ИIоф изэхэфын аухыгъ
Урысые Федерацием и Следственнэ комитет Адыгэ РеспубликэмкIэ иследственнэ гъэIорышIапIэ иотделэу мэхьанэшхо зиIэ Iофхэр зэхэзыфырэм муниципальнэ образованиеу «Джэджэ районым» ипэщагъэм ехьылIэгъэ Iофым ихэплъэн ыухыгъ.
БзэджэшIэгъитIу зэрихьагъэкIэ ар агъэмысагъ, Урысые Федерацием и Уголовнэ кодекс ия 286-рэ статья ия 2-рэ Iахь, ия 247-рэ статья иа 1-рэ Iахь ыукъуагъэхэу, иполномочиехэм аригъэхъугъэу, тыкъэзыуцухьэрэ дунаим зэрар фэхъурэ пыдзафэхэм ягъэкIодыжьынкIэ шапхъэхэр ымыгъэцэкIагъэхэу алъытагъ.
Урысыем щынэгъончъагъэмкIэ и Федеральнэ къулыкъу Адыгэ РеспубликэмкIэ и ГъэIорышIапIэ къаIэкIигъэхьэгъэ материалхэр ары уголовнэ Iо- фым икъызэIухынкIэ лъапсэ хъугъэхэр.
Джэджэ районым пэблагъэу коммунальнэ пыдзафэхэр хабзэм димыштэу зыщыратэкъущтыгъэхэ хэкIитэкъупIэр укъэбзыжьыгъэн фаеу хьыкумым ышIыгъэ унашъор пащэм ымыгъэцакIэу къыфэIорышIэрэ IофышIэхэм фитынчъэу пшъэрылъ афишIыгъ мэкъумэщ мэхьанэ зиIэ чIыгу Iахьхэм ахэр ащачIатIэжьынхэу. Хьыкумым иунашъо ыгъэцакIэ фэдэу ащ зыкъигъэлъагъозэ, химическэ веществохэмкIэ ушIоигъэ хъугъэ чIыгу Iахьэу лэжьыгъэ къызыщыбгъэкIыжь мыхъущтыр районым ис бзылъфыгъэ горэм бэджэндэу ритыгъ.
Районым ипэщагъэм хабзэр зэриукъуагъэм, щынагъоу щыт химическэ веществохэр зэрачIаригъэтIагъэм къахэкIэу чIыгу Iахьхэр зиехэми, муниципальнэ образованиеу «Джэджэ районми» сомэ миллиони 3-рэ мин 300-рэ хъурэ чIэнагъэ аригъэшIыгъ.
Ащ нэмыкIэу районым ипэщагъэм 2019-рэ илъэсым шышъхьэIум и 6-м къыщегъэжьагъэу Iоныгъом и 20-м нэс муниципальнэ образованиеу «Джэджэ районым» иадминистрацие щыIэу иIофышIэу къыфэIорышIэрэм хэбзэнчъэу пшъэрылъ фишIыгъ зэзэгъыныгъэ нэпцIымрэ станицэу Джаджэ изэтегъэпсыхьанкIэ IофшIэнхэр инэIосэ предприниматель горэм ыгъэцэкIагъэхэ фэдэу къызыщыгъэлъэгъогъэ тхылъэу къэбар нэпцIхэр зэрытыгъэмрэ акIэтхэжьынэу.
Районым ипэщагъэм ышIэзэ Адыгэ Республикэм псэолъэшIынымкIэ, транспортымкIэ, унэ-коммунальнэ, гъогу хъызмэтымкIэ и Министерствэ ифитыныгъэхэмрэ ифедэхэмрэ ыукъуагъэх, сомэ мин 680-м ехъу чIэнагъэу ащ ригъэшIыгъ.
Пэщагъэр зыфагъэмысэрэр аухэсынэу уголовнэ Iофыр икIэрыкIэу аIэкIагъэхьажьыгъ, хьыкумыр икъоу ащ джыри зэ хэплъэжьынэу щыт.