтобетоннэ зэхэшIыхьагъэм елъытыгъэмэ, джы мыжъо гъэушкъоигъэ зэхэшIыхьагъэу мыжъуакIэм хэшIыкIыгъэм пкъы иIэу щыт, ащ къыхэкIыкIэ асфальтыр нахь пытэ ешIы ыкIи иутыгъэхэр фэмыхъухэу нахьыбэрэ телъ, ащ нэмыкIэу автомобильхэр щынэгъончъэу щызекIонхэмкIи ишIуагъэ къэкIо.
2021-рэ илъэсым шышъхьэIум ыкIэхэм анэс гъогум епхыгъэ лъэпкъ проектым ишIуагъэкIэ специалистхэм мы участкэм екIолIэрэ гъогуи 9-р, общественнэ транспортыр къызщыуцурэ чIыпIи 2-р агъэцэкIэжьыщтых. Сымэджэщым екIуалIэу машинэ гъэуцупIэр агъэпсыщт, гъогу тамыгъэхэр тырагъэуцощтых.